ថ្លែងនៅក្នុងការិយាល័យអូវ៉ាល់ លោកប្រធានាធិបតី ដុណាល ត្រាំ បានឲ្យដឹងថា សហរដ្ឋអាមេរិកកំពុងចរចាជាមួយអ៊ីរ៉ង់ ទោះបីជាប្រទេសនេះមិនទាន់បានបញ្ជាក់ពីកិច្ចចរចាជាផ្លូវការណាមួយក៏ដោយ។ លោក ដូណាល ត្រាំ បានបង្ហាញថា អ៊ីរ៉ង់បានផ្ញើ «អំណោយដ៏ធំ» គឺការបន្ធូរបន្ថយការបិទច្រកសមុទ្រ Hormuz ដែលជាច្រកទ្វារសម្រាប់ ១/៥នៃការដឹកចិញ្ជូនប្រេងរបស់ពិភពលោក។
ផែនការសន្តិភាព ១៥ ចំណុចរបស់លោក ដូណាល ត្រាំ បានសង្កត់ធ្ងន់លើលក្ខខណ្ឌជាមុនថា អ៊ីរ៉ង់មិនធ្វើជាម្ចាស់កម្មសិទ្ធិអាវុធនុយក្លេអ៊ែរឡើយ។ ប៉ុស្តិ៍ទូរទស្សន៍ Channel១២ របស់អ៊ីស្រាអែលបានរាយការណ៍ថា លោក ត្រាំ បានស្នើឱ្យមានបទឈប់បាញ់រយៈពេលមួយខែ ដើម្បីអនុញ្ញាតឱ្យភាគីទាំងពីរពិភាក្សាអំពីការប្រគល់អ៊ុយរ៉ាញ៉ូមចម្រាញ់របស់អ៊ីរ៉ង់ និងបញ្ឈប់សកម្មភាពចម្រាញ់នុយក្លេអ៊ែរបន្ថែមទៀត។ ជាថ្នូរទៅវិញ សហរដ្ឋអាមេរិកអាចដកទណ្ឌកម្មទាំងអស់ និងជួយឧបត្ថម្ភដល់ការអភិវឌ្ឍថាមពលនុយក្លេអ៊ែរស៊ីវិល នៅរោងចក្រ Bushehr របស់អ៊ីរ៉ង់៕
