ລະດູດອກຈັນຜາເບັ່ງບານອວດສີຢູ່ເຂດອ່າວ ຮະລອງ
08/08/2026 12:27
[VOVWORLD] - ໃນຊຸມມື້ນີ້, ດອກຈັນຜາ (Dracaena) ໄດ້ເບັ່ງບານອວດສີພ້ອມກັນຢູ່ບັນດາເກາະຫີນຢູ່ເຂດອ່າວ ຮະລອງ. ລະດູດອກໄມ້ປີນີ້ສີສົດໃສກວ່າ ຄືດັ່ງເປັນສິ່ງພິສູດໃຫ້ແກ່ການຟື້ນຕົວທີ່ມະຫັດສະຈັນຂອງທຳມະຊາດພາຍຫຼັງພາຍຸ.
ພາຍຫຼັງພາຍຸລູກທີ 1 (Maysak) ໄປຜ່ານ, ປະຊາຊົນຢູ່ເຂດແຄມທະເລຂອງອ່າວ ຮະລອງ (ແຂວງ ກວາງນິງ) ຕົກສະເງີ້ເມື່ອເຫັນດອກຈັນຜາ ເບັ່ງບານຢູ່ບັນດາເກາະຫີນ.
ດອກໄມ້ເບັ່ງບານຢູ່ທົ່ວບັນດາເກາະໃນເຂດອ່າວ ກໍຄືບັນດາພູຫີນແຄມຝັ່ງ. ສີເຫຼືອງເຂົ້າເໝົ້າຂອງດອກໄມ້, ສີຂຽວຂອງຕົ້ນໄມ້ໃບຫຍ້າໄດ້ປະສົມປະສານກັບສີຂີ້ເທົ່າຂອງຫີນ, ຂອງທະເລທ້ອງຟ້າ ແລະ ບັນດາເຮືອຫຼາຍລຳ ໄດ້ເຮັດໃຫ້ພາບທຳມະຊາດຍິ່ງເຕັມໄປດ້ວຍຄວາມຮູ້ສຶກອາລົມຈິດ.
ຢູ່ ຫວຽດນາມ, ຕົ້ນຈັນຜາ ມີ 20 ຊະນິດທີ່ແຕກຕ່າງກັນ.
ສິ່ງທີ່ເຮັດໃຫ້ຕົ້ນຈັນຜາ ຢູ່ເຂດອ່າວ ຮະລອງ ມີຄວາມແຕກຕ່າງນັັ້ນແມ່ນ ມັນມີຢູ່ເກືອບທຸກເກາະຢູ່ເຂດອ່າວ.
ເອື້ອຍ ດ່າວທິຖຸຍ - ຜູ້ນຳທ່ຽວ ຄະນະຄຸ້ມຄອງມໍລະດົກໂລກອ່າວ ຮະລອງ - ອຽນຕື ໃຫ້ຮູ້ວ່າ ເຖິງວ່າໄດ້ຕິດພັນກັບເຂດອ່າວນີ້ເປັນເວລາ 20 ກວ່າປີ, ລະດູດອກຈັນຜາປີນີ້ຍັງເຮັດໃຫ້ເອື້ອຍມີຄວາມຕົກສະເງີ້.
ດອກຈັນຜາ ບໍ່ເບັ່ງບານແບບກະແຈກກະຈາຍຄືເມື່ອກ່ອນ, ລະດູແລ້ງປີນີ້ດອກຈັນຜາ ໄດ້ພ້ອມກັນເບັ່ງບານສະພັ່ງຍິ່ງກວ່າເວລາໃດໝົດ.
ສຳລັບຊາວທ້ອງຖິ່ນ, ລະດູດອກໄມ້ປີນີ້ຍັງມີຫຼາຍຄວາມໝາຍ ຍ້ອນກ່ອນນີ້ 2 ປີ, ເມື່ອພາຍຸລູກທີ 3 (ພາຍຸ Yagi, ພັດເຂົ້າໃນເດືອນ 9/2024) ໄດ້ພັດທຳລາຍຕົ້ນໄມ້ຢູ່ເກາະຫີນຕ່າງໆລົ້ມເກືອບທັງໝົດພຽງໃນເວລາ 2 – 3 ຊົ່ວໂມງ.
ລະດູດອກຈັນຜາ ເບັ່ງບານໃນລະດູຮ້ອນປີ 2026 ໄດ້ເປັນສິ່ງພິສູດໃຫ້ເຫັນພະລັງຊີວິດຂອງເຂດອ່າວມໍລະດົກ ພ້ອມກັບຄວາມຫວັງຕໍ່ອະນາຄົດ.
ດອກຈັນຜາ ເບັ່ງບານຢູ່ທົ່ວເປີ້້ນພູ, ເຮັດໃຫ້ຊຸມວັນລະດູຮ້ອນຢູ່ ຮະລອງ ມີສີສັນສົດໃສສວຍງາມໃນສາຍຕາຂອງປະຊາຊົນ ແລະ ແຂກທ່ອງທ່ຽວ.
Tag:
