ការវាយប្រហារតាមអាកាសទាំងនេះត្រូវបានធ្វើឡើងជាផ្នែកមួយ នៃប្រតិបត្តិការ "Ghazab Lil Haq" (កំហឹងនៃយុត្តិធម៌) របស់ប៉ាគីស្ថាន បន្ទាប់ពីកងកម្លាំងតាលីបង់នៅអាហ្វហ្គានីស្ថានបានវាយប្រហារប៉ុស្តិ៍ប៉ាគីស្ថានតាមបណ្តោយព្រំដែនកាលពីយប់ថ្ងៃទី ២៦ ខែកុម្ភៈ។ ក្រោយមក បញ្ជាការយោធាភាគខាងកើតរបស់អាហ្វហ្គានីស្ថានបានបញ្ជាក់ពី "ការប្រយុទ្ធគ្នាយ៉ាងសាហាវ" តាមបណ្តោយព្រំដែនប្រវែង ២.៦១១ គីឡូម៉ែត្រជាមួយប៉ាគីស្ថាន។
នៅក្នុងសេចក្តីប្រកាសនៅព្រឹកនេះ រដ្ឋមន្ត្រីការពារជាតិប៉ាគីស្ថាន Khawaja Asif បានប្រកាសថា ប្រទេសរបស់លោក "កំពុងឆ្លើយតបយ៉ាងម៉ឺងម៉ាត់" ហើយថា "នេះជាសង្គ្រាមដែលគ្មានដែនកំណត់"។ ទន្ទឹមនឹងនេះ នាយករដ្ឋមន្ត្រី Shehbaz Sharif បានសង្កត់ធ្ងន់ថា រដ្ឋាភិបាលប៉ាគីស្ថាននឹងមិនសម្របសម្រួលលើការការពារជាតិទេ ហើយសកម្មភាពឈ្លានពានណាមួយនឹងត្រូវឆ្លើយតបដោយ "កម្លាំងដ៏លើសលប់"។ លោកបានបញ្ជាក់ថា ប៉ាគីស្ថានតែងតែលើកកម្ពស់សន្តិភាព ប៉ុន្តែនឹងមិនអនុញ្ញាតឱ្យមានអន្តរាយណាមួយដល់បូរណភាពជាតិរបស់ខ្លួនឡើយ។
ទាក់ទងនឹងភាពតានតឹងរវាងអាហ្វហ្គានីស្ថាន និងប៉ាគីស្ថាន អ្នកនាំពាក្យរបស់អគ្គលេខាធិការអង្គការសហប្រជាជាតិបាននិយាយនៅថ្ងៃទី ២៦ ខែកុម្ភៈថា អគ្គលេខាធិការលោក Antonio Guterres បានអំពាវនាវដល់គ្រប់ភាគីពាក់ព័ន្ធទាំងអស់ឱ្យគោរពតាមកាតព្វកិច្ចរបស់ពួកគេក្រោមច្បាប់អន្តរជាតិ និងធានាការការពារជនស៊ីវិល។ លោក Guterres ក៏បានជំរុញឱ្យគ្រប់ភាគីទាំងអស់បន្តស្វែងរកដំណោះស្រាយចំពោះភាពខុសប្លែកគ្នា តាម រយៈមធ្យោបាយការទូត៕
