ວັນ​ທີ 01 ເມ​ສາ, ທ່ານ Donald Trump ປະ​ທາ​ນາ​ທິ​ບໍ​ດີ ອາ​ເມ​ລິ​ກາ ໃຫ້​ຂໍ້​ສັງ​ເກດ​ວ່າ ການ​ປະ​ທະ​ກັນ ກັບ ອີ​ຣານ ອາດ​ຈະ​ສິ້ນ​ສຸດພາຍ​ໃນເວ​ລາ 2 – 3 ອາ​ທິດ​ຈະ​ມາ​ເຖິງ ແລະ ເລື່ອງ​ຮັບ​ປະ​ກັນ​ຄວາມປອດ​ໄພ​ໃຫ້​ແກ່​ເສັ້ນ​ທາງ​ຂົນ​ສົ່ງ​ນ້ຳ​ມັນ​ຜ່ານ​ຊ່ອງ​ແຄບ​ທະ​ເລ Hormuz ຈະ​ໂດຍ​ບັນ​ດາ​ປະ​ເທ​ດ​ອື່ນ​ຮັບ​ຜິດ​ຊອບ. ຄຳ​ຖະ​ແຫຼງ​ດັ່ງ​ກ່າວ ໂດຍ​ທ່ານ​ເຈົ້າ​ຂອງ​ທຳ​ນຽບ​ຂາ​ວ​ຍົກ​ອອກ​ມາ​ໃນ​ສະ​ພາບ​ການ​​ທີ່ນັບ​ມື້​ນັບ​ມີ​ຄວາມ​ວິ​ຕົກ​ກັງ​ວົນຫຼາຍ​​ຂຶ້ນວ່າ ສົງ​ຄາມ​ນີ້​ຈະ​ສົ່ງ​ຜົນ​ກະ​ທົບ​ຕໍ່​ລາ​ຄາ​ນ້ຳ​ມັນ ແລະ ໄພ​ເງິນ​ເຟີ້.         ໃນ​ການ​ຖະ​ແຫຼງ​ຂ່າວ​ຢູ່​ທຳ​ນຽບ​ຂາວ, ເມື່ອໃຫ້​ສຳ​ພາດ​ຕໍ່​ນັກ​ຂ່າວ​ກ່ຽວ​ກັບ​ແຜນ​ການ​ຫຼຸດ​ລາ​ຄາ​ນໍ້​າ​ມັນ​​ທີ່ພວມ​ຢູ່​ໃນ​ລະ​ດັບ​ສູງ ຍ້ອນ​ການ​ປະ​ທະ​ກັນ​ຂອງ ອາ​ເມ​ລິ​ກາ, ອິດ​ສະ​ຣາ​ແອັນ ແລະ ອີ​ຣານ ໄດ້​ກ້າວ​ເຂົ້າ​ສູ່​ເດືອນ​ທີ 2, ທ່ານ​ປະ​ທາ​ນາ​ທິ​ບໍ​ດີ Donald Trump ຊີ້​ແຈ້ງວ່າ: “ໝົດ​ທຸກ​ຢ່າງ​ທີ່​ຂ້າ​ພະ​ເຈົ້າ​ຕ້ອງ​ເຮັດ ແມ່ນ​ຖອນ​ອອກ​ຈາກ ອີ​ຣານ ແລະ ພວກ​ຂ້າ​ພະ​ເຈົ້າ ຈະ​ເຮັດ​ສິ່ງ​ເຫຼົ່າ​ນັ້ນ​ໃນ​ໄລ​ຍະ​ເວ​ລາ​ໄວ​ທີ່​ສຸດ”. ເຈົ້າ​ຂອງ​ທຳ​ນຽ​ບ​ຂາວ​ໃຫ້​ຂໍ້​ສັ​ງ​ເກດ​ວ່າ ເລື່ອງ​ຖອນ​ກຳ​ລັງ ຈະ​ດຳ​ເນີນ​ພາຍ​ໃນ​​ເວ​ລາ 2 – 3 ອາ​ທິດ​ຈະ​ມາ​ເຖິງ ແລະ​ ລ​າ​ຄາ​ນ້ຳ​ມັນ​ຈະຫຼຸດ​ລົງ​ຢ່າງ​ແຮງ.         ເມື່ອ​ຖືກ​ຖາມ​ວ່າ ອີ​ຣານ ຈະ​ຕ້ອງ​ບັນ​ລຸ​ໄດ້​ຂໍ້​ຕົກ​ລົງ​ເພື່ອ​ໃຫ້ ອາ​ເມ​ລິ​ກາ ຢຸດ​ຕິ​ບັ້ນ​ການ​ທະ​ຫານ​ດັ່ງ​ກ່າວຫຼື​ບໍ່​ນັ້ນ, ທ່ານ​ປະ​ທາ​ນາ​ທິ​ບໍ​ດີ Donald Trump ຢັ້ງ​ຢືນ​ວ່າ ອາ​ເມ​ລິ​ກາ ຈະ​ຖອນ​ກຳ​ລັງ ​ກໍ​ຕໍ່​ເມື່ອ​ຕີ​ລາ​ຄາ​ເຫັນ​ວ່າ ອີ​ຣານ ບໍ່​​ອາດ​ສາ​ມາດ​ພັດ​ທະ​ນາອ​າ​ວຸດ​ນິວ​ເຄຼຍ​ໄດ້​ອີກ, ບໍ່​ວ່າ ຈະບັນ​ລຸ​ໄດ້​ຂໍ້​ຕົກ​ລົງ​ຫຼື​ບໍ່.