ທ່ານນາຍົກລັດຖະມົນຕີ ຟ້າມມິງຈິງ ພ້ອມກັບການນຳບັນດາອົງການສູນກາງ, ທ້ອງຖິ່ນ ແລະ ນັກລົງທຶນເຂົ້າຮ່ວມພິທີເລີ່ມລົງມືກໍ່ສ້າງເມື່ອຕອນເຊົ້າວັນທີ 1 ມັງກອນປີ 2024. ພາບ: VOV ເສັ້ນທາງຄວາມໄວສູງ ດົ່ງດັງ (ລ້າງເຊີນ) - ຈາຫລີງ (ກາວບັ່ງ) ເລີ່ມລົງມືກໍ່ສ້າງ ແມ່ນຄວາມປິຕິຊົມຊື່ນຢ່າງໃຫຍ່ຫລວງສຳລັບປະຊາຊົນຢູ່ເທດສະບານ ຈາຫລີງ, ເມືອງ ຈູງແຄງ ແຂວງ ກາວບັ່ງ ເພາະວ່າ ກ່ອນນີ້ບໍ່ເທົ່າໃດມື້ ດ່ານຊາຍແດນ ຈາຫລີງ ກໍ່ໄດ້ຮັບການຍົກລະດັບເປັນດ່ານຊາຍແດນສາກົນ. ພ້ອມກັນນັ້ນ ເສັ້ນທາງຄວາມໄວສູງ ຈາຫລີງ ຈະກາຍເປັນຈຸດສຸມດ້ານເສດຖະກິດຂອງ ແຂວງ ກາວບັ່ງ. ເສດຖະກິດດ່ານຊາຍແດນພັດທະນາກໍ່ແມ່ນໂອກາດຊ່ວຍປະຊາຊົນແຂວງຊາຍແດນມີວຽກເຮັດງານທຳຕື່ມອີກ, ເພີ່ມລາຍຮັບ. ທ່ານ ຟານວັນຕຸ່ງ ຊາວບ້ານ ກົກກາງ ເທດສະບານ ຈາຫລັງ ມີຄວາມດີໃຈໂດຍໃຫ້ຮູ້ວ່າ:  “ ລັດລົງທຶນກໍ່ສ້າງເສັ້ນທາງຄວາມໄວສູງ ແລະ ເມື່ອກໍ່ສ້າງສຳເລັດ , ພໍ່ແມ່ປະຊາຊົນກໍ່ໄປມາສະດວກກວ່າ . ເສັ້ນທາງໄປດ່ານຊາຍແດນສາກົນ ຈາຫລີງ ຈະໄປຜ່ານໜ້າເຮືອນຂອງຂ້າພະເຈົ້າ , ໄປຜ່ານບ້ານ . ສະນັ້ນ ພໍ່ແມ່ປະຊາຊົນກໍ່ສະຫນັບສະຫນູນຢ່າງສຸດໃຈ . ລັດຖະບານ ລົງທຶນຂະໜາດໃຫຍ່ທີ່ສຸດເພື່ອໃຫ້ພໍ່ແມ່ປະຊາຊົນມີເສັ້ນທາງໄປມາສະດວກ , ສ້າງເງື່ອນໄຂໃຫ້ປະຊາຊົນ ເປັນຕົ້ນແມ່ນການພົວພັນຄ້າຂາຍລະຫວ່າງ ຈີນ ແລະ ຫວຽດນາມ ”. ສຳລັບທ້ອງຖິ່ນ, ແຂວງ ກາວບັ່ງ ຕັ້ງຄວາມຫວັງວ່າ ເສັ້ນທາງສາຍນີ້ເມື່ອໄດ້ຮັບການກໍ່ສ້າງສຳເລັດ ຈະແມ່ນເສັ້ນທາງຄົມມະນາຄົມຫລັກຊ່ວຍບັນດາດ່ານຊາຍແດນຢູ່ ກາວບັ່ງ, ໃນນັ້ນ ຈຸດສຸມແມ່ນ ຈາຫລີງ ກາຍເປັນບ່ອນເຕົ້າໂຮມສິນຄ້າສົ່ງໄປຂາຍຢູ່ ຈີນ ກໍ່ຄື ຈາກຈີນໄປຍັງ ຫວຽດນາມ ແລະ ໄປສູ່ບັນດາປະເທດ ອາຊີ. ກິດຈະກຳ ຈະຕອບສະຫນອງຄວາມຕ້ອງການດ້ານການຂົນສົ່ງເຊື່ອມຕໍ່ໃຈກາງເສດຖະກິດ, ການເມືອງ ກັບບັນດາແຂວງພູດອຍທາງທິດຕາເວັນອອກສຽງເຫນືອ, ບັນດາເຂດເສດຖະກິດ, ເຂດທ່ອງທ່ຽວແຫ່ງຊາດ, ເຂດອຸດສາຫະກຳ, ຮັບໃຊ້ໃຫ້ເປົ້າໝາຍຊຸກຍູ້ການພັດທະນາເສດຖະກິດ ສັງຄົມ ຂອງທ້ອງຖິ່ນ ແລະ ຂອງເຂດ. ບາງຕອນໃນຮູບຈຳລອງເສັ້ນທາງຄວາມໄວສູງ   ດົ່ງດັງ (ລ້າງເຊີນ) - ຈາຫລີງ (ກາວບັ່ງ). ພາບ: VOV ທ່ານ ຮວ່າງຊວນແອັງ, ປະທານຄະນະກຳມະການປະຊາຊົນ ແຂວງ ກາວບັ່ງ ໃຫ້ຮູ້ວ່າ: ກາວບັ່ງ ໄດ້ ແລະ ພວມຮຽກຮ້ອງບັນດານັກລົງທຶນເຂົ້າມາລົງທຶນຢູ່ແຂວງ. ນອກຈາກຄວາມມານະພະຍາຍາມກໍ່ສ້າງເສັ້ນທາງຄວາມໄວສູງສາຍນີ້ໃຫ້ສຳເລັດຕາມການກຳນົດເວລາແລ້ວ, ກາວບັ່ງ ຍັງສືບຕໍ່ລົງທຶນ, ຍົກລະດັບລະບົບຄົມມະນາຄົມເຊື່ອມຕໍ່ບັນດາດ່ານຊາຍແດນ, ສະຖານທີ່ທ່ອງທ່ຽວຂອງທ້ອງຖິ່ນອີກດ້ວຍ. “ ເສດຖະກິດດ່ານຊາຍແດນແມ່ນຄວາມສາມາດບົ່ມຊ້ອນຂອງແຂວງ , ເຖິງຢ່າງໃດກໍຕາມ ໄລຍະຜ່ານມາ ເລື່ອງເສີມຂະຫຍາຍຄວາມສາມາດບົ່ມຊ້ອນນີ້ ຍັງຈຳກັດຢູ່ . ຄວາມເອົາໃຈໃສ່ລົງທຶນບັນດາດ່ານຊາຍແດນຫລັກ , ດ່ານຊາຍແດນສອງຝ່າຍແມ່ນສຳຄັນທີ່ສຸດ ພ້ອມກັນນັ້ນ ກໍ່ຕ້ອງມີການເຊື່ອມຕໍ່ທັງຄົມມະນາຄົມ ແລະ ແຫລ່ງສິນຄ້າ ລະຫວ່າງ ຫວຽດນາມ ແລະ ຈີນ ” . ບັນດາວິສາຫະກິດ ພວມລົງທຶນຢູ່ແຂວງ ກາວບັ່ງ ເປັນຕົ້ນແມ່ນວິສາຫະກິດໃນຂົງເຂດ logistics ມີຄວາມຫວັງວ່າ ເມື່ອເສັ້ນທາງຄວາມໄວສູງນຳເຂົ້າໃຊ້ການ ຈະຕອບສະຫນອງໄດ້ຄວາມຕ້ອງການດ້ານຂົນສົ່ງ, ຫລຸດຜ່ອນເວລາ ແລະ ລາຍຈ່າຍ; ຊຸກຍູ້ເສດຖະກິດດ່ານຊາຍແດນ ກາວບັ່ງ ໃຫ້ພັດທະນາ. ທ່ານ ຮວ່າງຈູງຢູ, ຜູ້ອຳນວຍການວິສາຫະກິດໃນຂົງເຂດນຳເຂົ້າສົ່ງອອກຢູ່ ແຂວງ ກາວບັ່ງ ໃຫ້ຮູ້ວ່າ: “ ບໍລິສັດຂ້າພະເຈົ້າ ໄດ້ກະກຽມສ້ອມແປງຄືນລະບົບພື້ນຖານໂຄງລ່າງ , ຕອບສະຫນອງຄວາມຮຽກຮ້ອງຕ້ອງການ ເຕົ້າໂຮມ ສິນຄ້າຂອງດ່ານຊາຍແດນ ແລະ ຮັບປະກັນການຈາລະຈອນສິນຄ້າ . ຫວັງວ່າ ແຂວງ ແລະ ບັນດາອົງການ, ຄະນະ , ຂະແຫນງການຈະສືບຕໍ່ມີຫລາຍນະໂຍບາຍເພື່ອດຶງດູດສິນຄ້າມາແຂວງ ກາວບັ່ງ ໃຫ້ຫລາຍກວ່າອີກ , ຊ່ວຍສ້າງວຽກເຮັດງານທຳໃຫ້ແກ່ປະຊາຊົນທ້ອງຖິ່ນ ກໍ່ຄືໃຫ້ບັນດາວິສາຫະກິດພັດທະນາກວ່າ ” . ໂຄງການກໍ່ສ້າງ ເສັ້ນທາງຄວາມໄວສູງ ດົ່ງດັງ (ລ້າງເຊີນ) - ຈາຫລີງ (ກາວບັ່ງ) ໄລຍະທີ 1 ມີຄວາມຍາວກວ່າ 93 ກິໂລແມັດ, ຈຸດເລີ່ມຕົ້ນແມ່ນຢູ່ ບ່ອນຕັດດ່ານຊາຍແດນ ເຕີນແທັງ ເມືອງ ວັນຫລ໊າງ ແຂວງ ລ້າງເຊີນ ແລະ ຈຸດສິ້ນສຸດແມ່ນບ່ອນຕັດກັບທາງຫລວງເລກ 3 ຂຶ້ນກັບຕາແສງ ຈີຖ໋າວ, ເມືອງ ກວ໋າງຮ່ວາ, ແຂວງ ກາວບັ່ງ. ໃນໄລຍະ 1 ເສັ້ນທາງນີ້ໄດ້ຮັບການອອກແບບດ້ວຍລະດັບຄວາມໄວ 80 ກິໂລແມັດ/ຊົ່ວໂມງ, ຄາດວ່າ ຈະກໍ່ສ້າງສຳເລັດໃນປີ 2026.