ផ្ទាំងរូបភាពសម្រាប់ការបោះឆ្នោតសកលបីដំណាក់កាលនៅក្នុងប្រទេសមីយ៉ាន់ម៉ានៅចុងឆ្នាំ ២០២៥ និងដើមឆ្នាំ ២០២៦ (រូបថត៖ VOV-Bangkok) នៅក្នុងដំណាក់កាលទី ១ ប្លុកសភាសំខាន់ៗទាំងបី គឺសភាជាន់ទាប ព្រឹទ្ធសភា និងប្លុកតំណាងយោធា នឹងតែងតាំងបេក្ខជនម្នាក់សម្រាប់តំណែងអនុប្រធានាធិបតី។ បន្ទាប់មក សភាទាំងមូលនឹងបោះឆ្នោតជ្រើសរើសបេក្ខជនម្នាក់ក្នុងចំណោមបេក្ខជនទាំងបីនេះ សម្រាប់កាន់ដំណែងប្រធានាធិបតី; បេក្ខជនពីរនាក់ទៀតនឹងកាន់តួនាទីជាអនុប្រធានាធិបតី។ មុននោះ សភាមីយ៉ាន់ម៉ាបានបើកសម័យប្រជុំលើកដំបូងរបស់ខ្លួនចាប់តាំងពីឆ្នាំ ២០២១មក ដើម្បីពង្រឹងតំណែងថ្នាក់ដឹកនាំសំខាន់ៗ។ យោងតាមវិទ្យុ និងទូរទស្សន៍មីយ៉ាន់ម៉ា (MRTV) លោក Khin Yi ប្រធានគណបក្សសាមគ្គីភាព និងអភិវឌ្ឍន៍សហភាព (USDP) ត្រូវបានជ្រើសរើសជាប្រធានសភាជាន់ទាប។ លោក Aung Lin Dwe ប្រតិភូ USDP មកពីតំបន់ Mandalay ត្រូវបានជ្រើសរើសជាប្រធានព្រឹទ្ធសភា។ ស្របនឹងដំណើរការនីតិបញ្ញត្តិ ថ្នាក់ដឹកនាំយោធាមីយ៉ាន់ម៉ាក៏កំពុងរៀប ចំសម្រាប់ការផ្លាស់ប្តូរផងដែរ។ ឧត្តមសេនីយ៍ Min Aung Hlaing ត្រូវបានគេរំពឹងថានឹងចុះចេញពីតំណែងជាអគ្គមេបញ្ជាការនៃកងកម្លាំងប្រដាប់អាវុធនៅចុងខែនេះ បន្ទាប់ពីបានចូលរួមក្បួនដង្ហែរទិវាកងកម្លាំងប្រដាប់អាវុធនៅថ្ងៃទី ២៧ ខែមីនា ការវិវឌ្ឍទាំងនេះត្រូវបានអ្នកសង្កេតការណ៍ចាត់ទុកថា ជាព្រឹត្តិការណ៍សំខាន់មួយ ដែលបើកផ្លូវសម្រាប់ការបង្កើតរដ្ឋាភិបាលសហព័ន្ធថ្មី និងបង្កើតមាគ៌ានយោបាយបន្ទាប់សម្រាប់ប្រទេសមីយ៉ាន់ម៉ានៅក្នុងអាណត្តិខាងមុខ៕