ນັກວິສາວະກອນຂອງບໍລິສັດ ມາບຳລຸງສະຖານີຕິດຕາມແມງໄມ້   ໃນປີນີ້, ບໍລິສັດ RYNAN Technologies ຫວຽດນາມ ຈະສົ່ງອອກລະບົບຕິດຕາມແມງໄມ້ອັດສະລິຍະ 50 ລະບົບໄປຂາຍໃຫ້ ຍີ່ປຸ່ນ ຕົວເລກນີ້ຍັງຈະເພີ່ມຂຶ້ນໃນປີ 2024. ໂດຍແມ່ນມາດຕະການເຕັກໂນໂລຊີສູງໃນການພັດທະນາກະສິກຳ, ຜະລິດຕະພັນຂອງບໍລິສັດນຳໃຊ້ປັນຍາປະດິດ ເພື່ອສັງເກດ ສະຖີຕິ ຈຳນວນລະດັບ ບັນດາປະເພດແມງໄມ້ທີ່ມີປະໂຫຍດ ຫຼື ທຳຮ້າຍ ແລະ ສົ່ງຜົນດ້ວຍຮູບການເປັນແຜນວາດ. ທ່ານ ຖາຍຫງວຽນຮວ່າຍທຽນ ຜູ້ຄຸ້ມຄອງໂຄງການພັດທະນາພື້ນຖານກະສິກຳດີຈີຕອນ VDAPES  ຂອງບໍລິສັດ RYNAN Technologies ຫວຽດນາມໃຫ້ຮູ້ວ່າ: ຜະລິດຕະພັນເຕັກໂນໂລຊີ make in Viet Nam  ນີ້ ໄດ້ສະແດງໃຫ້ເຫັນແຈ້ງການສົມທຽບລະຫວ່າງດ້ານດີ ແລະ ດ້ານອ່ອນຂອງແມງໄມ້ ຈາກນັ້ນ ກໍ່ຊ່ວຍໃຫ້ຊາວກະສິກອນມີການສັງເກດໂດຍສັງລວມ ກ່ຽວກັບລະດັບດຸ່ນດ່ຽງຂອງລະບົບນິເວດ. ດ້ວຍລະບົບຕິດຕາມກວດກາແມງໄມ້ອັດສະລິຍະ, ຊາວກະສິກອນສາມາດຕິດຕາຂໍ້ມູນຂ່າວສານຜ່ານໂທລະສັບມືຖື ບໍ່ຕ້ອງການລົງນາກວດສະພາບສັດຕູພືດທຳລາຍ ຫຼື ໄປຈັບ ຫຼື ນັບຈຳນວນແມງໄມ້ຕາມວິທີປະເພນີ. ທ່ານ ຖາຍຫງວຽນຮວ່າຍທຽນ ເວົ້າວ່າ:       “ລະບົບຕິດຕາມແມງໄມ້ສວມບົດບາດເປັນເຄື່ອງມື ຊ່ວຍຊາວກະສິກອນຕິດຕາມແມງໄມ້ທຳຮ້າຍ ຫຼື ແມງໄມ້ນຳມາເຊິ່ງຜົນປະໂຫຍດຢູ່ຕາມທົ່ງນາ. ປັນຍາປະດິດໄດ້ສະໜອງ, ສະຖີຕິ ຊ່ວຍໃຫ້ຜູ້ຄຸ້ມຄອງກໍ່ຄືຊາວກະສິກອນ ເປັນເຈົ້າການຄວບຄຸມສະພາບສັດຕູພືດທຳລາຍ, ມີແຜນຮັບມືຢ່າງທັນການ ແນໃສ່ຊ່ວຍໃຫ້ລະດູການຜະລິດໄດ້ຮັບຜົນດີ”.        ດ້ວຍທ່າແຮງທາງດ້ານເຕັກໂນໂລຊີ, ລະບົບຕິດຕາມແມງໄມ້ອັດສະລິຍະເຄື່ອນໄຫວດ້ວຍພະລັງງານແສງຕາເວັນ ຮັບປະກັນຄວາມປອດໄພກ່ຽວກັບໄຟຟ້າ ເມື່ອເຄື່ອນໄຫວ ພິເສດໃນເວລາຝົນຕົກ ແລະ ລົມແຮງສາມາດຕິດຕັ້ງຢ່າງສະດວກສະບາຍ. ທ່ານ ຖາຍຫງວຽນຮວ່າຍທຽນ ໃຫ້ຮູ້ຕື່ມອີກວ່າ:        “ລະບົບຕິດຕາມແມງໄມ້ ນຳໃຊ້ປັນຍາປະດິດໄດ້ຊ່ວຍຮັບຮູ້ສະຖີຕິແມງໄມ້ຫຼາຍກວ່າ 150 ປະເພດທີ່ແຕກຕ່າງກັນ. ພາຍຫຼັງຂໍ້ມູນຖືກເກັບກຳກັ່ນຕອງ ແລະ ວິໄຈແລ້ວ ໝາກຜົນຈະຖືກສົ່ງດ້ວຍຮູບການເປັນແຜນວາດສະແດງໃຫ້ເຫັນແຈ້ງ ການສົມທຽບລະຫວ່າງແມງໄມ້ທຳຮ້າຍ ແລະ ແມງໄມ້ນຳມາເຊິ່ງຜົນປະໂຫຍດ”.