ដំណើរទស្សនកិច្ចនេះ មិនត្រឹមតែរួមចំណែកធ្វើឱ្យស៊ីជម្រៅថែមទៀតទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយវៀតណាម-សិង្ហបុរីប៉ុណ្ណោះទេ ប៉ុន្តែថែមទាំងបញ្ជាក់ពីតួនាទីកាន់តែសកម្ម វិជ្ជមាន និងមានទំនួលខុសត្រូវរបស់វៀតណាមក្នុងបញ្ហាសន្តិភាព សន្តិសុខ និងកិច្ចសហប្រតិបត្តិការក្នុងតំបន់ទៀតផង។
ដំណើរទស្សនកិច្ចផ្លូវរដ្ឋនៅសិង្ហបុរីរបស់លោកអគ្គលេខាបក្ស ប្រធានរដ្ឋ តូ ឡឹម ត្រូវបានធ្វើឡើងរយៈពេលមួយឆ្នាំបន្ទាប់ពីប្រទេសទាំងពីរបានបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយ ហើយសិង្ហបុរីគឺជាប្រទេសអាស៊ានដំបូងគេដែលលោកអគ្គលេខាបក្ស ប្រធានរដ្ឋ តូ ឡឹម បានធ្វើដំណើរទស្សនាផ្លូវរដ្ឋ បន្ទាប់ពីការរៀបចំក្បាលម៉ាស៊ីនដឹកនាំសំខាន់ៗឡើងវិញ។
សម្រាប់កិច្ចសន្ទនា Shangri-La នេះជាលើកដំបូងដែលអគ្គលេខាបក្ស ប្រធានរដ្ឋវៀត ណាមត្រូវបានអញ្ជើញឱ្យថ្លែងសុន្ទរកថាបើកប្រធានបទ។ ប្រការនេះ បង្ហាញពីការវាយតម្លៃខ្ពស់ចំពោះតួនាទីដ៏សំខាន់ និងមានការទទួលខុសត្រូវរបស់វៀតណាមក្នុងបញ្ហាតំបន់ និងអន្តរជាតិ។
ធ្វើឱ្យស៊ីជម្រៅថែមទៀតនូវទំនាក់ទំនងវៀតណាម-សិង្ហបុរី
ចំណុចលេចធ្លោនៃកិច្ចសហប្រតិបត្តិការរវាងវៀតណាមនិងសិង្ហបុរី នាពេលបច្ចុប្បន្ន គឺវិស័យសេដ្ឋកិច្ច ដែលជាគំរូនៃកិច្ចសហប្រតិបត្តិការដ៏ជោគជ័យនៅក្នុងអាស៊ាន។ មណ្ឌលឧស្សាហកម្មសិង្ហបុរី (VSIP) ចំនួន ២០ ជាគំរូនៃកិច្ចសហប្រតិបត្តិការរវាងវៀតណាមនិងសិង្ហបុរី ដោយផ្តោតលើបច្ចេកវិទ្យាខ្ពស់ និងការអភិវឌ្ឍប្រកបដោយចីរភាព មានវត្តមាននៅក្នុងមូលដ្ឋានជាច្រើននៅវៀតណាម។ ភាគីទាំងពីរក៏កំពុងខិតខំសម្រេចឱ្យបានមណ្ឌលឧស្សាហកម្ម VSIP ចំនួន ៣០ នៅឆ្នាំនេះ ដើម្បីរំលឹកខួប ៣០ឆ្នាំបើកដំណើរការ VSIP នៅវៀតណាម។
បច្ចុប្បន្ននេះ ប្រទេសទាំងពីរកំពុងផ្តោតលើការជំរុញកិច្ចសហប្រតិបត្តិការក្នុងវិស័យដែលមានគុណភាពខ្ពស់ដូចជា៖ សេដ្ឋកិច្ចឌីជីថល សេដ្ឋកិច្ចបៃតង បញ្ញាសិប្បនិម្មិត និង សេមីកុងដុកទ័រ។ ទាំងនេះគឺជាវិស័យមានសក្តានុពលខ្ពស់ ដែលភាគីទាំងពីរបានកំណត់ជាសសរស្តម្ភក្នុងកិច្ចសហប្រតិបត្តិការសេដ្ឋកិច្ចវៀតណាម-សិង្ហបុរីនាពេលខាងមុខ។ នៅក្នុងបរិបទនេះ ដំណើរទស្សនកិច្ចផ្លូវរដ្ឋរបស់លោកអគ្គលេខាបក្ស ប្រធានរដ្ឋ តូ ឡឹម នៅសិង្ហបុរី គឺជាឱកាសមួយសម្រាប់ប្រទេសទាំងពីរ ក្នុងការជំរុញកិច្ចសហប្រតិបត្តិការក្នុងវិស័យសំខាន់ៗឱ្យកាន់តែស៊ីជម្រៅ ជាពិសេសវិស័យដ៏មានសក្តានុពលទាំងនេះ។ អនុរដ្ឋមន្ត្រីក្រសួងការបរទេសវៀតណាម លោក ង្វៀន ម៉ាញ គឿង បានឱ្យដឹងថា៖ “ក្នុងដំណើរទស្សនកិច្ចលើកនេះ ប្រទេសទាំងពីរនឹងជំរុញកិច្ចសហប្រតិបត្តិការលើការតភ្ជាប់បច្ចេក វិទ្យា។ យើងនឹងអនុវត្តគំនិតផ្តួចផ្តើម តភ្ជាប់បច្ចេកវិទ្យា TechConnect វៀតណាម-សិង្ហបុរី ដើម្បីតភ្ជាប់ "ភាគី" ទាំងបីនៃប្រទេសទាំងពីរ គឺ៖ រដ្ឋាភិបាល អ្នកវិទ្យាសាស្ត្រ និងអាជីវកម្ម ដើម្បីអនុវត្តកិច្ចសហប្រតិបត្តិការតភ្ជាប់បច្ចេកវិទ្យារវាងប្រទេសទាំងពីរប្រកបដោយប្រសិទ្ធភាព និងជាក់ស្តែង។ ឆ្ពោះទៅរកការបង្កើតប្រព័ន្ធអេកូឡូស៊ីសម្រាប់កិច្ចសហប្រតិបត្តិការតភ្ជាប់បច្ចេកវិទ្យារវាងវៀតណាម និងសិង្ហបុរី”។
កំណត់តួនាទី និងសំឡេងរបស់វៀតណាមនៅក្នុងរចនាសម្ព័ន្ធតំបន់
នៅសិង្ហបុរី លោកអគ្គលេខាបក្ស ប្រធានរដ្ឋ តូ ឡឹម បានចូលរួម និងថ្លែងសុន្ទរកថាសំខាន់នៅក្នុងកិច្ចសន្ទនា Shangri-la ២០២៦។ នេះគឺជាវេទិកាសន្តិសុខ និងការពារជាតិឈានមុខគេនៅក្នុងតំបន់អាស៊ី-ប៉ាស៊ីហ្វិក ដែលបង្កើតឡើងដោយវិទ្យាស្ថានយុទ្ធសាស្ត្រអន្តរជាតិចាប់តាំងពីឆ្នាំ ២០០២ មក។ កិច្ចសន្ទនានេះ មានអ្នកចូលរួមជាង ៥៥០ នាក់មកពីភ្នាក់ងារការពារជាតិ និងសន្តិសុខនៃប្រទេសជាង ៤០ នៅទូទាំងពិភពលោក ដោយចែករំលែកចក្ខុវិស័យ និងផ្លាស់ប្តូរទស្សនៈលើបញ្ហាយុទ្ធសាស្ត្រ ការកសាងទំនុកចិត្ត និងកិច្ចសហប្រតិបត្តិការលើសន្តិសុខ និងការពារជាតិ។
អស់រយៈពេលជាច្រើនឆ្នាំមកហើយ វៀតណាមជានិច្ចកាលប្រកាន់ខ្ជាប់ខ្ជួននូវគោលនយោបាយការបរទេសឯករាជ្យ ខ្លួនទីពឹងខ្លួន ពហុភាគីភាវូបនីយកម្ម និងពិពិធកម្មទំនាក់ទំនងអន្តរជាតិ; គោលការណ៍សន្តិភាព កិច្ចសហប្រតិបត្តិការ និងការគោរពច្បាប់អន្តរជាតិ។ ទាំងនេះ បានជួយវៀតណាមឱ្យក្លាយជាដៃគូដែលអាចទុកចិត្តបាន ជាស្ពានតភ្ជាប់កិច្ចសន្ទនា និងជាកត្តារក្សាតុល្យភាពនៅក្នុងតំបន់។ ការដែលលោកអគ្គលេខាបក្ស ប្រធានរដ្ឋ តូ ឡឹម បានថ្លែងសុន្ទរកថានៅក្នុងកិច្ចសន្ទនា Shangri-La ក៏ជាឱកាសសម្រាប់វៀតណាមក្នុងការបង្ហាញសារដ៏ច្បាស់លាស់អំពីចក្ខុវិស័យរបស់ខ្លួនចំពោះសន្តិសុខក្នុងតំបន់៖ មិនជ្រើសរើសខាងដើម្បីប្រឈមមុខដាក់គ្នា និងមិនប្រកួតប្រជែងអំណាចទេ ប៉ុន្តែជំរុញកិច្ចសហប្រតិបត្តិការ ការសន្ទនា និងកសាងទំនុកចិត្តជាយុទ្ធសាស្ត្រ។ នៅក្នុងបរិបទដែលចំណុចក្តៅផ្នែកសន្តិសុខជាច្រើននៅតែមានហានិភ័យនៃការឡើងជណ្ដើរ សំឡេងរបស់វៀតណាមក្នុងការលើកកម្ពស់ច្បាប់អន្តរជាតិ ការគោរពអធិបតេយ្យភាព ការធានាសន្តិភាព និងស្ថិរភាពគឺមានតម្លៃជាងពេលណាៗទាំងអស់។ អនុរដ្ឋមន្ត្រីក្រសួងការបរទេស លោក ង្វៀន ម៉ាញ គឿង បានលើកច្បាស់ថា៖ “វៀតណាមត្រូវបានវាយតម្លៃខ្ពស់ ពីព្រោះយើងធ្វើសមាហរណកម្មយ៉ាងស៊ីជម្រៅទៅក្នុងពិភពលោក និងតំបន់ ប៉ុន្តែយើងនៅតែរក្សាបាននូវគោលនយោបាយឯករាជ្យ និងខ្លួនទីពឹងខ្លួន។ សុន្ទរកថារបស់លោកអគ្គលេខាបក្ស ប្រធានរដ្ឋរដ្ឋ តូ ឡឹម នៅក្នុងកិច្ចសន្ទនា Shangri-La ឆ្នាំនេះ នឹងផ្ញើរសារនិងបង្ហាញទស្សនៈរបស់វៀតណាមលើទិសដៅយុទ្ធសាស្ត្រ ដើម្បីដោះស្រាយបញ្ហាដែលកំពុងកើតឡើង នៅក្នុងដំណើរការផ្លាស់ប្តូររចនាសម្ព័ន្ធតំបន់ និងអន្តរជាតិ”។
ការចូលរួមរបស់មេដឹកនាំកំពូលវៀតណាមនៅក្នុងវេទិកានេះ ក៏ឆ្លុះបញ្ចាំងពីការផ្លាស់ប្តូរនៅក្នុងការត្រិះតិះនៃកិច្ចការបរទេសរបស់ប្រទេសផងដែរ៖ ពីម្ចាស់ការធ្វើសមាហរណកម្ម ទៅជាម្ចាស់ការចូលរួមចំណែកក្នុងការបង្កើតរូបរាងបញ្ហាក្នុងតំបន់ និងពិភពលោក។ ឯកអគ្គរដ្ឋទូតវៀតណាមប្រចាំនៅសិង្ហបុរី លោក ត្រឹន ភឿក អាញ បានបញ្ជាក់ថា៖ “ឆ្នាំនេះ មេដឹកនាំជាន់ខ្ពស់បំផុតរបស់វៀតណាម គឺលោកអគ្គលេខាបក្ស ប្រធានរដ្ឋ ត្រូវបានអញ្ជើញធ្វើជាវាគ្មិន។ នេះគឺជាព្រឹត្តិការណ៍ដ៏សំខាន់មួយ ហើយក៏ជាឱកាសដើម្បីបញ្ជូនសារមួយ តាមនោះបង្ហាញពីឋានៈ កិត្យានុភាព និងសំឡេងរបស់វៀតណាមនៅលើឆាកអន្តរជាតិ ជាពិសេសក្នុងវិស័យសន្តិសុខ និងការពារជាតិក្នុងតំបន់ និងពិភពលោក”។
ដំណើរទស្សនកិច្ចផ្លូវរដ្ឋនៅសិង្ហបុរី និងការចូលរួមក្នុងកិច្ចសន្ទនា Shangri-La របស់លោកអគ្គលេខាបក្ស ប្រធានរដ្ឋ តូ ឡឹម គឺជាជំហានការទូតដ៏មានអត្ថន័យជាយុទ្ធសាស្ត្រ។ នេះគឺជាការបន្តគោលនយោបាយការបរទេសឯករាជ្យ និងខ្លួនទីពឹងខ្លួនរបស់វៀតណាមផង ហើយបង្ហាញយ៉ាងច្បាស់អំពីតួនាទីកាន់តែខ្ពស់របស់វៀតណាមនៅលើឆាកអន្តរជាតិទៀត ផង។ នៅក្នុងពិភពលោកដែលមានភាពមិនប្រាកដប្រជាជាច្រើន វៀតណាមកំពុងបង្ហាញពីរូបភាពនៃប្រទេសមួយដែលមានទំនួលខុសត្រូវ ម្ចាស់ការ ដែលត្រៀមខ្លួនជាំស្រេចសម្រាប់ចូលរួមចំណែកដល់សន្តិភាព ស្ថិរភាព និងការអភិវឌ្ឍនៅក្នុងតំបន់ និងទូទាំងពិភពលោក៕
