ຕາແສງ ໂວແຈັງ ແມ່ນເຂດປູກຊາຈຸດສຸມຂອງແຂວງ ໄທງວຽນ ຊື່ງມີເນື້ອທີ່ປູກຊາກວ່າ 2.600 ເຮັກຕາ, ມີໝູ່ບ້ານອາຊີບພື້ນເມືອງນັບສິບແຫ່ງ ແລະ ປະລິມານການຜະລິດຍອດຊາສົດກໍ່ນອນໃນກຸ່ມສູງກວ່າໝູ່ຂອງແຂວງ. ໃນຊຸມປີມໍ່ໆມານີ້, ພ້ອມກັບການຜະລິດຕາມມາດຖານປະຕິບັດການຜະລິດກະສິກຳດີຂອງ ຫວຽດນາມ (VietGAP), ທ້ອງຖິ່ນໄດ້ພັດທະນາບັນດາເຂດປູກຊາອໍແກນນິກເທື່ອລະກ້າວ ເພື່ອແນໃສ່ຕອບສະໜອງຄຳຮຽກຮ້ອງທີ່ນັບມື້ນັບສູງຂອງຕະຫຼາດຢູ່ພາຍໃນປະເທດ ແລະ ສາກົນ.
ບໍ່ຄືກັນກັບວິທີປູກແບບເກົ່າ, ເມື່ອປູກຊາອໍແກນນິກ ໄດ້ຮຽກຮ້ອງໃຫ້ຜູ້ປູກຕ້ອງປ່ຽນແປງນັບແຕ່ຂອດປັບດິນ, ນຳໃຊ້ຝຸ່ນອໍແກນນິກ, ກັກກັນສັດຕູພືດດ້ວຍວິທີຊີວະສາດ ຕະຫຼອດຮອດຂັ້ນຕອນເດັດຊາ, ປຸງແຕ່ງ ແລະ ການຄົ້ນຫາຕົ້ນກຳເນີດ. ເງິນລົງທຶນສູງກວ່າ, ໃຊ້ເວລາຍາວກວ່າ ແຕ່ມູນຄ່າເສດຖະກິດ ແລະ ກຳລັງແກ່ງແຍ້ງຂອງຜະລິດຕະພັນໄດ້ຍົກສູງຂຶ້ນ. ທ່ານ ບຸ່ຍເຟືອງຖາວ, ຮອງປະທານຄະນະກຳມະການ ປຊຊ ຕາແສງ ໂວແຈັງ, ແຂວງ ໄທງວຽນ ໃຫ້ຮູ້ວ່າ:
ພວກຂ້າພະເຈົ້າສຸມໃສ່ການກຳນົດທິດພັດທະນາກະສິກຳ ແລະ ຫັດຖະກຳ. ໃນນັ້ນສຸມໃສ່ກະສິກຳສີຂຽວ, ຕົ້ນຊາແມ່ນແກ່ນສານ. ສຸມໃສ່ບັນດາແຫຼ່ງກຳລັງຄື: ຍູ້ແຮງວຽກງານສື່ມວນຊົນ; ລົງທຶນດ້ານວິທະຍາສາດເຕັກໂນໂລຊີ. ປະຈຸບັນ, ທາງແຂວງ ໄດ້ພັດທະນາ 15 ຜະລິດຕະພັນ OCOP (ໂຄງການໜຶ່ງຕາແສງ ໜຶ່ງຜະລິດຕະພັນ) ໃຫ້ແກ່ຂະແໜງຊາຂອງ ຕາແສງ ໂວແຈັງ.
ເພື່ອໃຫ້ຕົ້ນຊາອໍແກນນິກບັນລຸຄຸນນະພາບດີ, ສະຫະກອນຈຳນວນໜຶ່ງໄດ້ລົງທຶນສ້າງລະບົບຜະລິດຄົບວົງຈອນ, ນັບແຕ່ປູກຕົ້ນຊາ ໄປເຖິງການປຸງແຕ່ງ ແລະ ຊົມໃຊ້ຊາ. ທ່ານ ຫວູແທ່ງເທີມ, ປະທານສະຫະກອນຊາປອດສານພິດ ດາດຟາດ, ຕາແສງ ໂວແຈັງ, ແຂວງ ໄທງວຽນ ໃຫ້ຮູ້ວ່າ:
ເພື່ອມີຜະລິດຕະພັນຊາແຊບທີ່ສຸດ, ສະຫະກອນໄດ້ເລືອກແນວພັນຊາ ກີມຕວຽນ, ນອກຈາກນັ້ນກໍ່ຍັງມີຫຼາຍແນວພັນອື່ນໆອີກຄື: ຊາ F1; ຊາ ດິງ… ຊາບັນລຸມາດຖານ OCOP 4 ດາວ ນັບແຕ່ຂອດບົວລະບັດຕະຫຼອດຮອດການປຸງແຕ່ງກໍ່ຕ້ອງປະຕິບັດຕາມຂັ້ນຕອນທີ່ເຂັ້ມງວດ. ສະຫະກອນກໍ່ໄດ້ຕ້ອນຮັບຫຼາຍຄະນະແຂກຕ່າງປະເທດມາຢ້ຽມຢາມ ແລະ ດື່ມນ້ຳຊາ, ເຂົາເຈົ້າລ້ວນແຕ່ໄດ້ຕີລາຄາສູງຄຸນນະພາບຊາ ແລະ ຊື້ຊາຫຼາຍພໍສົມຄວນ.
ບໍ່ພຽງແຕ່ໄດ້ນຳມາເຊິ່ງຄຸນຄ່າດ້ານເສດຖະກິດເທົ່ານັ້ນ, ບັນດາສວນຊາສີຂຽວອຸ່ມທຸ່ມຍັງໄດ້ກາຍເປັນສະຖານທີ່ທ່ອງທ່ຽວທີ່ດູດດື່ມໃຈແຂກທ່ອງທ່ຽວອີກດ້ວຍ. ແທນທີ່ຈະຊື້ພຽງແຕ່ຜະລິດຕະພັນ, ຫຼາຍຄົນຍັງຢາກລົງສວນເພື່ອເດັດຊາດ, ອົບຊາ, ດື່ມນ້ຳຊາ ແລະ ຊອກຮູ້ວັດທະນະທຳຊາ ໄທງວຽນ. ທ່ານນາງ ຈູທິໂດ້ ຮອງຜູ້ອຳນວຍການສູນຂຸດຄົ້ນສົ່ງເສີມພັດທະນາການທ່ອງທ່ຽວແຂວງ ໄທງວຽນ ໃຫ້ຮູ້ວ່າ:
ຕາແສງ ໂວແຈັງ ມີເຂດປູກຊາ ແຄກົກ ແມ່ນໜຶ່ງໃນ 5 ສະຖານທີ່ປູກຊາທີ່ມີຊື່ສຽງຂອງແຂງ ໄທງວຽນ. ປະຈຸບັນ, ແຂວງ ໄທງວຽນ ພວມພັດທະນາການທ່ອງທ່ຽວເຂດຊຸມຊົນ ຕິດພັນກັບວັດທະນະທຳຊາ. ການເຮັດການທ່ອງທ່ຽວເຂດຊຸມຊົນ ຕິດພັນກັບວັດທະນະທຳຊາອໍແກນນິກ, ທິວທັດທຳມະຊາດກັບບັນດາໂນນຊາທີ່ສວຍງາມ, ພ້ອມກັບນັ້ນ ກໍ່ແມ່ນບັນດາສວນປູກຕົ້ນໄມ້ກິນໝາກ ແລະ ສີສັນວັດທະນະທຳຂອງຊາວເຜົ່າ ຊານໄຈ.
ຈາກບັນດາຕົ້ນຊາຂຽວໃນເຂດດິນແດນຕາແສງ ໂວແຈັງ, ທິດທາງພັດທະນາໃໝ່ພວມໄດ້ຮັບການສ້າງຂຶ້ນ: ການພັດທະນາກະສິກຳປອດສານພິດ ຕິດພັນກັບການທ່ອງທ່ຽວລົງຕົວຈິງ. ເມື່ອຊາວກະສິກອນໄດ້ປ່ຽນແປງຈິນຕະນາການຜະລິດ, ອຳນາດການປົກຄອງກໍ່ໄດ້ຮ່ວມເດີນທາງ ແລະ ວິສາຫະກິດເປີດກ້ວາງຕະຫຼາດ, ຊາອໍແກນນິກ ບໍ່ພຽງແຕ່ໄດ້ສ້າງມູນຄ່າເສດຖະກິດສູງກ່ວາເທົ່ານັ້ນ, ຫາກຍັງໄດ້ປະກອບສ່ວນຮັກສາວັດທະນະທຳຊາ, ສ້າງພາບພົດແຂວງ ໄທງວຽນ ແມ່ນຈຸດນັດພົບຂອງກະສິກຳສີຂຽວ ແລະ ການພັດທະນາແບບຍືນຍົງ. ຕາແສງ ໂວແຈັງ ໃນທຸກວັນນີ້ ພວມຢັ້ງຢືນທີ່ຕັ້ງຂອງຕົນດ້ວຍການເຮັດໃຫ້ຕົ້ນຊາຕິດພັນກັບການພັດທະນາການທ່ອງທ່ຽວນີ້./.
