ງານວາງສະແດງປະກອບມີໝວດເອກະສານຕົ້ນຕໍຄື: ເອກະສານໂດຍລາຊະວັງສັກດີນາ ຫວຽດນາມ ແລະ ອຳນາດການປົກຄອງ ຝລັ່ງ ຢູ່ອິນດູຈີນ ປະກາດໃຊ້ແຕ່ສະຕະວັດທີ 17 ເຖິງຕົ້ນສະຕະວັດທີ 20
 (ພາບປະກອບ hanam.gov.vn)
|
(vovworld) - ວັນທີ 4/11, ຢູ່ຫໍພິພິທະພັນແຂວງ ຮ່ານາມ, ກະຊວງຖະແຫຼງຂ່າວ ແລະ ສື່ສານ ໄດ້ສົມທົບກັບຄະນະກຳມະການປະຊາຊົນແຂວງ ຮ່ານາມ ຈັດຕັ້ງງານວາງສະແດງແຜນທີ່ ແລະ ເອກະສານ “ຮ່ວາງຊາ, ເຈື່ອງຊາຂອງ ຫວຽດນາມ - ບັນດາພະຍານຫຼັກຖານປະຫວັດສາດ ແລະ ນິຕິກຳ“. ງານວາງສະແດງປະກອບມີໝວດເອກະສານຕົ້ນຕໍຄື: ເອກະສານໂດຍລາຊະວັງສັກດີນາ ຫວຽດນາມ ແລະ ອຳນາດການປົກຄອງ ຝລັ່ງ ຢູ່ອິນດູຈີນ ປະກາດໃຊ້ແຕ່ສະຕະວັດທີ 17 ເຖິງຕົ້ນສະຕະວັດທີ 20, ເຊິ່ງໄດ້ຢືນຢັນເຖິງວິວັດແຫ່ງການສ້າງຕັ້ງ, ປະຕິບັດ ແລະ ການປົກປັກຮັກສາອະທິປະໄຕຂອງ ຫວຽດນາມ ສຳລັບໝູ່ເກາະ ຮ່ວາງຊາ ແລະ ເຈື່ອງຊາ. ບັນດາເອກະສານຂອງອຳນາດການປົກຄອງ ສາທາລະນະລັດ ຢູ່ພາກໃຕ້ຫວຽດນາມ ທີ່ປະກາດໃຊ້ໃນໄລຍະ 1954-1975, ໂດຍສືບຕໍ່ຢືນຢັນວິວັດແຫ່ງການຄຸ້ມຄອງ ບໍລິຫານ, ປະຕິບັດ ແລະ ການປົກປັກຮັກສາອະທິປະໄຕຂອງ ຫວຽດນາມ ສຳລັບສອງໝູ່ເກາະດັ່ງກ່າວ.
ກ່າວຄວາມເຫັນທີ່ງານວາງສະແດງ, ທ່ານ ຫວູດ້າຍທັ໋ງ, ຮອງປະທານຄະນະກຳມະການປະຊາຊົນແຂວງ ຮ່ານາມ ເນັ້ນໜັກວ່າ, ນີ້ແມ່ນໂອກາດເພື່ອໃຫ້ພະນັກງານ ແລະ ປະຊາຊົນແຂວງ ຮ່ານາມ ມີຄວາມເຂົ້າໃຈກວ່າກ່ຽວກັບອະທິປະໄຕຂອງ ຫວຽດນາມ ສຳລັບໝູ່ເກາະ ຮ່ວາງຊາ ແລະ ເຈື່ອງຊາ; ປະກອບສ່ວນຍົກສູງຄວາມຮັບຮູ້ ແລະ ປຸກລຸກນຳ້ໃຈສາມັກຄີ ແລະ ສະຕິຮັບຜິດຊອບໃນການປົກປັກຮັກສາອະທິປະໄຕທະເລເກາະຂອງປະເທດຊາດໃນໝູ່ປະຊາຊົນ, ພິເສດແມ່ນລຸ້ນໜຸ່ມ.
