ໂນນແປກແຫ່ງນີ້ ໄດ້ຮັບການຮັບຮອງຈາກຄະນະກຳມະການປະຊາຊົນແຂວງ ລາຍເຈົາ ແມ່ນສະຖານທີ່ທ່ອງທ່ຽວລະດັບແຂວງ ເມື່ອທ້າຍ ປີ 2025 ອັນໄດ້ສ້າງຜະລິດຕະພັນທ່ອງທ່ຽວທີ່ເປັນເອກະລັກຕື່ມອີກໃຫ້ແກ່ທ້ອງຖິ່ນ.
ໃນ 6 ເດືອນຕົ້ນປີ 2025 ຂະແໜງທ່ອງທ່ຽວແຂວງ ລາຍເຈົາ ສືບຕໍ່ຮັກສາທ່າເຕີບໂຕທີ່ດີ. ທາງແຂວງໄດ້ຕ້ອນຮັບແຂກທ່ອງທ່ຽວເກືອບ 1.000.000 ເທື່ອຄົນ ເພີ່ມຂຶ້ນເກືອບ 12% ເມື່ອທຽບໃສ່ໄລຍະດຽວກັນຂອງປີກາຍ. ລາຍຮັບຈາກການເຄື່ອນໄຫວທ່ອງທ່ຽວຄາດວ່າຈະບັນລຸ 858 ຕື້ກວ່າດົ່ງ ເພີ່ມຂຶ້ນເກືອບ 20%. ໝາກຜົນນີ້ໄດ້ສະແດງໃຫ້ເຫັນກຳລັງດຶງດູດທີ່ນັບມື້ນັບໃຫຍ່ຫຼວງຂອງບັນດາຜະລິດຕະພັນທ່ອງທ່ຽວທຳມະຊາດ, ທ່ອງທ່ຽວຊຸມຊົນ ແລະ ການຄົ້ນຫາທຳມະຊາດ ໃນນັ້ນມີໂນນແປກ ທານອວຽນ, ໂນນແປກ ເລິມບ້ານຈິດ…
ຢູ່ຈອມໂນນມຸ່ງສາຍຕາໄປໄກ, ທັດຊະນີຍະພາບທັງໝົດຂອງເຂດໃຈກາງ ທານອວຽນ ໄດ້ປາກົດຂຶ້ນຢ່າງສວຍງາມໃຕ້ຮ່ອມພູ. ຢູ່ໄກແມ່ນທົ່ງນາ ເມື່ອງທານ ທີ່ກວ້າງໃຫຍ່ ເຊິ່ງແມ່ນໜຶ່ງໃນບັນດາທົ່ງນາທີ່ສວຍງາມທີ່ສຸດໃນເຂດ ເຕິຍບັກ ອັນໄດ້ສ້າງຮູບພາບທຳມະຊາດທີ່ເຕັມໄປດ້ວຍພະລັງຊີວິດ. ນາງ ຫວ່າງກີມຫ້ຽວ ຜູ້ຄຸ້ມຄອງສະຖານທີ່ທ່ອງທ່ຽວໂນນແປກ ທານອວຽນ ເປີດເຜີຍວ່າ:
“ເມື່ອແຂກທ່ອງທ່ຽວມານີ້ ຈະໄດ້ຄົ້ນຫາແຖວຕົ້ນແປກຂຽວອຸ່ມທຸ່ມ. ນອກຈາກນັ້ນພວກຂ້າພະເຈົ້າກໍ່ຍັງມີລະບົບເຮືອນພັກຊັ້ນດຽວ ອອກແບບຕາມ ເອີຣົບ. ນອກຈາກຕົ້ນແປກແລ້ວ ແຂກທ່ອງທ່ຽວມານີ້ ຍັງມີສວນດອກໄມ້ເພື່ອຖ່າຍຮູບເປັນທີ່ລະນຶກ, ມີອ່າງລ້ຽງປາ, ແຂກທ່ອງທ່ຽວຈະໄດ້ເຂົ້າຮ່ວມເກືອປາ, ສຳລັບເດັກນ້ອຍຈະໄດ້ຂີ່ຊິງຊາຢ່າງມ່ວນຊື່ນ“
ໃນຊຸມມື້ທ້າຍອາທິດ, ແຕ່ລະກຸ່ມເພື່ອນໜຸ່ມ, ບັນດາຄອບຄົວ ແລະ ນັບທັງແຂກທ່ອງທ່ຽວຕ່າງປະເທດກໍ່ລ້ວນແຕ່ຊອກມານີ້ ເພື່ອພັກຜ່ອນຢ່ອນອາລົມ ຕັ້ງຄ້າຍ ຫຼື ນັ່ງພັກຜ່ອນຢູ່ກ້ອງຮົ່ມເຢັນຂອງຕົ້ນແປກ ເພື່ອດື່ມກາເຟ ໃນທ່າມກາງອາກາດເຢັນສະບາຍ. ນາງ ເຈິນທິຮົ່ງ ແຂກທ່ອງທ່ຽວມາຈາກ ຮ່າໂນ້ຍ ເປີດເຜີຍວ່າ:
“ເປັນຄັ້ງທຳອິດທີ່ໄດ້ມາຢາມ ທານອວຽນ ເຮົາກໍ່ຄິດວ່າອາກາດຢູ່ທທີ່ນີ້ເຢັນສະບາຍທີ່ສຸດ. ທຳມະຊາດໃກ້ຊິດສະໜິດສະໜົມກັບມະນຸດ”.
ສິ່ງທີ່ສ້າງກຳລັງດຶງດູດໃຈຂອງໂນນແປກ ບໍ່ພຽງແຕ່ໃນທິວທັດທຳມະຊາດທີ່ສວຍງາມເທົ່ານັ້ນ ຫາກຍັງຢູ່ໃນຄວາມຮູ້ສຶກສະຫງົບສຸກຍາກທີ່ຈະຫາໄດ້ຢູ່ແຫ່ງໃດ. ບໍ່ມີສຽງບີບແກຂອງລົດ ບໍ່ມີຄວັນຄືຢູ່ເຂດຕົວເມືອງ, ມີພຽງແຕ່ສຽງລົມພັດ ສຽງນົກຮ້ອງ ແລະ ກິ່ນຫອມຫວນຂອງຕົ້ນໄມ້ໃບຫຍ້າເທົ່ານັ້ນ.
ຢູແຫ່ງນີ້ຍັງແມ່ນບ່ອນທີ່ຈັບໃຈ ເພື່ອໃຫ້ແຂກທ່ອງທ່ຽວຕ້ອນຮັບແສງອາລຸນໃໝ່ໃນຊຸມວັນອາກາດດີ ຫຼື ຈະໄດ້ຖ່າຍຮູບທີ່ລະລຶກຢູ່ເຂດພູຜາປ່າໄມ້ ເຕິຍບັກ, ເພື່ອນ ນົງອຽນຍີ ມາຈາກນະຄອນ ລາຍເຈົາ ຕີລາຄາວ່າ:
“ມາທ່ຽວຢູ່ໂນນແປກ ທານອວຽນ ຂ້າພະເຈົ້າເຫັນວ່າຢູ່ແຫ່ງນີ້ມີທິວທັດທຳມະຊາດງົດງາມ, ອາກາດປອດໂປ່ງ ໃສສະອາດ. ຂ້າພະເຈົ້າໄດ້ຖ່າຍຮູບທິວທັດທີ່ງົດງາມຫຼາຍຮູບຢູ່ແຫ່ງນີ້. ຂ້າພະເຈົ້າຮູ້ສຶກວ່າ ໂນນແປກ ທານອວຽນ ງົດງາມທີ່ສຸດ”.
ຖ້າຫາກມີໂອກາດມາຢາມແຂວງ ລາຍເຈົາ ຈົ່ງສະຫງວນຕອນເຊົ້າ ຫຼື ຕອນແລງໃນມື້ໜຶ່ງ ເພື່ອແວ່ຢາມໂນນແປກ ທານອວຽນ ເພື່ອໄດ້ຟັງສຽງລົມພັດຢູ່ທ່າມກາງເຂດພູຜາປ່າໄມ້, ໄດ້ຮັບຊົມກຸ່ມເມກເລື່ອນລອຍຕາມໂນນພູ ແລະ ຈະໄດ້ຮູ້ສຶກກ່ຽວກັບເຂດ ເຕິຍບັກ ທີ່ແຕກຕ່າງສະຫງົບສຸກ ແຕ່ມີກຳລັງຢ່າງພຽງພໍ ເຮັດໃຫ້ຜູ້ຄົນທັງຫຼາຍຢາກກັບຄືນມາຢາມອີກຫຼາຍຄັ້ງ.
