បច្ចុប្បន្ននេះ វៀតណាមមានគម្រោង FDI ជាង ៤៦.៥០០ ដែលកំពុងមានសុពលភាព ដោយមានដើមទុនចុះបញ្ជីសរុបជាង ៥៤៣ ពាន់លានដុល្លារអាមេរិក; ដើមទុនអនុវត្តសរុបចំនួន ៣៥៧,៦ ពាន់លានដុល្លារអាមេរិក។ វិស័យ FDI កំពុងរួមចំណែកជាង ២០% នៃ GDP ប្រហែល ៧០% នៃចំណូលនាំចេញ និងបង្កើតការងារធ្វើសម្រាប់កម្មកររាប់លាននាក់។ វៀតណាមបន្តរក្សាតួនាទីជាប្រទេសដែលទាក់ទាញទុន FDI ឈានមុខគេនៅក្នុងតំបន់។ យោងតាមឧបនាយករដ្ឋមន្ត្រី ង្វៀន វ៉ាន់ ថាំង ក្នុងបរិបទដែលលំហូរទុន FDI សកលបានធ្លាក់ចុះនៅក្នុងតំបន់ជាច្រើន វៀតណាមបន្តស្ថិតក្នុងក្រុមប្រទេសដែលទាក់ទាញទុន FDI ឈានមុខគេនៅអាស៊ីអាគ្នេយ៍។
«ប្រការនេះ បានឆ្លុះបញ្ចាំងពីទំនុកចិត្តរបស់សហគមន៍ធុរកិច្ចអន្តរជាតិចំពោះយថាទស្សន៍អភិវឌ្ឍន៍ ស្ថិរភាពនយោបាយនិងសង្គម បរិយាកាសវិនិយោគ និងធ្វើអាជីវកម្មរបស់វៀតណាម។ ជាពិសេស ក្នុងប៉ុន្មានឆ្នាំថ្មីៗនេះ វៀតណាមបានកត់ត្រាវត្តមាននិងការពង្រីកការវិនិយោគដោយសាជីវកម្មធំៗជាច្រើនក្នុងវិស័យអេឡិចត្រូនិក ស៊ីមីកុងដុកទ័រ បច្ចេកវិទ្យាខ្ពស់ ថាមពល ឡូជីស្ទិក ហិរញ្ញវត្ថុ នវានុវត្តន៍ និងសេវាកម្មទំនើប។ តាមនោះ រួមចំណែកដល់ការបង្កើតប្រព័ន្ធអេកូឡូស៊ីផលិតកម្ម និងខ្សែសង្វាក់ផ្គត់ផ្គង់ថ្មីនៅវៀតណាម»។
ទោះជាយ៉ាងណាក៏ដោយ ដើម្បីឆ្លៀតយកអត្ថប្រយោជន៍ពីលំហូរទុន FDI ក្នុងការសម្រេចបាននូវកំណើនសេដ្ឋកិច្ចឱ្យបានឆាប់រហ័ស ប្រកបដោយចីរភាពនោះ ចាំបាច់ត្រូវកសាងទំនាក់ទំនងរវាងសហគ្រាស FDI និងសហគ្រាសក្នុងស្រុក។ សហគ្រាសវៀតណាមជាច្រើននៅតែចូលរួមក្នុងវិស័យដែលមានតម្លៃបន្ថែមទាប; អត្រាធ្វើមូលដ្ឋានីយកម្មក្នុងវិស័យមួយចំនួននៅតែទាប; ការរីកសាយភាយនៃបច្ចេកវិទ្យា អភិបាលកិច្ច និងផលិតភាពមិនទាន់បំពេញតម្រូវការនៃខ្សែសង្វាក់ផ្គត់ផ្គង់សកលនៅឡើយទេ។ តម្រូវការសម្រាប់ដំណាក់កាលខាងមុខនេះ គឺកែលម្អគុណភាពនៃកិច្ចសហប្រតិបត្តិការ កម្រិតនៃការរីកសាយភាយ និងភាពស៊ីសង្វាក់គ្នារវាងវិស័យ FDI និងសេដ្ឋកិច្ចក្នុងស្រុក។ ឧបនាយករដ្ឋមន្ត្រី ង្វៀន វ៉ាន់ ថាំង បានរំពឹងថា៖ «ក្នុងដំណាក់កាលអភិវឌ្ឍន៍ថ្មី វៀតណាមកំពុងផ្លាស់ប្តូរយ៉ាងខ្លាំងពី "ការទាក់ទាញ FDI យ៉ាងច្រើន" ទៅជា "កិច្ចសហប្រតិបត្តិការវិនិយោគដោយមានការជ្រើសរើស មានគុណភាព ប្រសិទ្ធភាព និងនិរន្តរភាព"។ យើងខ្ញុំមិនត្រឹមតែវាយតម្លៃ និងយកចិត្តទុកដាក់លើបរិមាណទុនដែលវិនិយោគិននាំមកចូលវៀតណាមប៉ុណ្ណោះទេ ប៉ុន្តែសំខាន់ជាងនេះទៅទៀត គឺនាំមកនូវបច្ចេកវិទ្យាអ្វី បង្កើតតម្លៃបន្ថែមអ្វី បណ្តុះបណ្តាលធនធានមនុស្សយ៉ាងដូចម្តេច តភ្ជាប់សហគ្រាសវៀតណាមឱ្យចូលរួមក្នុងខ្សែសង្វាក់ផ្គត់ផ្គង់យ៉ាងណា និងរួមចំណែកយ៉ាងដូចម្តេចសម្រាប់ការផ្លាស់ប្តូរឌីជីថល ការផ្លាស់ប្តូរបៃតង និងលើកកម្ពស់សមត្ថភាពផ្ទៃក្នុងនៃខឿនសេដ្ឋកិច្ច។ FDI ជំនាន់ថ្មីមិនត្រឹមតែមកកាន់វៀតណាមដើម្បីផលិត និងធ្វើអាជីវកម្មប៉ុណ្ណោះទេ ប៉ុន្តែត្រូវតែរួមដំណើរជាមួយវៀតណាមដើម្បីបង្កើតតម្លៃថ្មី សមត្ថភាពថ្មី និងឋានៈថ្មី នៅក្នុងខ្សែសង្វាក់តម្លៃសកលទៀតផង»។
យោងតាមអ្នកជំនាញ វៀតណាមមានសហគ្រាសជាង ១ លាន ប៉ុន្តែមានសហគ្រាសតែ៥.០០០ប៉ុណ្ណោះ ដែលបានតភ្ជាប់ដោយផ្ទាល់ទៅនឹងខ្សែសង្វាក់ផ្គត់ផ្គង់សកល ឬសារជីវកម្មពហុជាតិ។ មូលហេតុចម្បង គឺសមត្ថភាពផ្ទៃក្នុងរបស់សហគ្រាសវៀតណាម នៅពេលដែលបច្ចេកវិទ្យាមិនទាន់សម័យ ផលិតភាពទាប និងសមត្ថភាពអភិបាលកិច្ចមិនទាន់បំពេញតាមស្តង់ដារអន្តរជាតិ។ លោកស្រី Do Thi Thuy Huong អនុប្រធាននៃសមាគមសហគ្រាសអេឡិចត្រូនិកវៀតណាម បានចាត់ទុកថា៖ «ក្នុងដំណាក់កាលខាងមុខ កត្តាសម្រេចលើសមត្ថភាពបច្ចេកវិទ្យា និងនវានុវត្តន៍ផលិតកម្ម គឺជាកត្តាពិសេស ដែលសហគ្រាសវៀតណាមត្រូវយកចិត្តទុកដាក់។ សហគ្រាសដែលផ្តោតលើបច្ចេកវិទ្យា បញ្ញាសិប្បនិម្មិត (AI) ស្វ័យប្រវត្តិកម្មការផ្លាស់ប្តូរឌីជីថលបៃតង នឹងក្លាយជាសហគ្រាសដែលយកឈ្នះក្នុងការរត់ប្រណាំងដើម្បីតភ្ជាប់ទំនាក់ទំនង និងចូលរួមដោយជោគជ័យនៅក្នុងខ្សែសង្វាក់ផ្គត់ផ្គង់សកល»។
វៀតណាមកំពុងប្រឈមមុខនឹងឱកាសដ៏ធំធេងដើម្បីទទួលបានរលកថ្មីនៃការវិនិយោគក្នុងដំណើរការរៀបចំខ្សែសង្វាក់ផ្គត់ផ្គង់សកលឡើងវិញ។ ប៉ុន្តែឱកាសនេះនឹងក្លាយជាកម្លាំងចលករសម្រាប់កំណើន ប្រសិនបើលំហូរ FDI មិនឈប់នៅត្រឹមកម្រិតដែលបានចុះបញ្ជី ប៉ុន្តែបានបង្កើតចំណេះដឹង បច្ចេកវិទ្យា ធនធានមនុស្សមានគុណភាពខ្ពស់ និងមានទំនាក់ទំនងយ៉ាងស៊ីជម្រៅជាមួយសេដ្ឋកិច្ចក្នុងស្រុក។ ឧបនាយករដ្ឋមន្ត្រី ង្វៀន វ៉ាន់ ថាំង បានបន្ថែមថា៖ «ការអភិវឌ្ឍយ៉ាងខ្លាំងនូវសហគ្រាសក្នុងស្រុក និងឧស្សាហកម្មគាំទ្រ ដើម្បីឱ្យសហគ្រាសវៀតណាមអាចចូលរួមកាន់តែស៊ីជម្រៅនៅក្នុងខ្សែសង្វាក់តម្លៃសកល។ រដ្ឋនឹងបន្តមានគោលនយោបាយដើម្បីគាំទ្រសហគ្រាសក្នុងការកែលម្អសមត្ថភាពអភិបាលកិច្ច ស្តង់ដារគុណភាព នវានុវត្តន៍បច្ចេកវិទ្យា ការផ្លាស់ប្តូរឌីជីថល ការទទួលបានឥណទាន និងការតភ្ជាប់ជាមួយសាជីវកម្មពហុជាតិ។ មិនត្រឹមតែបង្កើនចំនួនសហគ្រាសដែលចូលរួមក្នុងខ្សែសង្វាក់ផ្គត់ផ្គង់ប៉ុណ្ណោះទេ ប៉ុន្តែសំខាន់ជាងនេះទៅទៀត គឺបង្កើតជួរសហគ្រាសវៀតណាម ដែលមានសមត្ថភាពក្លាយជាអ្នកផ្គត់ផ្គង់កម្រិតទី ១ និងកម្រិតទី ២ នៅក្នុងខ្សែសង្វាក់តម្លៃក្នុងតំបន់ និងសកលជាបណ្ដើរៗទៀតផង»។
កាលពីដើមខែមេសា លោកអគ្គលេខាបក្ស ប្រធានរដ្ឋ តូ ឡឹម បានចុះហត្ថលេខាលើផែនការអភិវឌ្ឍសេដ្ឋកិច្ចសង្គម ហិរញ្ញវត្ថុជាតិ ការសងបំណុលសាធារណៈ និងការវិនិយោគសាធារណៈរយៈពេលមធ្យមសម្រាប់រយៈពេល ៥ ឆ្នាំ (២០២៦-២០៣០) ក្នុងនោះ គោលនយោបាយទាក់ទាញ FDI ផ្តោតលើការផ្ទេរបច្ចេកវិទ្យា និងការតភ្ជាប់ជាមួយសហគ្រាសក្នុងស្រុក។ ប្រការនេះ បញ្ជាក់ពីការរំពឹងទុករបស់វៀតណាមចំពោះការអភិវឌ្ឍវិស័យសេដ្ឋកិច្ចដែលមានទុនវិនិយោគពីបរទេស ក្នុងទំនាក់ទំនងជិតស្និទ្ធនិងស្មើភាពគ្នាជាមួយវិស័យសេដ្ឋកិច្ចក្នុងស្រុក។ តាមនោះ បង្កើតសន្ទុះសម្រាប់រយៈពេល ១០ ឆ្នាំខាងមុខ នៅពេលដែលវៀតណាមឈានចូលដល់យុគសម័យថ្មី - យុគសម័យនៃការអភិវឌ្ឍដ៏រឹងមាំ និងវិបុលភាពរបស់ប្រទេសជាតិ៕
