ກ່າວຄຳເຫັນໄຂລາຍການ, ທ່ານ ຫງວຽນແມັ້ງເກື່ອງ, ຮອງປະທານຄະນະກຳມະການປະຊາຊົນນະຄອນ ໂຮ່ຈີມິນ ເນັ້ນໜັກວ່າ 50 ປີທີ່ໃສ່ຊື່ ລຸງໂຮ່ ແມ່ນ 50 ປີທີ່ນະຄອນມີການປ່ຽນແປງຢ່າງແຮງ ແລະ ຕໍ່ເນື່ອງ, ຈາກຕົວເມືອງທີ່ຖືກຜົນເສຍຫາຍຢ່າງໜັກໜ່ວງພາຍຫຼັງສົງຄາມ ໄດ້ກາຍເປັນສູນກາງໃຫຍ່ທາງດ້ານເສດຖະກິດ, ວັດທະນະທຳ, ວິທະຍາສາດ - ເຕັກໂນໂລຢີ ແລະ ນະວັດຕະກຳ ຂອງທົ່ວປະເທດ.
ຕາມທ່ານ ຫງວຽນແມັ້ງເກື່ອງແລ້ວ, ຜ່ານການປະສານສົມທົບລະຫວ່າງລາຍການສະແດງຍຸກທັນສະໄໝ ແລະ ເຕັກໂນໂລຢີ 3D Mapping, ນະຄອນ ໂຮ່ຈີມິນ ປາດຖະໜາຢາກສົ່ງສານກ່ຽວກັບນະຄອນແຫ່ງໄມຕີຈິດ, ມີຄວາມຂະຫຍັນຂັນເຄື່ອນ, ມີຫົວຄິດປະດິດສ້າງ, ມີການເຊື່ອມໂຍງ ແລະ ພັດທະນາແບບຍືນຍົງ, ເຄົາລົບອະດີດຕະການ, ກ້າວເດີນຢ່າງໝັ້ນແກ່ນໃນປັດຈຸບັນ ແລະ ມຸ່ງໄປເຖິງອະນາຄົດ ອອກສູ່ປະຊາຊົນ, ເພື່ອນມິດຢູ່ພາຍໃນ ແລະ ແຂກທ່ອງທ່ຽວສາກົນ.
ໃນເວລາເກືອບ 30 ນາທີ, ຜ່ານສອງລາຍການສະແດງ 3D Mapping ມາຈາກບັນດາຫົວໜ່ວຍຂອງ ຫວຽດນາມ ແລະ ຝລັ່ງ, ດ້ານໜ້າຂອງສຳນັກງານຄະນະກຳມະການປະຊາຊົນນະຄອນ ໂຮ່ຈີມິນ ເບິ່ງຄືວ່າໄດ້ສວມເສື້ອຜືນໃໝ່, ພາຜູ້ຊົມໄປຜ່ານບັນດາຂີດໝາຍປະຫວັດສາດ, ຄຸນຄ່າວັດທະນະທຳທີ່ເປັນມູນເຊື້ອ ແລະ ຄວາມມຸ່ງຫວັງເຊື່ອມໂຍງຂອງນະຄອນໃນຍຸກສະໄໝໃໝ່.
ການປະສານສົມທົບລະຫວ່າງຮູບພາບ, ດົນຕີ ແລະ ແສງສີໄດ້ສ້າງເປັນສະຖານທີ່ສິລະປະທີ່ເຕັມໄປດ້ວຍຄວາມຮູ້ສຶກຕື້ນຕັນ, ສະແດງໃຫ້ເຫັນການປະສົມປະສານລະຫວ່າງຄວາມເປັນມູນເຊື້ອ ແລະ ທັນສະໄໝ, ລະຫວ່າງສີສັນຂອງວັດທະນະທຳຂອງຊາດ ແລະ ຈິດໃຈເຊື່ອມໂຍງເຂົ້າກັບສາກົນ.
ຕິດຕາມລາຍການ, ອ້າຍ ເຈິ່ນແທັງລາມ ຊາວນະຄອນ ໂຮ່ຈີມິນ ໃຫ້ຮູ້ວ່າ ອ້າຍຮູ້ສຶກປະທັບໃຈຕໍ່ການປ່ຽນແປງໃໝ່ກ່ຽວກັບພາບ ແລະ ເນື້ອໃນຂອງບັນດາລາຍການສະແດງປີນີ້, ພິເສດແມ່ນບັນດາລາຍການສະແດງຫວນຄືນຍຸກສະໄໝ ດ້າຍຫວຽດ, ຊຸດອາພອນທີ່ເປັນມູນເຊື້ອ ແລະ ຮູບພາບຊຸດເສື້ອຍາວ ຫວຽດນາມ.
ພາບຈຳນວນໜຶ່ງທີ່ງານວາງສະແດງ:
