អគ្គលេខាបក្ស លោក តូ ឡឹម អញ្ជើញជួបធ្វើការជាមួយគណៈកម្មាធិការបក្សក្រុងហាណូយស្តីពីទិសដៅអភិវឌ្ឍន៍រដ្ឋធានី

លោកអគ្គលេខាបក្ស តូ ឡឹម លោកនាយករដ្ឋមន្ត្រី ហ្វាម មិញជីញ លោកប្រធានរដ្ឋសភា ត្រឹន ថាញ់មិន និងគណៈប្រតិភូមជ្ឈិម និងទីក្រុងហាណូយ នៅក្នុងជំនួបធ្វើការ។ (រូបថត៖ Van Hieu/VOV)

នាព្រឹកថ្ងៃទី ១០ ខែមករា អគ្គលេខាបក្សលោក តូ ឡឹម បានអញ្ជើញទស្សនានិងដឹកនាំកិច្ចប្រជុំជាមួយគណៈកម្មាធិការអចិន្ត្រៃយ៍នៃគណៈកម្មាធិការបក្សក្រុងហាណូយ ស្តីពីការរៀបចំផែនការមេរបស់រដ្ឋធានី ជាមួយនឹងចក្ខុវិស័យ ១០០ឆ្នាំ។ អញ្ជើញចូលរួម មានវត្តមាននាយករដ្ឋមន្ត្រី លោក ហ្វាម មិញ ជីញ និងប្រធានរដ្ឋសភា លោក ត្រឹន ថាញ់ មិន។

នេះជាលើកដំបូងក្នុងអាណត្តិមហាសន្និបាតលើកទី១៣ ដែលថ្នាក់ដឹកនាំបក្ស និងរដ្ឋទាំងបីរូបបានជួបធ្វើការជាមួយទីក្រុងហាណូយ ហើយនេះជាជំនួបធ្វើការដើមដំបូងក្នុងឆ្នាំ២០២៦ រវាងថ្នាក់ដឹកនាំបក្ស និងរដ្ឋ ជាមួយទីក្រុងហាណូយ ដែលបង្ហាញពីការយកចិត្តទុកដាក់ជាពិសេសចំពោះគណៈកម្មាធិការបក្ស អាជ្ញាធរ និងប្រជាជននៃរដ្ឋធានី។

លោកអគ្គលេខាបក្ស តូ ឡឹម ថ្លែងនៅក្នុងជំនួបធ្វើការ។ (រូបថត៖ Van Hieu/VOV)

នៅក្នុងជំនួបធ្វើការនេះ អគ្គលេខាបក្ស លោក តូ ឡឹម បានសង្កត់ធ្ងន់លើតម្រូវការក្នុងការធានា និងថែរក្សាជីវភាពរស់នៅរបស់ប្រជាជនរដ្ឋធានីឲ្យកាន់តែប្រសើរឡើងនៅពេលខាងមុខ ដោយឆ្ពោះទៅទីក្រុងហាណូយមួយដែលមានសុវត្ថិភាពនិងតម្លាភាព។ លោកអគ្គលេខាបក្សបាននសង្កត់ធ្ងន់ថា នៅក្នុងបរិបទដែលប្រទេសជាតិកំពុងឈានចូលយុគសម័យថ្មី ទាមទារឲ្យមានកំណើនលឿនជាង ប្រកបដោយចីរភាពជាង មានប្រសិទ្ធភាពជាង និងមានគុណភាពខ្ពស់ជាង ក្នុងនោះតួនាទីរបស់ទីក្រុងហាណូយមានអត្ថន័យសំខាន់ពិសេស។ ចក្ខុវិស័យរួមរបស់រដ្ឋធានីត្រូវតែភ្ជាប់ទៅនឹងចក្ខុវិស័យជាតិ។ ដូច្នេះ ទីក្រុងហាណូយមិនអាចអភិវឌ្ឍជាមួយនឹងផ្នត់គំនិតរបស់តំបន់ធំមួយបានទេ ប៉ុន្តែត្រូវតែដាក់ខ្លួនជាមជ្ឈមណ្ឌលអភិវឌ្ឍន៍ជាតិ ដោយខិតខំដើរតួនាទីនាំមុខគេក្នុងការបង្កើតគំរូអភិវឌ្ឍន៍ថ្មីៗ។