ບັນດາການປະຕິຮູບຢ່າງຕໍ່ເນື່ອງໃນຂົງເຂດຊັບສິນທາງປັນຍາໃຫ້ເຫັນວ່າ ຫວຽດນາມ ບໍ່ພຽງແຕ່ໄດ້ຕອບສະໜອງຄຳຮຽກຮ້ອງເຊື່ອມຕົວເຂົ້າກັບສາກົນເທົ່ານັ້ນ, ຫາກຍັງໄດ້ເປັນເຈົ້າການສ້າງລະບົບຊີວະພາບນິຕິກຳອີກດ້ວຍ ເພື່ອແນໃສ່ຫັນຊັບສິນທາງພູມປັນຍາກາຍເປັນແຫຼ່ງກຳລັງພັດທະນາເສດຖະກິດ - ສັງຄົມອີກດ້ວຍ.
ສ້າງລະບອບລະບຽບການໃຫ້ສົມບູນແບບ ແລະ ເພີ່ມທະວີຄວາມສາມາດປະຕິບັດ
ກົດໝາຍສະບັບປັບປຸງເພີ່ມເຕີມບາງຂໍ້ມາດຕາຂອງກົດໝາຍວ່າດ້ວຍຊັບສິນທາງປັນຍາ ປີ 2025 (ມີຜົນບັງຄັບໃຊ້ນັບແຕ່ວັນທີ 1 ເມສາ ປີ 2026) ເປັນຂີດໝາຍແຫ່ງບາດກ້າວຫັນປ່ຽນສຳຄັນ ເມື່ອສືບຕໍ່ໄດ້ວາງຈຸດສຸມເຂົ້າໃນການປະຕິຮູບລະບຽບການບໍລິຫານ ແລະ ຊຸກຍູ້ການຫັນເປັນດີຈີຕອນ ໃນການເຄື່ອນໄຫວຊັບສິນທາງປັນຍາ; ບໍ່ພຽງແຕ່ສຸມໃສ່ການປົກປ້ອງເທົ່ານັ້ນ, ຫາກຍັງໄດ້ເປີດກວ້າງອອກໄປການຂຸດຄົ້ນ ແລະ ຫັນຊັບສິນດ້ານພູມປັນຍາເປັນການຄ້າອີກດ້ວຍ. ທ່ານ ຫງວຽນຮວ່າງຢາງ ຮອງຫົວໜ້າກົມຊັບສິນທາງປັນຍາ, ກະຊວງອຸດສາຫະກຳ ການຄ້າ ຫວຽດນາມ ໃຫ້ຮູ້ວ່າ:
ກົດໝາຍວ່າດ້ວຍຊັບສິນທາງປັນຍາໄດ້ເພີ່ມເຕີມບັນດາມາດຕະການ ແລະ ຂໍ້ກຳນົດພົນລະເຮືອນ. ລະອຽດຄື ໄດ້ອະນຸຍາດໃຫ້ສານອອກຄຳຕັດສິນບັງຄັບການຍຸບເລີກ, ປິດຊ້ອນ ຫຼືສະກັດກັ້ນການເຂົ້າເຖິງເນື້ອໃນທີ່ລະເມີດທາງອິນເຕີເນັດ; ອອກຄຳຕັດສິນໂດຍຊົ່ວຄາວ ປິດການໃຊ້ງານ ບໍ່ໃຫ້ເຂົ້າຂໍ້ມູນ, ເນື້ອໃນ, ບັນຊີ, ເວັບໄຊ, ໂປຼແກຼມ ຫຼືລະຫັດທີ່ຢູ່ອິນເຕີເນັດທີ່ກ່ຽວຂ້ອງເຖິງການກະທຳແຊກແຊງ ດ້ວຍບັນດາມາຕະການຮີບດ່ວນຊົ່ວຄາວ.
ໃນຂະນະນັ້ນ, ວຽກງານປະຕິບັດສິດຊັບສິນທາງປັນຍາກໍ່ສືບຕໍ່ໄດ້ຮັບການເພີ່ມທະວີ. ໃນເດືອນກຸມພາ ປີ 2026, ທ່ານນາຍົກລັດຖະມົນຕີ ໄດ້ປະກາດໃຊ້ຄຳສັ່ງເລກທີ 02 (02/CT-TTg ) ກ່ຽວກັບການເພີ່ມທະວີການປະຕິບັດສິດຊັບສິນທາງປັນຍາ. ທ່ານ ເລຮູຍແອັງ, ຮອງຫົວໜ້າກົມຊັບສິນທາງປັນຍາ ກະຊວງອຸດສາຫະກຳ ການຄ້າ ຫວຽດນາມ ເນັ້ນໜັກວ່າ:
ຖ້າຫາກວ່າພວກເຮົາເຮັດວຽກງານກຳນົດສິດເປັນຢ່າງດີ ແຕ່ວຽກງານປະຕິບັດບໍ່ໄດ້ດີ ຈະເຮັດໃຫ້ຫລຸດຄຸນຄ່າຊັບສິນທາງພູມປັນຍາລົງ. ດັ່ງນັ້ນ, ການເຄື່ອນໄຫວຕ້ານການແຊກແຊງສິດຊັບສິນທາງປັນຍາແມ່ນການເຄື່ອນໄຫວສຳຄັນທີ່ສຸດ ເພື່ອຊຸກຍູ້ການພັດທະນາວິທະຍາສາດເຕັກໂນໂລຊີ ແລະ ນະວັດຕະກຳ ແລະ ເຮັດໃຫ້ສະພາລແວດລ້ອມດຳເນີນທຸລະກິດໂປ່ງໃສກວ່າ.
ບັນດາຄວາມຄືບໜ້າທີ່ຈະແຈ້ງ
ຕົວຈິງໃຫ້ເຫັນວ່າ ຫວຽດນາມ ບັນລຸໄດ້ຫຼາຍໝາກຜົນທີ່ຈະແຈ້ງໃນການປົກປ້ອງ ແລະ ປະຕິບັດສິດຊັບສິນທາງປັນຍາ. ໄລຍະ 2021-2025, ຫວຽດນາມ ຮັບໃບຄຳຮ້ອງຂໍກຳມະສິດຊັບສິນທາງອຸດສາຫະກຳ 423.000 ສະບັບ, ແກ້ໄຂກວ່າ 436.000 ສະບັບ ແລະ ສະໜອງເອກະສານປົກປ້ອງກວ່າ 255.000 ສະບັບ, ເພີ່ມຂຶ້ນຫຼາຍເມື່ອທຽບກັບໄລຍະກ່ອນ. ຈຳນວນໃບຄຳຮ້ອງຂໍປະດິດສ້າງພາຍໃນປະເທດມີຄວາມເຕີບໂຕທີ່ຕັ້ງໜ້າຜ່ານແຕ່ລະປີ ໄດ້ພວມສ່ອງແສງຄວາມສາມາດທາງນະວັດຕະກຳພາຍໃນທີ່ນັບມື້ນັບໄດ້ຮັບການປົວແປງ ແລະ ໄດ້ຫັນເປັນຊັບສິນທາງພູມປັນຍາທີ່ມີມູນຄ່າເສດຖະກິດຕົວຈິງເທື່ອລະກ້າວ.
ໃນການເຂົ້າເຖິງກັບຕ່າງປະເທດ, ຍາມໃດ ຫວຽດນາມ ກໍ່ສະແດງນ້ຳໃຈເປີດອົກເປີດໃຈ ແລະ ຮ່ວມມື ຄືດັ່ງຄຳຢືນຢັນຂອງ ທ່ານນາງ ຟ້າມທູຮັ່ງ, ໂຄສົກກະຊວງການຕ່າງປະເທດ ຫວຽດນາມ ທີ່ວ່າ:
ໃນໄລຍະຜ່ານມາ, ຍາມໃດ ຫວຽດນາມ ກໍ່ມານະພະຍາຍາມຢ່າງສຸດຂີດ ໃນການປົກປ້ອງ ຊັບສິນທາງປັນຍາ ນັບທັງໃນການສ້າງລະບົບຂໍ້ກຳນົດໃຫ້ສົມບູນແບບ, ຍົກສູງສະຕິຄວາມຮັບຮູ້ຂອງ ປຊຊ, ເພີ່ມທະວີການຮ່ວມມືສາກົນ ກັບອົງການ ຊັບສິນທາງປັນຍາໂລກ (WIPO), ອາເມລິກາ ແລະ ຫຼາຍປະເທດອື່ນ; ເດັດດ່ຽວຕ້ານ, ແກ້ໄຂບັນດາການລະເມີດຊັບສິນທາງປັນຍາຢ່າງເຂັ້ມງວດ. ນີ້ທັງແມ່ນການບຸລິມະສິດສູງ, ທັງແມ່ນແຜນນະໂຍບາຍ, ນະໂຍບາຍລຸລ່ວງຂອງ ຫວຽດນາມ ເພື່ອແນໃສ່ສ້າງສະພາບແວດລ້ອມແຫ່ງການດຳເນີນທຸລະກິດທີ່ໂປ່ງແຈ້ງ ແລະ ຫັນປ່ຽນຮູບແບບການເຕີບໂຕ ຖືວິທະຍາສາດ-ເຕັກໂນໂລຊີ, ນະວັດຕະກຳ ເປັນກຳລັງໜູນຕົ້ນຕໍ.
ຫວຽດນາມ ພວມຢູ່ໃນວິວັດທະນາການສ້າງລະບົບຊັບສິນທາງປັນຍາໃຫ້ສົມບູນແບບຕາມທິດທັນສະໄຫມ, ຄົບຊຸດ ແລະ ເຊື່ອມໂຍງ. ໃນສະພາບການແກ່ງແຍ້ງທົ່ວໂລກນັບມື້ນັບຂ້ຽວຂາດ ແລະ ເສດຖະກິດດີຈີຕອນໄດ້ພັດທະນາຢ່າງໄວວານັ້ນ, ບັນດາການເໜັງຕິງນີ້ ບໍ່ພຽງແຕ່ໄດ້ຕອບສະໜອງຄຳຮຽກຮ້ອງເຊື່ອມໂຍງຂອງ ຫວຽດນາມ ເທົ່ານັ້ນ, ຫາກຍັງໄດ້ປະກອບສ່ວນຍົກສູງຄວາມສາມາດພາຍໃນ, ປັບປຸງສະພາບແວດລ້ອມດຳເນີນທຸລະກິດທີ່ໂປ່ງແຈ້ງ, ຍືນຍົງ ແລະ ຊຸກຍູ້ນະວັດຕະກຳອີກດ້ວຍ./.
