សេណារីយ៉ូដែលកំពុងត្រូវបានពិចារណា អាចមានទំហំធំជាងការវាយប្រហារតាមជើងអាកាសរយៈពេល ១២ ថ្ងៃកាលពីខែមិថុនា ឆ្នាំមុន រវាងសហរដ្ឋអាមេរិក អ៊ីស្រាអែល និងអ៊ីរ៉ង់។
នាថ្ងៃទី ១៥ ខែកុម្ភៈ ប្រព័ន្ធផ្សព្វផ្សាយអាមេរិកបានរាយការណ៍ថា ប្រតិបត្តិការនេះអាចរួមបញ្ចូលគោលដៅនៅខាងក្រៅរោងចក្រនុយក្លេអ៊ែរ ដោយតំរង់ទៅលើគ្រឹះស្ថានរដ្ឋ និងសន្តិសុខអ៊ីរ៉ង់។ មន្ត្រីម្នាក់បាននិយាយថា សហរដ្ឋអាមេរិក "រំពឹងថានឹងមានការសងសឹកពីអ៊ីរ៉ង់" ដែលមានន័យថា ជម្លោះទំនងជានឹងអូសបន្លាយជាមួយនឹងការតបតគ្នាទៅវិញទៅមក។
នាថ្ងៃដដែល ទីភ្នាក់ងារសារព័ត៌មាន CBS News របស់អាមេរិកបានរាយការណ៍ថា ប្រធានាធិបតីអាមេរិក លោក ដូណាល់ ត្រាំ អាចបានជូនដំណឹងដល់នាយករដ្ឋមន្ត្រីអ៊ីស្រាអែល លោក ប៊ែនចាមីន ណេតាន់យ៉ាហ៊ូ ថា លោកគាំទ្រចំពោះការវាយប្រហាររបស់អ៊ីស្រាអែលទៅលើកម្មវិធីមីស៊ីលផ្លោងរបស់អ៊ីរ៉ង់ ប្រសិនបើការចរចានុយក្លេអ៊ែររវាងទីក្រុងវ៉ាស៊ីនតោន និងទីក្រុងតេអេរ៉ង់ទទួលបរាជ័យ៕
