ໃນຂະນະນັ້ນ, ອົງການຈັດຕັ້ງບໍ່ຂຶ້ນກັບລັດຖະບານ ເຄື່ອນໄຫວເພື່ອຕ້ານໄພອຶດຫິວ ແລະ ທຸກຍາກ (AAH) ໄດ້ກ່າວເຕືອນວ່າ ໂລກລະບາດດັ່ງກ່າວ ອາດຈະເຮັດໃຫ້ ພາກພື້ນ ອາເມລິກາ ລາຕິນ ມີຜູ້ທຸກຍາກຕື່ມອີກ 29 ລ້ານຄົນ, ກໍຄືຕ້ອງປະເຊີນໜ້າກັບບັນດາສິ່ງທ້າທາຍຈາກຊາວອົບພະຍົບ. ໃນແຈ້ງການໜຶ່ງທີ່ເປັນທາງການ, ອົງການ AAH ໄດ້ສະແດງຄວາມວິຕົກກັງວົນເປັນພິເສດຕໍ່ເລື່ອງຊາວອົບພະຍົບກັບມາບ້ານເກີດເມືອງນອນ ຍ້ອນເສດຖະກິດຖືກຊຸດໂຊມ ແລະ ສະພາວະສຸກເສີນຂອງບັນດາປະຊາຄົມຊາວທ້ອງຖິ່ນຢູ່ບັນດາເຂດຊາຍແດນ ພ້ອມທັງໃຫ້ຂໍ້ສັງເກດວ່າ ອາເມລິກາ ລາຕິນ ຢ້ານກົວຕໍ່ໄພອຶດຫິວ ເຊິ່ງໂລກລະບາດໂຄວິດ - 19 ກໍ່ຂຶ້ນ ແມ່ນຮ້າຍແຮງກວ່າ ໂລກລະບາດດັ່ງກ່າວອີກຊໍ້າ.

ອົງການອະນາໄມໂລກ ແລະ ກອງທຶນເພື່ອເດັກນ້ອຍ ແຫ່ງ ສປຊ (UNICEF) ກໍຖືວ່າ: ໂລກລະບາດໂຄວິດ - 19 ພວມເຮັດໃຫ້ເດັກນ້ອຍຈໍານວນ 80 ລ້ານຄົນ ທີ່ມີອາຍຸຕໍ່າກວ່າ 1 ປີໃນທົ່ວໂລກ ປະສົບກັບຄວາມສ່ຽງ ຍ້ອນລາຍການສັກຢາວັກຊີນທົ່ວໄປ ຖືກຂາດວັກຂາດຕອນ.