ປະຈຸບັນ ນັກທ່ອງທ່ຽວ ຫວຽດນາມແລະ ຈີນ ເຮັດລະບຽບການໄປທ່ຽວຜ່ານຊາຍແດນແມ່ນສະດວກ ບໍ່ຕ້ອງຂໍວິຊາ. ພາບ:VOV ເມື່ອກະກຽມເຮັດລະບຽບການຂ້າມຊາຍແດນຢູ່ສະຖານທີ່ເຂົ້າອອກເມືອງ ຢູ່ເຂດຫລັກໝາຍ 834/1 ເມືອງ ຈູງແຄງ ແຂວງ ກາວບັ່ງ, ເອື້ອຍ ຫງວຽນມາຍເຮືອງ ນັກທ່ອງທ່ຽວມາຈາກ ແຂວງຮຶງອຽນ ໃຫ້ຮູ້ວ່າ: ເອື້ອຍ ພ້ອມກັບຄອບຄົວ ໄດ້ໄປທ່ຽວຢູ່ ຈີນ ເປັນຫລາຍຄັ້ງ ແຕ່ຍັງບໍ່ທັນມີເວລາໃດ ເຮັດລະບຽບການຢ່າງສະດວກຄືຄັ້ງນີ້.  “ກ່ອນນີ້ ເພື່ອໄປທ່ອງທ່ຽວ ຢູ່ ຈີນ ພວກຂ້າພະເຈົ້າ ປະສົບກັບຄວາມຫຍຸ້ງຍາກ ຍ້ອນຕ້ອງຂີ່ຍົນ, ຕ້ອງເສຍເວລາຫລາຍເພື່ອກະກຽມດ້ານການເງິນ ກໍ່ຄືມື້ພັກເຊົາຢູ່ຈີນ. ປະຈຸບັນ ເມື່ອ ກາວບັ່ງເປີດປະຕູສາຍທ່ອງທ່ຽວເຊື່ອມຕໍ່ ຈີນ ແລ້ວ, ພວກຂ້າພະເຈົ້າ ກໍ່ ບໍ່ເສຍເວລາ ເຫື່ອແຮງ ແລະ ລາຍຈ່າຍຫລາຍຄືກ່ອນນີ້ອີກແລ້ວ” . ນັບແຕ່ເດືອນ ກັນຍາ ປີກາຍນີ້, ເມື່ອ ຫວຽດນາມ ແລະ ຈີນ ທົດລອງໃຫ້ນັກທ່ອງທ່ຽວຜ່ານໄປມາຢູ່ເຂດທ່ອງທ່ຽວທິວທັດທຳມະຊາດ ບ້ານຢົກ ຂອງຫວຽດນາມ - ເຕີທຽນ ຂອງຈີນ, ເລື່ອງໄປມາຜ່ານຊາຍແດນແມ່ນມີຄວາມສະດວກທີ່ສຸດ ນັກທ່ອງທ່ຽວຖືພຽງແຕ່ ປາດສະປໍ ຫລື ຫນັງສືຜ່ານແດນ ຫາກບໍ່ຕ້ອງການຂໍວິຊາ. ສຳລັບນັກທ່ອງທ່ຽວ ທີ່ຍັງບໍ່ທັນມີເອກະສານດັ່ງກ່າວ ກໍ່ພຽງແຕ່ແຈ້ງຂໍ້ມູນສ່ວນຕົວໃຫ້ແກ່ ບໍລິສັດທ່ອງທ່ຽວ ກ່ອນມື້ຫນຶ່ງ ກໍ່ສາມາດເຮັດລະບຽບການສຳເລັດ. ໂດຍຮັບຮູ້ໄດ້ເຖິງຄວາມສາມາດບົ່ມຊ້ອນການທ່ອງທ່ຽວຂ້າມຊາຍແດນ, ແຂວງກາວບັ່ງ ພວມສ້າງທຸກເງື່ອນໄຂສະດວກໃຫ້ແກ່ບັນດາວິສາຫະກິດເຮັດບໍລິການທ່ອງທ່ຽວ ເພື່ອກໍ່ສ້າງ ແລະ ຂຸດຄົ້ນບັນດາສາຍທ່ອງທ່ຽວຂ້າມຊາຍແດນ. ທ່ານ ຫງວຽນກຽນເກື່ອງ, ຫົວຫນ້າຄະນະຄຸ້ມຄອງເຂດເສດຖະກິດ ແຂວງ ກາວບັ່ງ ໃຫ້ຮູ້ວ່າ:  “ແຂວງ ກາວບັ່ງ ພວມມຸ່ງໄປເຖິງການສ້າງບັນດາສາຍທ່ອງທ່ຽວຜ່ານຊາຍແດນ, ເວລາຫນ້ອຍສຸດກໍ່ແມ່ນໄປ ກັບ ໃນມື້. ຈາກເຂດດ່ານຊາຍແດນສາກົນ ຈ່າຫລິງ, ນັກທ່ອງທ່ຽວສາມາດໄປຢ້ຽມຢາມບັນດາສະຖານທີ່ທ່ອງທ່ຽວຢູ່ຫນອງ ທາງແຮນ ຫລື ບາງບ່ອນໃນຂອບເຂດ ທີ່ ສາມາດໄປ ກັບ ໃນມື້. ກົງກັນຂ້າມ ນັກທ່ອງທ່ຽວ ຫວຽດນາມ ກໍ່ສາມາດໄປຍັງ ຈີນ ແລະ ກັບເມືອໃນມື້ເລີຍ. ມາຮອດຈຸດເວລາປະຈຸບັນ ແຕ່ລະມື້ ລ້ວນແຕ່ມີລົດໂດຍສານຢູ່ໃນແຂວງ ແລະ ຕ່າງແຂວງ ມາຮອດດ່ານຊາຍແດນສາກົນ ຈ່າຫລິງ. ນັບແຕ່ເມື່ອໄດ້ຮັບການຍົກລະດັບຂຶ້ນເປັນດ່ານຊາຍແດນ ສາກົນ, ເລື່ອງໄປມາ ກໍ່ ສະດວກກວ່າກ່ອນນີ້ຫລາຍ” . ທິວທັດທຳມະຊາດສວຍງາມຢູ່ ແຂວງ ກາວບັ່ງ. ພາບ:VOV ບັນດາບໍລິສັດທ່ອງທ່ຽວ ລ້ວນແຕ່ຢັ້ງຢືນວ່າ ການທ່ອງທ່ຽວຂ້າມຊາຍແດນ ແມ່ນແຫລ່ງຊັບພະຍາກອນທີ່ມີມູນຄ່າ ແລະ ມີຄວາມສາມາດບົ່ມຊ້ອນທີ່ສຸດຂອງແຂວງ ກາວບັ່ງ. ທ່ານນາງ ຫງວຽນທິຫາຍນາມ ຜູ້ຕາງຫນ້າບໍລິສັດເຄີຍສະຫນອງ Tour ທ່ອງທ່ຽວໄປມາເຂດທ່ອງທ່ຽວທິວທັດທຳມະຊາດ ຖ້ຳ ບ້ານຢົກ (ຫວຽດນາມ) - ເຕີທຽນ ຂອງຈີນ ໃຫ້ຮູ້ວ່າ: ໄລຍະຈະມາເຖິງ ບໍລິສັດຄາດວ່າຈະເພີ່ມບັນດາສາຍທ່ອງທ່ຽວຂ້າມຊາຍແດນ ຊ່ວຍໃຫ້ນັກທ່ອງທ່ຽວສອງປະເທດ ໄດ້ໄປຢ້ຽມຊົມສະຖານທີ່ທ່ອງທ່ຽວທີ່ລືຊື່ຫລາຍແຫ່ງອື່ນອີກຂອງສອງຝ່າຍ ຫາກບໍ່ພຽງແຕ່ສຸມໃສ່ເຂດທິວທັດທຳມະຊາດ ບ້ານຢົກ - ເຕີທຽນ.  “ໄລຍະຜ່ານມາ ຈຳນວນນັກທ່ອງທ່ຽວໄປມາທ່ຽວລະຫວ່າງສອງປະເທດ ແມ່ນມີຄວາມເປັນປົກກະຕິ ສະເລ່ຍແຕ່ລະມື້ ມີ 1 -2 ຄະນະຂອງຫວຽດນາມໄປ ຈີນ ແລະ 2 ຄະນະນັກທ່ອງທ່ຽວ ຈີນ ມາຢ້ຽມຢາມ ຫວຽດນາມ. ບໍລິສັດພວກຂ້າພະເຈົ້າປາດຖະຫນາດຢາກສືບຕໍ່ໄດ້ຮັບຄວາມເອົາໃຈໃສ່ຂອງທ້ອງຖິ່ນກໍ່ຄືອຳນາດການປົກຄອງແຂວງ ກາວບັ່ງ ເພື່ອກໍ່ສ້າງບັນດາຜະລິດຕະພັນທ່ອງທ່ຽວໃຫມ່ຄື: ບ່ອນລະຫລິ້ນບັນເທິງ, ຊື້ເຄື່ອງຂອງ, ຈາກນັ້ນ ກໍ່ ສ້າງຄວາມດຶງດູດໃຫ້ແກ່ນັກທ່ອງທ່ຽວ” . ຂະແຫນງທ່ອງທ່ຽວ ແຂວງ ກາວບັ່ງ ພວມສືບຕໍ່ກຳນົດທິດການລົງທຶນ, ປະກາດໃຊ້ກົນໄກ, ນະໂຍບາຍ ເພື່ອແນໃສ່ຍາດແຍ່ງທ່າໄດ້ປຽບ, ຄວາມສາມາດບົ່ມຊ້ອນທີ່ມີຢູ່ແລ້ວ ເພື່ອພັດທະນາການທ່ອງທ່ຽວ. ບັນດາຄວາມມານະພະຍາຍາມນີ້ ໄດ້ປະກອບສ່ວນເພື່ອໃຫ້ການທ່ອງທ່ຽວຜ່ານຊາຍແດນກາຍເປັນທ່າແຮງຂອງທ້ອງຖິ່ນ.