គោលដៅទេសចរណ៍ដ៏ល្អឥតខ្ចោះនៅក្នុងរដូវក្ដៅចំនួន១០កន្លែងនៅវៀតណាម

Quan Lan ខេត្ត Quang Ninh៖ ស្ថិតនៅក្នុងឧទ្យានជាតិ Bai Tu Long កោះ Quan Lan ជា “រតនភណ្ឌ” នៃធម្មជាតិ ដោយមានឆ្នេរសមុទ្រខៀវស្រងាត់និងវាលខ្សាច់លាតសន្ធឹងល្វឹងល្វើយ។

Mu Cang Chai ខេត្ត Yen Bai៖ ប្រសិនបើលោកអ្នកចង់ជៀសវាងភាពក្ដៅហួសហែង គឺគ្មានអ្វីដ៏អស្ចារ្យជាងចំណាប់អារម្មណ៍ជ្រះស្រឡះ ដោយបានសម្របខ្លួនចូលក្នុងព្រៃភ្នំបៃតងត្រជាក់គួរអោយរំជួលចិត្តយ៉ាងខ្លាំងនៅស្រុក Mu Cang Chai។

ល្បាក់ទឹក Ban Gioc ខេត្ត Cao Bang៖ មិនត្រឹមតែមានអាកាសធាតុត្រជាក់ស្រួលប៉ុណ្ណោះទេ ល្បាក់ទឹក Ban Gioc នៅទាក់ទាញភ្ញៀវទេសចរអាស្រ័យដោយទេសភាពធម្មជាតិដ៏ស្រស់បំព្រងនិងម្ហូបអាហារឈ្ងុយឆ្ងាញ់នៅតំបន់នេះ ទៀតផង។

Sapa ខេត្ត Lao Cai៖ អាកាសធាតុនៅ Sapa មិនដែលក្ដៅស្អុះស្អាប់ដូចតំបន់នគរទេ ប៉ុន្តែវាត្រជាក់ស្រួលពេញមួយឆ្នាំ។ ទីនេះនៅមានទេសភាពធម្មជាតិដ៏ស្រស់ស្អាតដូចជាគំនូរមួយផ្ទាំងទៀតផង។

Moc Chau ខេត្ត Son La៖ ប្រសិនបើមកដល់ Moc Chau នារដូវក្ដៅ លោកអ្នកនឹងមានឱកាសគយគន់ទួលភ្នំតែខៀវស្រងាត់ធំល្វឹងល្វើយ ឬក៏ទៅទស្សនាទិដ្ឋភាពថ្ងៃលិចនៅលើទួលភ្នំស្រល់ Ban Ang។

 Mau Son ខេត្ត Lang Son៖ គេតែងតែប្រៀបធៀប Mau Son ដូចទៅនឹង “ព្រះនាងកំពុងដេកលក់” ដោយសារទីនេះមានទេសភាពធម្មជាតិដ៏ស្អាតអស្ចារ្យ សីតុណ្ហភាពត្រជាក់ស្រួល និងផ្ទះវីឡាបុរាណគួរអោយចាប់អារម្មណ៍។

Bach Ma ខេត្ត Thua Thien Hue៖ ឧទ្យានជាតិ Bach Ma មានរមណីយដ្ឋានជាច្រើនដើម្បីលោកអ្នកអាចទៅទស្សនាដូចជា ល្បាក់ទឹក Do Quyen ដោយមានកំពស់៣០០ម៉ែត្រសដែលស្ថិតនៅក្នុងព្រៃឈើស្ងៀមស្ងាត់ ឬតំបន់ Ngu Ho (បឹងចំនួន៥) ស្រស់បំព្រង។

Ly Son ខេត្ត Quang Ngai៖ កោះ Ly Son ទាក់ទាញភ្ញៀវទេសចរទាំងជាតិនិងអន្តរជាតិយ៉ាងច្រើនកុះករ មិនត្រឹមតែអាស្រ័យដោយភាពស្រស់ស្អាតនៃធម្មជាតិប៉ុណ្ណោះទេ ថែមទាំងដោយភាពរួសរាយរាក់ទាក់របស់ប្រជាជននៅលើកោះនិងម្ហូបអាហារពិសេសដោយឡែកនៅទីនេះទៀតផង។

Ba Na ទីក្រុង Da Nang៖ Ba Na ពិតជាឋានសួរទេសចរណ៍មួយ ដើម្បីអោយលោកអ្នកអាចគយគន់ទាំងទេសភាពធម្មជាតិផង និងសំណង់ស្ថាបត្យកម្មតាមរចនាបទអឺរ៉ុបទៀតផង។ ក្រៅពីនោះ Ba Na នៅមានល្បែងកំសាន្តគួរអោយទាក់ទាញជាច្រើនដែលមិនអាចរំលងបានឡើយ។

Da Lat៖ ដោយមានអាកាសធាតុត្រជាក់ស្រួលពេញមួយឆ្នាំនិងរមណីយដ្ឋាន កេរដំណែល ជាច្រើន ទីក្រុង Da Lat ជាគោលដៅទេសចរណ៍ល្បីល្បាញមួយចំពោះភ្ញៀវទេសចរទាំងជាតិនិងអន្តរជាតិនៅក្នុងរដូវក្ដៅ៕