ເລື່ອງຮັກສາທ່າເຕີບໂຕ, ຮັກສາເສດຖະກິດມະຫາພາກເປັນປົກກະຕິ ແລະ ປັບປຸງຄວາມໄວ້ເນື້ອເຊື່ອໃຈຂອງນັກລົງທຶນຮຽກຮ້ອງໃຫ້ທົ່ວລະບົບການເມືອງຕ້ອງໃຫ້ຄວາມເອົາໃຈໃສ່ຢູ່ໃນລະດັບສູງສຸດ.
ຊຸກຍູ້ບັນດາກຳລັງໜູນເຕີບໂຕຢ່າງຂ້ຽວຂາດ
ຈາກການຊີ້ນຳຂອງສູນກາງ, ບັນດາກະຊວງ, ຂະແໜງການ ແລະ ພາກສ່ວນຕ່າງໆ ລ້ວນແຕ່ເພີ່ມມາດຕະການເພື່ອປະຕິບັດຄຳສັ່ງຊີ້ນຳ.
ສຳລັບຂະແໜງອຸດສາຫະກຳ ແລະ ການຄ້າ, ເພື່ອບັນລຸເປົ້າໝາຍເຕີບໂຕອຸດສາຫະກຳ 6 ເດືອນທ້າຍປີ 2026 ໃຫ້ໄດ້ປະມານ 12 – 14%, ທ່ານ ຟ້າມວັນກວັນ, ຮອງຫົວໜ້າກົມອຸດສາຫະກຳ, ກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ ໄດ້ຮີບເຮັ່ງສ້າງຍຸດທະສາດພັດທະນາຂະແໜງອຸດສາຫະກຳ ແລະ ການຄ້າ, ໃນນັ້ນ ຕະຫຼາດມີບົດບາດນຳພາ, ພະລັງງານຮ່ວມເດີນທາງ ແລະ ອຸດສາຫະກຳແມ່ນກຳລັງໜູນຕົ້ນຕໍ ເພື່ອຜັນຂະຫຍາຍ, ແນໃສ່ບັນລຸເປົ້າໝາຍທີ່ໄດ້ວາງອອກ. ທ່ານກ່າວວ່າ:
“ທີໜຶ່ງ, ຈັດເນື້ອທີ່ດິນກວ້າງຂວາງຢ່າງພຽງພໍ ເພື່ອດຶງດູດບັນດານັກລົງທຶນໃຫຍ່, ບັນດາກຸ່ມບໍລິສັດເຂົ້າມາລົງທຶນ. ທີສອງແມ່ນ, ແກ້ໄຂບັນດາຈຸດອຸດຕັນໃນໂຄງການໄຟຟ້າຂະໜາດໃຫຍ່, ເພື່ອພັດທະນາ, ຕອບສະໜອງ ມາດຖານກ່ຽວກັບໄຟຟ້າຢ່າງຄົບຖ້ວນ ກ່ອນທີ່ຜັນຂະຫຍາຍບັນດາໂຄງການເຫຼົ່ານັ້ນ. ພວກຂ້າພະເຈົ້າຈະສືບຕໍ່ພັດທະນາຕະຫຼາດ, ຊຸກຍູ້ຕະຫຼາດສົ່ງອອກ ໄປຄຽງຄູ່ກັບການເປີດກວ້າງຕະຫຼາດພາຍໃນປະເທດ.”
ໃນຂະນະນັ້ນ, ເພື່ອຍົກວົງເງິນສົ່ງອອກສິນໃນນ້ຳ, ເຊິ່ງເປັນຂົງເຂດທີ່ປະກອບມາດຕາຖ່ວງສົ່ງອອກສູງຂອງ ຫວຽດນາມ, ໃຫ້ຫຼາຍກວ່າ 12 ຕືິ້ USD ໃນປີ 2026 ນັ້ນ, ສະຫະສະມາຄົມປຸງແຕ່ງ ແລະ ການສົ່ງອອກສິນໃນນ້ຳ ຫວຽດນາມ (VASEP) ພວມຍູ້ແຮງການເຂົ້າເຖິງບັນດາຕະຫຼາດອື່ນ, ໄປຄຽງຄູ່ກັບບັນດາຕະຫຼາດທີ່ເປັນມູນເຊື້ອ. ທ່ານນາງ ເລຮັ່ງ, ຮອງເລຂານຸການ ສະຫະສະມາຄົມ VASEP ເນັ້ນໜັກວ່າ:
“ຕະຫຼາດ ຈີນ ຍັງມີໂອກາດເຕີບໂຕຢ່າງແຮງ, ໂດຍສະເພາະແມ່ນສຳລັບກຸ້ງຊະນິດຕ່າງໆ, ຈີນ ຈະເພີ່ມທະວີການນຳເຂົ້າບັນດາຜະລິດຕະພັນຄື: ກຸ້ງລາຍເສືອ, ກຸ້ງມັງກອນຈາກ ຫວຽດນາມ. ຕ້ອງໝູນໃຊ້ໂອກາດຈາກບັນດາຕະຫຼາດທີ່ມີການຜັນຜວນໜ້ອຍ ແລະ ພວມມີທ່າໄດ້ປຽບກ່ຽວກັບພູມີສາດ, ກ່ຽວກັບຄ່າ logistics, ຄື: ອາຊຽນ, ຍີ່ປຸ່ນ, ສ.ເກົາຫຼີ… ເພີ່ມມາດຕາຖ່ວງຜະລິດສິນຄ້າປຸງແຕ່ງເລິກຕື່ມອີກ, ປົວແປງປະສິດທິຜົນການຜະລິດເພື່ອມີຜະລິດຕະພັນທີ່ມີລາຄາແກ້ງແຍ້ງດີກວ່າ”.
ທ້ອງຖິ່ນຕ່າງໆກໍພວມສະແດງຄວາມຕັດສິນໃຈສູງໃນການຫັນເປົ້າໝາຍເຕີບໂຕໃຫ້ປະກົດຜົນເປັນຈິງ ບົນພື້ນຖານເສີມຂະຫຍາຍທ່າໄດ້ປຽບສະເພາະຂອງແຕ່ລະເຂດພາກ.
ສະແດງໃຫ້ເຫັນຄວາມສາມາດໃນການປະຕິບັດ
ນະໂຍບາຍຊີ້ຄາດແຕ່ລະສະບັບ ພວມໄດ້ຜັນຂະຫຍາຍດ້ວຍຈິດໃຈຮີບເຮັ່ງ, ຂ້ຽວຂາດ, ເພາະວ່າ ໝາກຜົນຂອງ 6 ເດືອນທ້າຍປີ ຈະສ້າງພື້ນຖານໃຫ້ແກ່ການຜັນຂະຫຍາຍບັນດາເປົ້າໝາຍພັດທະນາໃນຊຸມປີຕໍ່ໄປ.
ໃນກອງປະຊຸມກັບບັນດາກະຊວງ, ຂະແໜງການກ່ຽວກັບສະພາບການພັດທະນາໃນ 6 ເດືອນຕົ້ນປີ, ໜ້າທີ່ 6 ເດືອນທ້າຍປີ ທີ່ດຳເນີນຫວ່າງມໍ່ໆມານີ້, ທ່ານ ເລມິງຮຶງ ນາຍົກລັດຖະມົນຕີ ຫວຽດນາມ ໄດ້ເນັ້ນໜັກອີກເທື່ອໜຶ່ງວ່າບຸລິມະສິດແຖວໜ້າແມ່ນສືບຕໍ່ຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ຮັບປະກັນຄວາມດຸ່ນດ່ຽງໃຫຍ່ຂອງພື້ນຖານເສດຖະກິດ ແລະ ປັບປຸງຄວາມໄວ້ເນື້ອເຊື່ອໃຈຂອງຕະຫຼາດ. ທ່ານນາຍົກລັດຖະມົນຕີ ເລມິງຮຶງ ສະເໜີວ່າ:
“ຂະແໜງໃດ, ທ້ອງຖິ່ນໃດທີ່ໄດ້ບັນລຸ ແລະ ລື່ນກາຍເປົ້າໝາຍເຕີບໂຕໃນ 6 ເດືອນຕົ້ນປີແລ້ວ ຈະສືບຕໍ່ສູ້ຊົນເພື່ອບັນລຸລະດັບສູງກວ່າອີກ. ບັນດາຂະແໜງການ, ທ້ອງຖິ່ນໃດທີ່ຍັງບໍ່ທັນບັນລຸໄດ້ແມ່ນຕ້ອງຕັດສິນໃຈປະຕິບັດໃຫ້ສຳເລັດ, ພິເສດແມ່ນນະຄອນຫຼວງ ຮ່າໂນ້ຍ ແລະ ນະຄອນ ໂຮ່ຈີມິນ ພ້ອມກັບບັນດາທ້ອງຖິ່ນທີ່ເປັນກຳລັງໜູນເຕີບໂຕ. ໃນແຜນການຂອງລັດຖະບານ ໄດ້ມອບຄາດໝາຍ, ໜ້າທີ່ໃຫ້ແກ່ແຕ່ລະຂະແໜງ, ແຕ່ລະຂົງເຂດ, ແຕ່ລະບໍລິເວນຢ່າງລະອຽດແລ້ວ, ສະນັ້ນ, ຂ້າພະເຈົ້າສະເໜີໃຫ້ບັນດາກະຊວງ, ຂະແໜງການ,ໂດຍສະເພາະແມ່ນບັນດາແຂວງ, ນະຄອນຂຶ້ນກັບສູນກາງ ໃຫ້ຄວາມເອົາໃຈໃສ່ ແລະ ຜັນຂະຫຍາຍການປະຕິບັດຕາມແຜນການ, ມາດຕະການບໍລິຫານຂອງລັດຖະບານ”.
ໄປຄຽງຄູ່ກັບບັນດາເປົ້າໝາຍເຕີບໂຕແລ້ວ, ການພັດທະນາເສດຖະກິດ ຕ້ອງຕິດພັນກັບການຮັບປະກັນສະຫວັດດີການສັງຄົມ, ການພັດທະນາຊັບພະຍາກອນມະນຸດທີ່ມີຄຸນນະພາບສູງ, ຊຸກຍູ້ການຫັນເປັນດີຈີຕອນ, ຫັນເປັນສີຂຽວ ແລະ ໝູນໃຊ້ວິທະຍາສາດ - ເຕັກໂນໂລຢີ.
6 ເດືອນທ້າຍປີ ບໍ່ພຽງແຕ່ແມ່ນໄລຍະສຸດທ້າຍຂອງແຜນການທັງປີ 2026 ເທົ່ານັ້ນ, ຫາກຍັງແມ່ນການທົດລອງສຳລັບຄວາມສາມາດຈັດຕັ້ງການປະຕິບັດຂອງທັງລະບົບການເມືອງອີກດ້ວຍ. ການສຸມໃສ່ສູງສຸດ, ການໃຫ້ບຸລິມະສິດແຫຼ່ງກຳລັງ, ການກະທຳທີ່ຂ້ຽວຂາດ ແລະ ການຍົກສູງປະສິດທິຜົນໃນການປະຕິບັດ ແມ່ນບັນດາປັດໄຈຕັດສິນເພື່ອປະຕິບັດສຳເລັດບັນດາເປົ້າໝາຍພັດທະນາເສດຖະກິດ - ສັງຄົມ, ພ້ອມທັງສ້າງພື້ນຖານອັນໝັ້ນແກ່ນໃຫ້ແກ່ໄລຍະພັດທະນາຕໍ່ໄປຂອງປະເທດຊາດ ແລະ ຍົກສູງຖານະບົດບາດຂອງ ຫວຽດນາມ ໃນວິວັດແຫ່ງການເຊື່ອມໂຍງເຂົ້າກັບສາກົນ./.
