VOVWORLD_គ្មាននរណារាប់បានថានៅប្រទេសវៀតណាមមានផ្សារប៉ុន្មាន
កន្លែងទេ។ក៏ប៉ុន្តែយើងទាំងអស់គ្នាដឹងថាផ្សារមិនត្រឹមតែជាកន្លែងទិញលក់ទំនិញ
ប៉ុណ្ណោះទេថែមទាំងជាកន្លែងបង្ហាញនូវផ្នត់វប្បធម៌ជាតិយ៉ាងច្បាស់ទៀតផង។ផ្សារ
នៅតំបន់នីមួយៗសុទ្ធតែមានលក្ខណៈដោយឡែករៀងៗខ្លួនស្របតាមវប្បធម៌នៃ
តំបន់នោះ។លក្ខណៈវិសេសវិសាលនៃការប្រជុំផ្សារទាំងនោះបានទាក់ទាញភ្ញៀវ
ទេសចរជាច្រើនកុះករមកទស្សនានិងស្វែងយល់ទឹកដីនិងមនុស្សវៀតណាម។
នៅតំបន់ភូមិភាគខាងជើងវៀតណាមផ្សារមានលក្ខណប្រជាប្រិយបំផុតគឺ
ផ្សារនៅជនបទ។ផ្សារបែបនេះជាកន្លែងទិញលក់ទំនិញផងនិងផ្លាស់ប្ដូរវប្បធម៌
សហគមន៍ផងដែលបានក្លាយទៅជាផ្នែកមួយមិនអាចកាត់ផ្ដាច់ចេញពីជីវភាព
ខាងវប្បធម៌របស់អ្នកស្រុកបានឡើយ។ដើមឡើយនៅតាមភូមិនីមួយៗសុទ្ធតែ
មានផ្សារតូចមួយហៅថាផ្សាយភូមិសំរាប់លក់ដូរឥវែឥវ៉ាន់ជាប្រចាំថ្ងៃ។រីឯនៅតាម
ឃុំមួយចំនួនមានផ្សារធំមួយកន្លែងដែលបើកតាមការណាត់ជួបគ្នា។
មកទស្សនាឃុំMinh Nong ខេត្ត Phu Thoម្ដងៗភ្ញៀវទេសចរតែងតែទៅដើរ
លេងផ្សារLu។ផ្សារនេះមានឈ្មោះមួយទៀតគឺផ្សារLuaដែលជាកន្លែងទិញលក់ទំនិញ
សំខាន់របស់អ្នកឃុំMinh Nong ។ការប្រជុំផ្សារLuតែងតែបានបើកនាថ្ងៃ៣ ៨ និង
១៣កើត ១៨និង២៣រោចជារៀងរាល់ខែ។នៅថ្ងៃប្រជុំផ្សារគឺទំនិញសំបូរជាងថ្ងៃ
ធម្មតាហើយមនុស្សមកទិញលក់ក៏មានច្រើនដែរ។ចំណុចលេចធ្លោនៃផ្សារជនបទ
មុននេះគឺប្រជាកសិករយកកសិផលផលិតដោយខ្លួនឯងមកលក់នៅផ្សារ។តាម
លោកស្រី Le Thi Dac ជាអាជីករមួយរូបនៅផ្សារជនបទ Minh Nongបានឲ្យដឹងថា
“ផ្សារLuនេះមានតាំងពីយូរណាស់មកហើយគឺមានតាំងពីជំនាន់ដូនតាខ្ញុំ។
មុននេះគេហៅតំបន់ Ke Luឬ Ke Gac ឥឡូវហៅឃុំMinh Nongវិញ។នៅផ្សារនេះ
តាំងពីមុនមកមានដាក់លក់ស្រូវ អង្ករ បន្លែនិងទំនិញប្រើប្រាស់តាមកន្លែង
ដាច់ពីគ្នា។បងប្អូនមករកទិញទំនិញណាគឺមកកន្លែងលក់ទំនិញហ្នឹង”។
រីឯនៅតាមខេត្តព្រៃភ្នំភូមិភាគខាងជើងវៀតណាមមានការប្រជុំផ្សារតាម
បែបផ្សេង។ ប្រជពលរដ្ឋនៅតំបន់នោះរង់ចាំដល់ពេលទៅផ្សារដូចបានទៅចូលរួម
បុណ្យ។នៅថ្ងៃប្រជុំផ្សារមនុស្សម្នាស្លៀកពាក់ស្អាតទៅកាន់ផ្សារ។ទិញលក់ទំនិញរួច
ហើយគេប្រមូលផ្ដុំគ្នាហូបចុកសំណេះសំណាលយ៉ាងសប្បាយរីករាយ។
មកទស្សនាផ្សារស្រុកមួយចំនួននៅខេត្តHa Giang ដូចជានៅស្រុកMeo Vac
Dong Van Quan Ba Hoang Su Phi និង Xin Man ចំពេលប្រជុំផ្សារនោះភ្ញៀវ
ទេសចរនឹងមានការចាប់អារម្មណ៍យ៉ាងជ្រាលជ្រៅចំពោះពណ៌សំបុរនៃសំលៀក
បំពាក់របស់បងប្អូនជនជាតិភាគតិចក៏ដូចជាក្រណាត់ចរបាប់ដែលបានដាក់
លក់នៅក្នុងផ្សារ។នៅខេត្តHa Giang តែងតែមានការប្រជុំផ្សារបន្ថយពេលដែល
ភាគច្រើនបើកនៅតាមឃុំនានា។ប្រសិនបើសប្ដាហ៍នេះផ្សារប្រជុំនាថ្ងៃអាទិត្យគឺ
សប្ដាហ៍ក្រោយនឹងប្រជុំនាថ្ងៃសៅរ៏។រីឯការប្រជុំផ្សារស្រុកតែងតែបានរៀបចំឡើង
នាថ្ងៃអាទិត្យជារៀងរាល់សប្ដាហ៍។នៅផ្សារទាំងនេះក្រៅពីទំនិញធម្មតានៅមាន
ដាក់លក់សត្វបក្សាបក្សី ជ្រូកគោក្របីទៀតផង។ភ្ញៀវទេសចរមួយរូបមកពី
ប្រទេសអ៊ីតាលីបាននិយាយដោយក្ដីសប្បាយរីករាយថា
“ នៅប្រទេសអ៊ីតាលីគេមិនលក់សត្វដូចនៅផ្សារនេះទេ។មកទស្សនាផ្សារនេះ
ខ្ញុំចូលចិត្តញ៉ាំម្ហូបណាស់។ក្រៅពីនោះសំលៀកបំពាក់ជនជាតិនៅទីនេះក៏ធ្វើឲ្យខ្ញុំ
មានការចាប់អារម្មណ៍យ៉ាងខ្លាំងផងដែរ”។
បន្ទាប់ពីទស្សនាភាគខាងជើង ភ្ញៀវទេសចរអន្តរជាតិ បន្តដំណើរទៅកាន់
ភូមិភាគខាងត្បូង។ពេលទៅដល់វាលសណ្ដទន្លេCuu Long គេតែងតែនាំគ្នាដើរ
មើលផ្សារអណ្ដែតនៅតាមទន្លេដ៏ធំល្វឹងល្វើយ។នៅខេត្ត Ca Mau មានផ្សារ
អណ្ដែត Ca Mau ខេត្តVinh Long មានផ្សារអណ្ដែតTra On ខេត្តSoc Trang មាន
ផ្សារអណ្ដែតNga Nam ខេត្ត Hau Giang មានផ្សារអណ្ដែតNga Bay ខេត្តTien
Giang មានផ្សារអណ្ដែតCai Be រីឯខេត្តCan Tho មានផ្សារអណ្ដែតពីរគឺPhong
Dien និងCai Rang។
 |
| ផ្សារអណ្ដែតCai Rangនៅ Can Thoមានភាពអ៊ូអរបំផុតគឺចាប់ពីពេលព្រឹកព្រលឹមដល់ពេលថ្ងៃត្រង់ |
ផ្សារអណ្ដែតលើទន្លេគឺជាផ្នត់វប្បធម៌លេចធ្លោនៅតំបន់ប៉ែកខាងលិចភាគ
ខាងត្បូងវៀតណាម។ពេលដើរផ្សារនេះទាំងអ្នកទិញនិងអ្នកលក់ត្រូវជិះទូកទើប
ទៅដល់ផ្សារបាន។ផ្សារអណ្ដែតCai Rangនៅ Can Thoមានភាពអ៊ូអរបំផុតគឺចាប់
ពីពេលព្រឹកព្រលឹមដល់ពេលថ្ងៃត្រង់។នៅលើផ្ទៃទឹកទន្លេមានទូកនិងកប៉ាលប្រមូល
ផ្ដុំមកសំរាប់ដោះដូរទិញលក់កសិផល ចំណីអាហារភេសជ្ជៈនិងទំនិញជាច្រើនប្រភេទ
ផ្សេងៗទៀត។ អ្នកស្រី Do Thi Nga មកពីក្រុងហាណូយបានឲ្យដឹងថា
“ នេះជាលើកដំបូងដែលខ្ញុំមកទស្សនាតំបន់ទន្លេបឹងបួប៉ែកខាងលិច។ខ្ញុំ
សប្បាយចិត្តណាស់។ជាពិសេសខ្ញុំមានការចាប់អារម្មណ៍បំផុតចំពោះទិដ្ឋភាពទិញ
លក់ផ្លែឈើគ្រប់មុខមកពីតំបន់ផ្សេងគ្នា”។
ផ្សារនិងការប្រជុំផ្សារបានបង្ហាញច្បាស់នូវផ្នត់វប្បធម៌ជាប្រពៃណីរបស់
ប្រជាជន។នេះជាប្រការគួរឲ្យទាក់ទាញចំពោះភ្ញៀវជាតិនិងអន្តរជាតិពេលធ្វើ
ដំណើរទេសចរណ៍ពីភូមិភាគខាងជើងរហូតដល់ភូមិភាគខាងត្បូងប្រទេសវៀត
ណាមម្ដងៗ៕
