យោងតាមមន្ត្រីអាមេរិកម្នាក់ ភាគីទាំងពីររក្សាបណ្តាញទំនាក់ទំនង និងសម្រេចបានវឌ្ឍនភាពខ្លះក្នុងកិច្ចខិតខំប្រឹងប្រែងដើម្បីស្វែងរកដំណោះស្រាយ។ នាយករដ្ឋមន្ត្រីប៉ាគីស្ថាន លោក Shehbaz Sharif ក៏បានបញ្ជាក់ថា កិច្ចខិតខំប្រឹងប្រែងផ្នែកការទូតកំពុងបន្ត។ លោក ត្រាំ បាននិយាយថា អ៊ីរ៉ង់បានទាក់ទង ហើយបានសម្តែងបំណងប្រាថ្នាចង់ឈានដល់កិច្ចព្រមព្រៀងមួយ ប៉ុន្តែលោកបានបញ្ជាក់ថា លោកនឹងមិនទទួលយកកិច្ចព្រមព្រៀងណាមួយដែលនឹងអនុញ្ញាតឱ្យទីក្រុងតេអេរ៉ង់មានអាវុធនុយក្លេអ៊ែរនោះទេ។ នៅថ្ងៃដដែលនោះ អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូទែរេស បានអំពាវនាវឱ្យសហរដ្ឋអាមេរិក និងអ៊ីរ៉ង់វិលត្រឡប់មកតុចរចាវិញ គោរពសេរីភាពនៃការធ្វើនាវាចរណ៍នៅច្រកសមុទ្រហ័រមូស ហើយបានសង្កត់ធ្ងន់ថា មិនមានដំណោះស្រាយយោធាចំពោះជម្លោះនៅមជ្ឈិមបូព៌ាទេ។ ក្នុងកិច្ចខិតខំប្រឹងប្រែងដាច់ដោយឡែកពីគ្នាដើម្បីបន្ធូរបន្ថយភាពតានតឹង នៅថ្ងៃដដែលនោះ ប្រធានាធិបតីបារាំង លោក Emmanuel Macron បានប្រកាសថា បារាំង និងចក្រភពអង់គ្លេសនឹងសម្របសម្រួល «បេសកកម្មសន្តិភាពពហុជាតិ» ដើម្បីស្តារចរាចរណ៍ឆ្លងកាត់ច្រកសមុទ្រហ័រមូស ប៉ុន្តែដាច់ដោយឡែកពីភាគីប្រយុទ្ធ។ ថ្នាក់ដឹកនាំបារាំងរូបនេះបានសង្កត់ធ្ងន់ថា នេះគឺជាបេសកកម្មការពារ ដែលដាច់ដោយឡែកពីភាគីប្រយុទ្ធ ហើយនឹងត្រូវបានដាក់ពង្រាយឱ្យបានឆាប់តាមដែលលក្ខខណ្ឌអនុញ្ញាត។ នៅថ្ងៃទី ១៣ ខែមេសា ឯកអគ្គរដ្ឋទូតអ៊ីរ៉ង់ប្រចាំនៅឥណ្ឌាបានបញ្ជាក់ថា ប្រទេសខ្លួន មិនដាក់ថ្លៃសេវាណាមួយលើនាវាដឹកប្រេងឥណ្ឌាដែលឆ្លងកាត់ច្រកសមុទ្រហ័រមូសនោះទេ៕