ນັ້ນແມ່ນການແບ່ງປັນຂອງທ່ານພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ ຢູ່ພິທີສະເຫຼີມສະຫຼອງ 75 ປີແຫ່ງວັນມູນເຊື້ອທະຫານອາສາສະໝັກ ແລະ ນັກຊ່ຽວຊານການທະຫານຫວຽດນາມ ຢູ່ລາວ (30-10-1949 ຫາ 30-10-2024) ທີ່ໄດ້ຈັດຂຶ້ນຢູ່ຮ່າໂນ້ຍ ໃນໄລຍະຜ່ານມາ. ຢູ່ພິທີ, ບັນດາທະຫານອາສາສະໝັກ, ນັກຊ່ຽວຊານການທະຫານຫວຽດນາມ ຢູ່ລາວ ໄດ້ພ້ອມກັນຫວມຄືນບັນດາຄວາມຊົງໃຈທີ່ສະຫງ່າອົງອາດ... ໃນຍຸກຕໍ່ສູ້ຕ້ານພວກຫົວເມືອງຂຶ້ນຝລັ່ງ, ທະຫານອາສາສະໝັກຫວຽດນາມ ໄດ້ມີໜ້າຢູ່ທຸກບັ້ນຮົບລາວ ນັບແຕ່ຊຳເໜືອ, ຊຽງຂວາງ ຕະຫຼອດຮອດ ຜົ້ງສາລີ. ເຂົາເຈົ້າໄດ້ຕໍ່ສູ້, ແບ່ງປັນບົດຮຽນປະສົບການ, ຝືກຊ້ອມໃຫ້ກຳລັງປະກອບອາວຸດລາວ, ສ້າງຖານທີ່ໝັ້ນຢ່າງໝັ້ນແກ່ນ. ຫຼືໃນການຕໍ່ສູ້ຕ້ານພວກຈັກກະພັດ ອາເມລິກາ, ທະຫານອາສາສະໝັກຫວຽດນາມ ສືບຕໍ່ໜູນຊ່ວຍກຳລັງປະເທດລາວ ໃນບັນດາບັ້ນຮົບໃຫຍ່ຄື ບັ້ນຮົບປົດປ່ອຍທົ່ງໄຫຫີນ - ຊຽງຂວາງ, ປະກອບສ່ວນຕັດສິນໃຈເຂົ້າໃນໄຊຊະນະລວມໃນປີ 1975. ທ່ານພົນເອກ ຟານວັນຢາງ ກຳມະການກົມການເມືອງ, ຮອງເລຂາຄະນະພັກກອງທັບສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໃຫ້ຮູ້ວ່າ: ບັນດາວິລະກຳ, ຜົນງານ ແລະ ການເສຍສະຫຼະຂອງທະຫານອາສາສະໝັກ ແລະ ນັກຊ່ຽວຊານການທະຫານ ຫວຽດນາມ ໄດ້ສ້າງເປັນນ້ຳໃຈຢ່າງເລິກເຊິ່ງ ແລະ ຄວາມເຄົາລົບນັບຖືພິເສດໃນໃຈຂອງປະຊາຊົນລາວບັນດາເຜົ່າ, ຖືກກັບຄຳຍ້ອງຍໍສັນລະເສີນຂອງການນຳພັກ, ລັດ ແລະ ປະຊາຊົນລາວ: “ໃນດິນແດນລາວ, ບໍ່ມີບ່ອນໃດບໍ່ມີຮອຍຕີນຂອງທະຫານອາສາສະໝັກຫວຽດນາມ, ບໍ່ມີໄຊຊະນະໃດບໍ່ມີການເສຍສະຫຼະ, ການປະກອບສ່ວນຂອງທະຫານອາສາສະໝັກ ຫວຽດນາມ”.