 លោកនាយករដ្ឋមន្ត្រី ហ្វាម មិញជីញ ថ្លែងនៅក្នុងកិច្ចប្រជុំ។ រូបថត៖ VOV |
នៅក្នុងកិច្ចប្រជុំនេះ នាយករដ្ឋមន្ត្រីលោក ហ្វាម មិញជីញ បានសង្កត់ធ្ងន់ថា លោកអគ្គលេខាបក្ស តូ ឡឹម បានបញ្ជាក់យ៉ាងច្បាស់ថា សប្តាហ៍ជាន់ខ្ពស់ APEC ឆ្នាំ២០២៧ នៅ Phu Quoc គឺជាព្រឹត្តិការណ៍ការទូតកម្រិតខ្ពស់ ដែលមានសារៈសំខាន់ពិសេស ជាឱកាសដ៏កម្រមួយដើម្បីផ្សព្វផ្សាយរូបភាពរបស់វៀតណាមទៅកាន់ពិភពលោក ដែលជាប្រទេសសមាហរណកម្ម ច្នៃប្រឌិត រួសរាយរាក់ទាក់ និងស្វាហាប់; បង្កើតកម្លាំងចលករដ៏រឹងមាំសម្រាប់ការអភិវឌ្ឍតំបន់ពិសេស Phu Quoc និងខេត្តអានយ៉ាង ជំរុញការវិនិយោគ ទេសចរណ៍ ពាណិជ្ជកម្ម និងហេដ្ឋារចនាសម្ព័ន្ធនៅទូទាំងតំបន់ដីសណ្តទន្លេ Cuu Long និងប្រទេសទាំងមូល ។ លោកនាយករដ្ឋមន្ត្រីបានចាត់ទុកថា ការរៀបចំសន្និសីទ APEC ២០២៧ ដោយជោគជ័យនៅ Phu Quoc មិនត្រឹមតែជាមោទនភាពសម្រាប់ខេត្តអានយ៉ាងប៉ុណ្ណោះទេ ថែមទាំងដើរតួនាទីយ៉ាងសំខាន់ក្នុងការលើកកម្ពស់តួនាទីអន្តរជាតិរបស់វៀតណាមនៅក្នុងយុគសម័យនៃការធ្វើសមាហរណកម្មយ៉ាងស៊ីជម្រៅ និងការប្រកួតប្រជែងសកលផងដែរ។ ទាក់ទងនឹងប្រធានបទ និងសារនៃសន្និសីទលើកនេះ នាយករដ្ឋមន្ត្រីលោក ហ្វាម មិញជីញ បានស្នើថា៖
"ស្រាវជ្រាវកត្តាដូចជា៖ សាមគ្គីភាព ការអភិវឌ្ឍប្រកបដោយចីរភាព ការផ្លាស់ប្តូរឌីជីថល ការផ្លាស់ប្តូរបៃតង សន្តិសុខ សុវត្ថិភាព សុខុមាលភាព វិទ្យាសាស្ត្រនិងបច្ចេកវិទ្យា មូលដ្ឋានទិន្នន័យ បញ្ញាសិប្បនិម្មិត ប្រជាជនជាចំណុចកណ្ដាលនិងជាម្ចាស់កម្មវត្ថុ។ ល។ ដោយផ្អែកលើមូលដ្ឋាននោះ ត្រូវព្យាករណ៍ការវិវឌ្ឍន៍នៃស្ថានភាព ដើម្បីដាក់បញ្ចូលទៅក្នុងប្រធានបទឲ្យបានសមស្រប នៅឆ្នាំ ២០២៧។ ប្រធានបទ និងសារនៃសន្និសីទត្រូវតែប្រមូលផ្តុំកម្លាំង បង្ហាញពីកម្រិតបញ្ញា បញ្ជាក់ពីតួនាទីនិងសារៈសំខាន់របស់ប្រទេសជាតិក្នុងការរៀបចំសប្តាហ៍ជាន់ខ្ពស់ APEC ឆ្នាំ២០២៧”។
លោកនាយករដ្ឋមន្ត្រីបានចាត់ទុកថា ត្រូវតែឆ្លៀតឱកាសធ្វើជាម្ចាស់ផ្ទះសន្និសីទ APEC ឆ្នាំ ២០២៧ ដើម្បីផ្សព្វផ្សាយរូបភាពប្រទេសវៀតណាមដែលមានទំនុកចិត្ត ខ្លួនទីពឹងខ្លួន ឯករាជ្យ សន្តិភាព អរិយធម៌ វប្បធម៌ រួសរាយរាក់ទាក់ និងស្មោះត្រង់៕
