សហរដ្ឋអាមេរិកអះអាងថា នឹងមិនដាក់ពង្រាយកងទ័ពជើងគោកនៅអ៊ីរ៉ង់ទេ ប្រតិបត្តិការនេះអាចបញ្ចប់ក្នុងពេលឆាប់ៗនេះ

ថ្លែងនៅទីក្រុងប៉ារីស ប្រទេសបារាំង បន្ទាប់ពីកិច្ចប្រជុំជាមួយដៃគូ ក្រុមប្រទេស G7 (ក្រុមប្រទេសដែលមានសេដ្ឋកិច្ចអភិវឌ្ឍន៍ឈានមុខគេ រួមមានសហរដ្ឋអាមេរិក ជប៉ុន អាល្លឺម៉ង់ ចក្រភពអង់គ្លេស បារាំង អ៊ីតាលី និងកាណាដា) រដ្ឋមន្ត្រីការបរទេសអាមេរិកបានឲ្យដឹងថា ប្រតិបត្តិការនេះកំពុងដំណើរការ “តាមកាលវិភាគ ឬហួសកាលវិភាគ” ហើយអាចបញ្ចប់ក្នុងរយៈពេលខ្លីជាងការរំពឹងទុកដំបូង។ ទោះជាយ៉ាងណាក៏ដោយ លោកបានទទួលស្គាល់ថា សហរដ្ឋអាមេរិកនៅតែកំពុងដាក់ពង្រាយកងទ័ពបន្ថែមទៅកាន់តំបន់នេះ ដើម្បីផ្តល់ឱ្យប្រធានាធិបតីនូវ “ភាពបត់បែនអតិបរមា” ក្នុងការដោះស្រាយស្ថានភាពដែលមិននឹកស្មានដល់។

នៅក្នុងការវិវឌ្ឍពាក់ព័ន្ធមួយ កាលពីម្សិលមិញ រដ្ឋមន្ត្រីការបរទេសអាល្លឺម៉ង់ លោក Johann Wadephul បាននិយាយថា ទីក្រុងវ៉ាស៊ីនតោន និងទីក្រុងតេអេរ៉ង់កំពុងរៀបចំសម្រាប់កិច្ចចរចាដោយផ្ទាល់ ដែលត្រូវបានគេរំពឹងថា នឹងធ្វើឡើងក្នុងពេលឆាប់ៗនេះ។ យោងតាមរដ្ឋមន្ត្រីការបរទេសអាល្លឺម៉ង់ ភាគីទាំងពីរធ្លាប់មានទំនាក់ទំនងដោយប្រយោលពីមុនមក ហើយឥឡូវនេះកំពុងធ្វើការឆ្ពោះទៅរកកិច្ចប្រជុំដោយផ្ទាល់ ដែលអាចធ្វើឡើងនៅប្រទេសប៉ាគីស្ថាន។ ទោះជាយ៉ាងណាក៏ដោយ ប្រទេសអាល្លឺម៉ង់មិនទាន់បានបង្ហាញព័ត៌មានលម្អិតបន្ថែមអំពីប្រភព ឬខ្លឹមសារជាក់លាក់នៃកិច្ចពិភាក្សានោះទេ៕