នៅថ្ងៃទី ២ ខែមករា រដ្ឋមន្ត្រីក្រសួងការពារជាតិអ៊ីរ៉ង់ លោក Aziz Nasirzadeh បានបញ្ជាក់ថា សមត្ថភាពមីស៊ីលរបស់អ៊ីរ៉ង់គឺមិនអាចកាត់ផ្តាច់បានឡើយ សម្បីតែដោយគ្រាប់បែក ឬការចរចា។ រដ្ឋមន្ត្រីក្រសួងការពារជាតិអ៊ីរ៉ង់បានអះអាងថា កម្លាំងយោធារបស់ប្រទេសនេះបានរីកចម្រើនគួរឱ្យកត់សម្គាល់ចាប់តាំងពីសង្គ្រាមរយៈពេល ១២ ថ្ងៃជាមួយអ៊ីស្រាអែលក្នុងខែមិថុនា។ ដូច្នេះហើយ អ៊ីរ៉ង់បានត្រៀមខ្លួនជាស្រេចដើម្បីសងសឹកយ៉ាងម៉ឺងម៉ាត់ ប្រឆាំងនឹងរាល់ការគំរាមកំហែងដោយផ្ទាល់ចំពោះទីក្រុងតេអេរ៉ង់។
ការព្រមានរបស់រដ្ឋមន្ត្រីក្រសួងការពារជាតិអ៊ីរ៉ង់កើតឡើងក្នុងបរិបទដែលមានការរំពឹងទុកថា សហរដ្ឋអាមេរិក និងអ៊ីស្រាអែលអាចនឹងបន្តវាយប្រហារលើអ៊ីរ៉ង់ ដើម្បីទប់ស្កាត់ការអភិវឌ្ឍអាវុធនុយក្លេអ៊ែរ និងការពង្រីកកម្មវិធីមីស៊ីលរបស់ប្រទេសនេះ។ នាយករដ្ឋមន្ត្រីអ៊ីស្រាអែល លោក Benjamin Netanyahu ត្រូវបានចាត់ទុកថា បានដាក់ជួនប្រធានាធិបតីអាមេរិក លោក Donald Trump នូវផែនការប្រតិបត្តិប្រឆាំងអ៊ីរ៉ង់ ក្នុងដំណើរទស្សនកិច្ចរបស់លោកទៅកាន់សហរដ្ឋអាមេរិកនៅចុងឆ្នាំ ២០២៥។ ជាពិសេស លោកប្រធានាធិបតី Trump នាថ្ងៃទី ២ មករា បានព្រមានថា សហរដ្ឋអាមេរិកបានត្រៀមខ្លួនជាស្រេចដើម្បីធ្វើអន្តរាគមន៍ ប្រសិនបើរដ្ឋាភិបាលអ៊ីរ៉ង់ប្រើប្រាស់កម្លាំងដើម្បីបង្ក្រាបបាតុកម្មដែលកើតមានឡើងនៅក្នុងប្រទេសនេះ៕
