គម្រោងផ្លូវដែកល្បឿនលឿនហាណូយ-ក្វាងនិញ ត្រូវបានក្រុមហ៊ុនភាគហ៊ុនវិនិយោគ និងអភិវឌ្ឍន៍ផ្លូវដែកល្បឿនលឿន VinSpeed (Vingroup) ជាម្ចាស់វិនិយោគ ដោយមានទុនវិនិយោគសរុបជាង ១៤៧.០០០ ពាន់លានដុង (ជាង ៥,៦ ពាន់លានដុល្លារអាមេរិក)។ គម្រោងនេះមានប្រវែងសរុបប្រហែល ១២០ គីឡូម៉ែត្រ ដែលភ្ជាប់មជ្ឈមណ្ឌលអភិវឌ្ឍន៍សេដ្ឋកិច្ចសំខាន់ៗ ដូចជា ទីក្រុងហាណូយ ខេត្តបាក់និញ ទីក្រុងហៃផុង និងខេត្តក្វាងនិញ។ គម្រោងនេះប្រើប្រាស់រថភ្លើងល្បឿនលឿនជំនាន់ថ្មី និងទំនើបបំផុត រួមជាមួយនឹងប្រព័ន្ធទំនាក់ទំនង សញ្ញា និងឧបករណ៍ទំនើបឈានមុខគេលើពិភពលោក ដែលផ្គត់ផ្គង់ដោយក្រុមហ៊ុន Siemens Mobility (អាល្លឺម៉ង់) ហើយនឹងផ្ទេរបច្ចេកវិទ្យាឲ្យ VinSpeed ក្នុងអំឡុងពេលប្រតិបត្តិការជាបណ្ដើរៗ។
លោក Nguyen Viet Quang អនុប្រធាននិងជាអគ្គនាយក Vingroup បានចែករំលែកថា គម្រោងដឹកជញ្ជូនដ៏សំខាន់នេះ គ្រោងនឹងបញ្ចប់នៅឆ្នាំ ២០២៨ មិនត្រឹមតែរួមចំណែកដល់ការកាត់បន្ថយពេលវេលាធ្វើដំណើរប៉ុណ្ណោះទេ ប៉ុន្តែថែមទាំងបង្កើតកម្លាំងចលករដ៏ខ្លាំងក្លាសម្រាប់ការអភិវឌ្ឍសេដ្ឋកិច្ចរវាងទីក្រុងធំៗ តាមនោះ ជំរុញកំណើនអន្តរតំបន់ និងលើកកម្ពស់គុណភាពជីវភាពរស់នៅរបស់ប្រជាជន។
«ជាមួយនឹងល្បឿនធ្វើដំណើរដ៏លឿន គម្រោងនេះនឹងបើកចេញប៉ូលតភ្ជាប់ដ៏ប្រកបដោយប្រសិទ្ធភាពរវាងរដ្ឋធានី និងមជ្ឈមណ្ឌលឧស្សាហកម្ម ឡូជីស្ទិក និងទេសចរណ៍នៅក្នុងតំបន់សេដ្ឋកិច្ចសំខាន់ភាគខាងជើង ដោយរួមចំណែកជំរុញ ពាណិជ្ជកម្ម ការវិនិយោគ និងផ្ទេរកម្លាំងពលកម្មគុណភាពខ្ពស់។ ទន្ទឹមនឹងនោះ ជួយសម្រួលដល់ការអភិវឌ្ឍមូលដ្ឋាន តាមទិសដៅតភ្ជាប់តំបន់កាន់តែជិតស្និទ្ធ»។
ដោយមានល្បឿនជាអតិបរមារហូតដល់ ៣៥០ km/h ផ្លូវដែកល្បឿនលឿនហាណូយ - ក្វាងនិញ នឹងកាត់បន្ថយពេលវេលាធ្វើដំណើររវាងហាណូយ និងក្វាងនិញ ចំនួន ៥-៧ ដង។ ក្នុងនាមជាផ្លូវដែកល្បឿនលឿនអន្តរតំបន់ដំបូងគេដែលត្រូវបានអនុវត្តនៅវៀតណាម ខ្សែរថភ្លើងហាណូយ - ក្វាងនិញ មិនត្រឹមតែបង្កើតកម្លាំងចលករដ៏ខ្លាំងក្លាសម្រាប់តំបន់សេដ្ឋកិច្ចដ៏សំខាន់នៅភាគខាងជើងប៉ុណ្ណោះទេ ថែមទាំងរួមចំណែកដល់ការអនុវត្តន៍ការប្តេជ្ញាចិត្ត ក្នុងការកែលម្អសមត្ថភាពប្រកួតប្រជែងរបស់ជាតិទៀតផង។ លោក ប៊ូយ វ៉ាន់ខាំង (Bùi Văn Khắng)ប្រធានគណៈកម្មាធិការប្រជាជនខេត្តក្វាងនិញ បានឲ្យដឹងថា៖ «នៅពេលដែលគម្រោងផ្លូវដែកល្បឿនលឿន ៣៥០ km/h ត្រូវបានបញ្ចប់ ពេលវេលាធ្វើដំណើរនឹងត្រូវបានកាត់បន្ថយមកត្រឹម ២៥ នាទីប៉ុណ្ណោះ ប្រសិនបើមិនឈប់នៅស្ថានីយ៍ណាមួយ។ នេះគឺជាគុណសម្បត្តិប្រកួតប្រជែងដ៏ច្បាស់លាស់ និងជាកត្តាថ្មីមួយដែលបង្កើតឱកាសសម្រាប់ការអភិវឌ្ឍ»។
ការធ្វើដំណើរយ៉ាងឆាប់រហ័ស និងងាយស្រួលរវាងទីក្រុងនានា នឹងបង្កើតលំហសេដ្ឋកិច្ចដែលមានទំនាក់ទំនងយ៉ាងជិតស្និទ្ធ ដែលជួយសហគ្រាស កម្លាំងពលកម្មដែលមានគុណភាពខ្ពស់ និងលំហូរទុនវិនិយោគ ត្រូវបានអភិវឌ្ឍយ៉ាងខ្លាំងក្លា។ គោលដៅសំខាន់មួយនៃគម្រោងនេះ គឺដើម្បីជួយខេត្តក្វាងនិញ ជាខេត្តមួយដែលកំពុងឆ្ពោះទៅក្លាយជាទីក្រុងចំណុះមជ្ឈិម ឱ្យក្លាយជាតំណភ្ជាប់ដ៏សំខាន់នៅក្នុងបណ្តាញសេដ្ឋកិច្ចភាគខាងជើង។ ជាពិសេស ជាមួយនឹងការអភិវឌ្ឍវិស័យទេសចរណ៍ ការធ្វើដំណើរយ់ាងងាយស្រួលជាមួយទីក្រុងហាណូយ និងមូលដ្ឋានផ្សេងទៀត នឹងជួយខេត្តក្វាងនិញ ឱ្យឆ្លៀតយកប្រកបដោយប្រសិទ្ធិភាពនូវសក្តានុពលទេសចរណ៍នៃឈូងសមុទ្រហាឡុង អៀនទូ និងរមណីយដ្ឋានលំដាប់ខ្ពស់។ លោក ប៊ូយវ៉ាន់ខាំង ប្រធានគណៈកម្មាធិការប្រជាជនខេត្តក្វាងនិញ បានឲ្យដឹងថា ការតភ្ជាប់ដោយផ្ទាល់ជាមួយទីក្រុងហាណូយតាមរយៈផ្លូវដែកល្បឿនលឿន នឹងជួយឱ្យខេត្តក្វាងនិញ ក្លាយជាប៉ូលកំណើនភាគខាងកើតនៃតំបន់ទាំងមូល។ ទន្ទឹមនឹងនោះ នឹងជួយសម្រួលដល់ការរៀបចំរចនាសម្ព័ន្ធឡើងវិញនៃលំហសេដ្ឋកិច្ច ទីក្រុង កម្លាំងពលកម្ម និងទេសចរណ៍; អភិវឌ្ឍទេសចរណ៍ និងសេវាកម្មដែលមានគុណភាពខ្ពស់; បង្កើតប៉ូលកំណើនថ្មីនៅក្នុងតំបន់ស្ថានីយ៍រថភ្លើង លើកកម្ពស់ សមត្ថភាពទាក់ទាញការវិនិយោគ ធនធានមនុស្សមានគុណភាពខ្ពស់ និងកែលម្អគុណភាពជីវភាពរស់នៅរបស់ប្រជាជនយ៉ាងទូលំទូលាយ។
«យើងបានរាយការណ៍ទៅមជ្ឈិម ឱ្យខេត្តក្វាងនិញស្រាវជ្រាវការវិនិយោគលើខ្សែរថភ្លើងដែលតភ្ជាប់ពីទីក្រុងហៃផុង ទៅទីក្រុងហាឡុង ទីក្រុងម៉ុងកាយ និងតភ្ជាប់ជាមួយទីក្រុងដុងស៊ីង (ចិន) ដែលត្រូវបានរំពឹងថា នឹងក្លាយជាទម្រង់ដឹកជញ្ជូនសម្រាប់ទាំងអ្នកដំណើរ និងទំនិញ។ ខ្ញុំជឿជាក់ថា ទាំងអស់នេះគឺជាកត្តាអំណោយផលខ្លាំង ដែលទាក់ទងនឹងបរិយាកាសវិនិយោគ និងអាជីវកម្មរបស់ខេត្តនាពេលអនាគត»។
ខ្សែរថភ្លើងល្បឿនលឿនហាណូយ - ក្វាងនិញ មិនត្រឹមតែឆ្ពោះទៅរកការតភ្ជាប់មូលដ្ឋាន តាមរយៈប្រព័ន្ធដឹកជញ្ជូនទំនើបប៉ុណ្ណោះទេ ប៉ុន្តែក៏បង្កើតច្រករបៀងសេដ្ឋកិច្ចថ្មី ដោយជំរុញកិច្ចសហប្រតិបត្តិការ និងការអភិវឌ្ឍរួមនៅតំបន់ភាគខាងជើង។ ក្នុងរយៈពេលវែង គម្រោងនេះបើកចេញឱកាសដើម្បីបង្កើតឧស្សាហកម្មផ្លូវដែកទំនើបនៅវៀតណាម ជាមួយនឹងកត្តាទាំងអស់ចាប់ពីផលិតកម្ម បច្ចេកវិទ្យា រហូតដល់ប្រតិបត្តិការ និងការបណ្តុះបណ្តាលធនធានមនុស្ស។ នេះគឺជាវិស័យដែលមានតម្លៃបន្ថែមខ្ពស់ មានសមត្ថភាពរីកសាយភាយយ៉ាងទូលំទូលាយ និងដើរតួនាទីយ៉ាងសំខាន់ក្នុងដំណើរការធ្វើឧស្សាហូបនីយកម្មរបស់ប្រទេសជាតិ៕
