ចាប់ពីតម្លៃវប្បធម៌ប្រពៃណីរហូតដល់ភាពច្នៃប្រឌិតរបស់យុវវ័យ ចាប់ពីការទូតវប្បធម៌រហូតដល់ឧស្សាហកម្មវប្បធម៌ អ្វីៗគ្រប់បែបយ៉ាងកំពុងត្រូវបានតភ្ជាប់គ្នា បង្កើតរូបភាពវៀតណាមដ៏ស្វាហាប់ សម្បូរទៅដោយអត្តសញ្ញាណ និងរីកសាយភាយពិភពលោក។
ក្នុងដំណើរកំសាន្តលើកដំបូងមកកាន់ប្រទេសវៀតណាម លោកស្រី Alisa និងលោក Bruce តាមការណែនាំពីមិត្តភក្តិនិងគេហទំព័រទេសចរណ៍ បានមកស្វែងរករោងមហោស្រពរបាំអាយ៉ង់ទឹកវៀតណាម។ សំឡេងភ្លេងប្រពៃណីបន្លឺឡើង។ ផ្ទៃទឹកស្ងប់ស្ងាត់ ស្រាប់តែក្លាយទៅជាឆាកដ៏រស់រវើក។ ពីក្រោយវាំងននឫស្សី អាយ៉ង់ឈើបានលេចចេញមក ហើយនិទានរឿងរ៉ាវអំពីជីវភាពជនបទវៀតណាម និងពិធីបុណ្យប្រជាប្រិយ ជាដើម។ បន្ទាប់ពីតែជិតមួយម៉ោងប៉ុណ្ណោះ អ្នកទេសចរទាំងពីរមានសេចក្តីសោមនស្សរីករាយយ៉ាងក្រៃលែង នៅពេលដែលអាយ៉ង់ទឹកហាក់ដូចជាចេះសើច រាំ និងនិទានរឿងរ៉ាវយ៉ាងពិតប្រាកដ៖
“ការសម្តែងនោះពិតជាអស្ចារ្យម៉ែនទែន ដែលខ្ញុំមិនធ្លាប់បានទស្សនាពីមុនមកទេ។ ខ្ញុំពិតជាស្រឡាញ់ព្រឹត្តិការណ៍បែបនេះ ពីព្រោះវាផ្តល់ឱ្យខ្ញុំនូវឱកាសដើម្បីយល់ពីប្រពៃណី និងសិល្បៈនៃវប្បធម៌វៀតណាមបុរាណ”។
“កម្មវិធីបានចាប់ផ្តើមជាមួយនឹងភ្លេងប្រពៃណីវៀតណាម បន្ទាប់មក មន្តអាគមបានផុសឡើង។ តួអង្គប្រជាប្រិយមួយចំនួន បានឆ្លុះបញ្ចាំងពីជីវភាពរបស់កសិករវៀតណាម។ ដោយប្រើដំបងឫស្សីដែលលិចនៅក្រោមទឹក សិល្បករបានផ្លាស់ទីតួអង្គរបស់ពួកគេយ៉ាងប៉ិនប្រសព ដែលអាយ៉ង់ហាក់ដូចជាកំពុងរាំយ៉ាងរស់រវើក។ វាពិតជាទិដ្ឋភាពដ៏អស្ចារ្យមួយ!”
មានរឿងខ្លះដែលធ្វើឱ្យភ្ញៀវទេសចរ នឹករលឹកដល់ប្រទេសវៀតណាមតាមបែបសាមញ្ញបំផុត។ វាអាចជាក្លិនក្រអូបនៃហ្វើក្ដៅមួយចាននៅតាមដងផ្លូវក្នុងទីក្រុងហាណូយ។ វាអាចជាសំឡេងចាប៉ីដែលបន្លឺឡើងនៅក្នុងបរិយាកាសវប្បធម៌ ឬគ្រាន់តែជាការជ្រមុជខ្លួននៅក្នុងជីវភាពសហគមន៍របស់អ្នកស្រុក។
“ខ្ញុំបានមកវៀតណាមប្រហែល ៩ ដងហើយ ភាគច្រើនទៅទីក្រុងហាណូយ។ ដូច្នេះ ខ្ញុំជាភ្ញៀវជាប្រចាំ។ ខ្ញុំតែងតែទៅតំបន់វិថីបុរាណ”។
“ខ្ញុំចូលចិត្តការដែលមនុស្សអាចដើរលេងបានស្រួលៗ រហូតដល់ម៉ោង ១១ ឬ ១២ អធ្រាត្រ។ វាខុសគ្នាខ្លាំងពីលោកខាងលិច។ ខ្ញុំមិនមកទីនេះដើម្បីគ្រាន់តែទស្សនាទេសភាពទេ។ ខ្ញុំចូលចិត្តជីវភាពរបស់ប្រជាជននៅទីនេះ ហើយវាមានអារម្មណ៍ល្អណាស់ ដែលខ្ញុំបានសម្របខ្លួន និងមានអារម្មណ៍ថាដូចជាជាផ្នែកមួយរបស់វា”។
ក្នុងពេលជាមួយគ្នានោះ នៅខាងក្រៅព្រំដែនជាតិ រឿងរ៉ាវអំពីវប្បធម៌វៀតណាមកំពុងត្រូវបាននិទានជាភាសាផ្សេង - ដែលជាភាសានៃភាពយន្ត អារម្មណ៍ និងការយោគយល់គ្នា។
ដោយទើបតែបានប្រារព្ធធ្វើឡើងនៅប្រទេសបារាំង បែលហ្ស៊ិក និងសាធារណរដ្ឋឆែក Viet Culture in Motion - ជាមហោស្រពភាពយន្តឯកសារខ្លីអន្តរជាតិលើកដំបូងលើពិភពលោកអំពីប្រធានបទវប្បធម៌វៀតណាម បានផ្តល់នូវវិធីអភិក្រមថ្មីមួយក្នុងការផ្សព្វផ្សាយវប្បធម៌។ តាមរយៈទស្សនៈរបស់អ្នកផលិតខ្សែភាពយន្តវ័យក្មេងវៀតណាម តម្លៃប្រពៃណីត្រូវបានពិរពណ៌នាដោយភាសាភាពយន្តទំនើប ចាប់ពីសិល្បៈម្ហូប ល្ខោនប្រពៃណី ភូមិសិប្បកម្ម រហូតដល់ទិដ្ឋភាពសាមញ្ញៗក្នុងជីវភាពប្រចាំថ្ងៃរបស់ប្រជាជនវៀតណាម។ លោក Fabrice Loher អភិបាលក្រុង Lorient ប្រទេសបារាំង បានចែករំលែកបន្ទាប់ពីការចាក់បញ្ចាំងលើកដំបូងថា៖
“យប់នេះ យើងបានរីករាយខ្សែភាពយន្តខ្នាតខ្លីចំនួន ៣ ដែលបង្ហាញពីប្រពៃណីវប្បធម៌ដ៏វិសេសវិសាលរបស់ប្រទេសវៀតណាម។ ខ្សែភាពយន្តដំបូងបានឧទ្ទេសនាមអំពីវប្បធម៌ម្ហូបប្រពៃណី បន្ទាប់មកគឺសិល្បៈល្ខោន ហើយខ្សែភាពយន្តចុងក្រោយមានចំណងជើងថា "បន្ទុកនៃទឹក"។ ខ្សែភាពយន្តទាំងនេះគួរឱ្យចាប់អារម្មណ៍ខ្លាំងណាស់ដោយសារតែភាពចម្រុះ ដែលបង្ហាញពីទស្សនៈផ្សេងៗគ្នាជាច្រើនលើវប្បធម៌វៀតណាម ប៉ះដល់អារម្មណ៍របស់ទស្សនិកជន និងធ្វើឱ្យមនុស្សជាច្រើនយល់និងស្រឡាញ់ប្រទេសវៀតណាមកាន់តែច្រើនថែមទៀត”។
ព្រឹត្តិការណ៍ផ្សព្វផ្សាយវប្បធម៌វៀតណាមទៅកាន់ពិភពលោក ដូចជា Viet Culture in Motion កំពុងសាងសង់តំណរស្ពានថ្មីៗ ដើម្បីនាំប្រទេសវៀតណាមឱ្យកាន់តែខិតជិតនឹងមិត្តភក្តិអន្តរជាតិ។ ផ្ទុយទៅវិញ ជារៀងរាល់ឆ្នាំ ភ្ញៀវទេសចររាប់លាននាក់បានមកដល់វៀតណាមដើម្បីទស្សនាទីក្រុងបុរាណ ឆ្នេរសមុទ្រ និងបេតិកភណ្ឌដែលត្រូវបានថែរក្សាពីមួយជំនាន់ទៅមួយជំនាន់។ ប៉ុន្តែអ្វីដែលធ្វើឱ្យមនុស្សជាច្រើនចង់ត្រឡប់មកវិញមិនត្រឹមតែជាទេសភាពប៉ុណ្ណោះទេ ថែមទាំងបដិសណ្ឋារកិច្ចពិតប្រាកដ ស្នាមញញឹមដ៏រួសរាយរាក់ទាក់ និងរបៀបដែលប្រជាជនវៀតណាមរក្សាតម្លៃវប្បធម៌ក្នុងជីវភាពប្រចាំថ្ងៃទៀតផង។ ប្រការសាមញ្ញៗទាំងនោះ គឺជាឯកអគ្គរដ្ឋទូតដ៏យូរអង្វែងបំផុតនៃវប្បធម៌វៀតណាម។
នៅពេលដែលប្រទេសមួយចេះរក្សាអត្តសញ្ញាណ ចេះនិទានរឿងរ៉ាវរបស់ខ្លួនដោយស្មោះត្រង់ និងចេះប្រែក្លាយតម្លៃវប្បធម៌ទៅជាភាពទាក់ទាញ ប្រទេសនោះនឹងមានប្រភពកម្លាំងប្រកបដោយនិរន្តរភាព។ អំណាចទន់ជាតិលែងគ្រាន់តែជាសន្ទស្សន៍នៅលើតារាងចាត់ថ្នាក់ទៀតហើយ ប៉ុន្តែជាសក្ខីភាពនៃដំណើររបស់វៀតណាមក្នុងការធ្វើសមាហរណកម្មទៅក្នុងពិភពលោកតាមរយៈអត្តសញ្ញាណ បញ្ញា និងតម្លៃមនុស្សសាស្ត្ររបស់ខ្លួនផងដែរ៕
