 រដ្ឋមន្ត្រីការបរទេសដាណឺម៉ាក លោក Lars Lokke Rasmussen។ រូបថត៖ REUTERS/Ints Kalnins |
រដ្ឋមន្ត្រីការបរទេសលោក Rasmussen បានសង្កត់ធ្ងន់ថា បរិយាកាស ចរចារ "វិជ្ជមាន" និង "មានលក្ខណៈស្ថាបនា" ជាជំហានសំខាន់មួយឆ្ពោះទៅរកការធ្វើឱ្យទំនាក់ទំនងវិលមករកភាពប្រក្រតីវិញ បន្ទាប់ពីភាពតានតឹងកើនឡើងកាលពីសប្តាហ៍មុន។ ទោះបីជាបញ្ហាស្នូលមិនទាន់ត្រូវបានដោះស្រាយពេញលេញ ប៉ុន្តែការដែលភាគីទាំងពីរកំពុងរៀបចំផែនការជួបប្រជុំបន្ថែមទៀតត្រូវបានមើលឃើញថា ជាសញ្ញានៃការបន្ធូរបន្ថយភាពតានតឹងនៅក្នុងវិបត្តិដ៏ជ្រៅបំផុតនៅក្នុងសម្ព័ន្ធភាពឆ្លងមហាសមុទ្រអាត្លង់ទិកក្នុងប៉ុន្មានឆ្នាំថ្មីៗនេះ។
យ៉ាងណាក៏ដោយ នៅក្នុងសេចក្តីថ្លែងមួយនៅថ្ងៃដដែលនោះ នាយករដ្ឋមន្ត្រីដាណឺម៉ាក លោកស្រី Mette Frederiksen បានបដិសេធការអះអាងរបស់ប្រធានាធិបតីអាមេរិក លោក Donald Trump ដែលថាទីក្រុងវ៉ាស៊ីនតោនបានឈានដល់កិច្ចព្រមព្រៀងក្របខ័ណ្ឌជាមួយអង្គការសន្ធិសញ្ញាអាត្លង់ទិកខាងជើង (NATO) ទាក់ទងនឹងតំបន់ Greenland។ នៅក្នុងបទសម្ភាសន៍ជាមួយប៉ុស្តិ៍ទូរទស្សន៍បារាំង France ២ លោកស្រី Frederiksen បានបញ្ជាក់ថា "នោះមិនមែនជាកិច្ចព្រមព្រៀងទេ"។ ថ្នាក់ដឹកនាំដាណឺម៉ាករូបនេះបានសង្កត់ធ្ងន់ថា អធិបតេយ្យភាពជាតិ និងសិទ្ធិស្វ័យសម្រេចរបស់ប្រជាជនត្រូវតែគោរពយ៉ាងដាច់ខាត ហើយបានព្រមានថា ការធ្វើយោធានីយកម្មណាមួយនៅ Greenland នឹងផ្ទុយនឹងគោលការណ៍អន្តរជាតិដែលបានបង្កើតឡើងចាប់តាំងពីសង្គ្រាមលោកលើកទី ២ មក៕
