ភូមិ Giang Mo ស្ថិតក្នុងជ្រលងភ្នំ ព័ទ្ធជុំវិញដោយ វាលស្រែស្រូវខៀវស្រងាត់និងព្រៃភ្នំ Hoa Binh។ នៅក្នុងភូមិមានបងប្អូនជនជាតិ Muong ចំនួន១២០គ្រួសាររួមរស់ជាមួយគ្នាហើយភ្ញៀវទេសចរមកនេះអាចស្វែងយល់ពីជីវភាពរស់នៅនិងវប្បធម៌របស់ជនរួមជាតិនេះ។
 ភូមិ Giang Mo ទាក់ទាញភ្ញៀវទេសចរមកទស្សនាជាច្រើនកុះករ (រូបថតៈ mytour.vn) |
តាមលោក Nguyen Van Hau ជាម្ចាស់ផ្ទះមួយរូបដែលកំពុងត្រៀមរៀបចំម្ហូបអាហារជូនក្រុមភ្ញៀវមកពីអឺរ៉ុបនោះបានឲ្យដឹងថា ទេសចរក្នុងស្រុកនិងបរទេសចូលចិត្តមកទស្សនាភូមិ Giang Mo ដោយសារនៅភូមិនេះប្រជាជនរក្សាបាននូវផ្នត់វប្បធម៌ប្រពៃណីរបស់ខ្លួន។ លោក Nguyen Van Hau បានថ្លែងយ៉ាងដូច្នេះថា៖
“ភូមិ Giang Mo មានប្រជាជន ចំនួន១២០គ្រួសារដែលចែកជាច្រើនក្រុមក្នុងនោះមាន៤៦គ្រួសារបើកសេវាទេសចរណ៍។ ភូមិយើងខ្ញុំបានទទួលភ្ញៀវមកទស្សនាតាំងពីយូរមកហើយ។ ក្នុងអំឡុងឆ្នាំ១៩៧៩-១៩៨០ពេលកសាងរោងចក្រវារីអគ្គិសនីនោះក្រុមជំនាញការអតីតសហភាពសូវៀតតែងតែមកទស្សនានិងស្នាក់នៅភូមិនាចុងសប្ដាហ៍។ គ្រួសារខ្ញុំចាប់ផ្ដើមបើកសេវាទេសចរណ៍តាំងពីឆ្នាំ១៩៩៧មក ហើយដល់ឆ្នាំ២០០១គឺបើកបន្ថែមនូវសេវាធ្វើម្ហូបបំរើភ្ញៀវ។ ក្នុងរដូវទេសចរណ៍មានពេលខ្លះយើងខ្ញុំទទួលជនបរទេសរហូតដល់ទៅ៣០០ឬ៤០០នាក់ក្នុងមួយថ្ងៃ ”។
ក្រៅពីគយគន់ទេសភាពធម្មជាតិនិងទស្សនាផ្ទះសំបែងរបស់ប្រជាជន ភ្ញៀវទេសចរក៏បានភ្លក់ម្ហូបឈ្ងុយឆ្ងាញ់គ្រប់មុខដូចជាបាយដំណើប សាច់ក្របី សាច់ជ្រូក មាន់ ត្រីជ្រោះ ទំពាំងព្រៃនិងស្រាពាងជាដើម។លោក Nguyen Van Hau បានឲ្យដឹងទៀតថា៖
“ភ្ញៀវទេសចរមកកាន់ភូមិ Giang Mo គេចូលចិត្តពិសារណែមនិងប្រហិតសាច់ជ្រូកចៀនណាស់។ គេថានៅទីក្រុងគេធ្លាប់ហូបហើយតែម្ហូបទាំង២មុខហ្នឹងដោយបងប្អូនជនជាតិ Muong ច្នៃគឺឈ្ងុយឆ្ងាញ់ពិសេស។ ទន្ទឹមនឹងម្ហូបអាហារយើងខ្ញុំក៏សំដែងសិល្បៈច្រៀងរាំវាយគងឃ្មោះជូនភ្ញៀវកំសាន្តផងដែរ”។
ប្រជាជនជនរួមជាតិ Muong រស់នៅក្នុងផ្ទះឈើផុតពីដីហើយមុខរបរសំខាន់គឺធ្វើស្រែចំការនិងត្បាញក្រណាត់។ នារីជនជាតិ Muong ពូកែត្បាញក្រណាត់ ដេរប៉ាក់ខោអាវរាប់ទាំងឧបករណ៍សំរាប់ផលិតកម្មកសិកម្មទៀផង។ តាមអ្នកស្រី Jaelle ជាភ្ញៀវមកពីប្រទេសបារាំងបានចែករំលែកថា៖
“ខ្ញុំមកទស្សនាវៀតណាមជាលើកដំបូងតែសប្បាយចិត្តណាស់ដោយឃើញនូវការស្វាគមន៍យ៉ាងកក់ក្ដៅរបស់ប្រជាជនវៀតណាមដែលមានវប្បធម៌ខុសពីប្រទេសបារាំង។ ភូមិ Giang Moនេះមានភាពចំលែកជាច្រើនដោយមានផ្ទះឈើផុតពីដីរបស់អ្នកភូមិដែលធ្វើឲ្យខ្ញុំមានចំណាប់អារម្មណ៍យ៉ាងជ្រាលជ្រៅ ”។
ពេលមកទស្សនាភូមិ Giang Mo របស់ប្រជាជនជនរួមជាតិ Muong នេះភ្ញៀវទេសចរក៏អាចទៅមើលរមណីយដ្ឋានផ្សេងៗក្នុងខេត្ត Hoa Binh ដែរមានជាអាទិ៍ សារមន្ទីរវប្បធម៌ Muong តំបន់ទេសចរណ៍ បឹង Hoa Binh ឬទៅទស្សនាចំការក្រូចនៅទីរួមស្រុក Cao Phong ក៏បានដែរ៕
