(vovworld)- ທີ່ກອງປະຊຸມຄັ້ງທີ 6 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ 11 (ເອີ້ນຫຍໍ້ວ່າ ກອງປະຊຸມສູນກາງຄັ້ງທີ 6), ກົມການເມືອງໄດ້ປະຕິບັດການຕຳນິຕິຊົມຕົນເອງ ແລະ ຕິຊົມກັນ ຢ່າງເຂັ້ມງວດ ແລະ ຍອມຮັບຄວາມຜິດ ຕໍ່ຄະນະບໍລິຫານງານສູນກາງພັກກ່ຽວກັບຂໍ້ຄົງຄ້າງ, ຄວາມອ່ອນດ້ອຍໃນວຽກງານກໍ່ສ້າງພັກ ແລະ ການເຊື່ອມທາດຂາດຄຸນ, ສິ່ງຫຍໍ້ທໍ້ໃນຖັນແຖວສະມາຊິກພັກ. ເປັນຄັ້ງທຳອິດໃນປະຫວັດສາດແຫ່ງການເຄື່ອນໄຫວຂອງພັກ, ໝູ່ຄະນະກົມການເມືອງໄດ້ຍອມຮັບຄວາມຜິດຕໍ່ຄະນະບໍລິຫານງານສູນກາງພັກໄດ້ຮັບຖືວ່າ ແມ່ນແບບຢ່າງໃນທົ່ວພັກກ່ຽວກັບນ້ຳໃຈການຕຳນິຕິຊົມຕົນເອງ ແລະ ຕິຊົມກັນຕາມເນື້ອໃນຈິດໃຈຂອງມະຕິສູນກາງພັກຄັ້ງທີ 4.
ທີ່ ກອງປະຊຸມສູນກາງພັກຄັ້ງທີ 6, ທ່ານ Nguyen Phu Trong ເລຂາທິການໃຫຍ່ຄະນະບໍລິຫານສູນກາງພັກກອມມູນິດ ຫວຽດນາມ ໄດ້ຍົກໃຫ້ເຫັນບັນດາຂໍ້ຂາດຕົກບົກຜ່ອງຕົ້ນຕໍຂອງກົມການເມືອງ, ຄະນະເລຂາສູນກາງພັກໃນໄລຍະຜ່ານມາ. ນັ້ນບໍ່ທັນສະກັດກັ້ນການເຊື່ອມທາດຂາດຄຸນໃນພະນັກງານ, ສະມາຊິກພັກສ່ວນຫນຶ່ງ, ກົມການເມືອງ, ຄະນະເລຂາສູນກາງພັກ ບໍ່ທັນສຸມໃສ່ຊີ້ນຳເພື່ອແກ້ໄຂຄວາມຫຍໍ້ທໍ້ໃນວຽກງານພະນັກງານຢ່າງທັນການ. ຄຽງຄູ່ກັນນັ້ນ, ແມ່ນການຊີ້ນຳປະຕິບັດບັນດາມະຕິ, ບົດສະຫລຸບຂອງສູນກາງ, ເປັນຕົ້ນແມ່ນລັດວິສາຫະກິດ ຍັງກະວົນກະວາຍ, ປ່ອຍປະລະເລີຍ. ຕໍ່ຫນ້າຂໍ້ຂາດຕົກບົກຜ່ອງນັ້ນ, ກົມການເມືອງ ແລະ ກຳມະການກົມການເມືອງແຕ່ລະທ່ານ ລ້ວນແຕ່ເຫັນໄດ້ຄວາມຮັບຜິດຊອບດ້ານການເມືອງຂອງຕົນ, ຍອມຮັບຄວາມຜິດ ແລະ ຍອມຮັບການປະຕິບັດວິໄນ. ຫາງສຽງໄດ້ຕີລາຄາສູງຕໍ່ເລື່ອງກົມການເມືອງ, ຄະນະເລຂາສູນກາງພັກໄດ້ຍອມຮັບຄວາມຜິດຕໍ່ທົ່ວພັກ, ທົ່ວປວງຊົນ, ຖືວ່າແມ່ນວຽກງານທີ່ເຂັ້ມງວດ, ສະແດງໃຫ້ເຫັນການຢາກຮັບເອົາຄຳປະກອບຄຳຄິດເຫັນຂອງພັກ. ຄຽງຄູ່ກັນນັ້ນ ເລ່ືອງຄະນະບໍລິຫານງານສູນກາງພັກ ໄດ້ປຶກສາຫາລືໝາກຜົນແຫ່ງການສຳຫລວດກວດຄືນຂອງກົມການເມືອງ, ຄະນະເລຂາສູນກາງພັກຢູ່ ກອງປະຊຸມສູນກາງຄັ້ງທີ 6 ຄັ້ງນີ້ ໄດ້ຊີ້ໃຫ້ເຫັນວ່າ ມະຕິສູນກາງຄັ້ງທີ 4 ໄດ້ຮັບການປະຕິບັດຢ່າງເຂັ້ມງວດ ແລະ ມີໝາກຜົນໃນເບື້ອງຕົ້ນ. ປະລິຍາໂທ Tran Khai Dinh ສັງກັດມະຫາວິທະຍາໄລໄຕງວຽນ ເວົ້າວ່າ:
“ຄວາມຈິງໃຈ, ກົງໄປກົງມາຂອງກົມການເມືອງ, ຄະນະບໍລິຫານງານສູນກາງພັກ, ຄະນະເລຂາສູນກາງພັກ ສະແດງໃຫ້ເຫັນຄວາມຕັດສິນໃຈຂອງພັກໃນການປະຕິບັດມະຕິສູນກາງພັກຄັ້ງທີ 4 ສຳເລັດຜົນ, ເຮັດແນວໃດເພື່ອໃຫ້ພັກມີພູມປັນຍາ, ເພື່ອຊີ້ນຳນຳພາປະຊາຊົນຍາດໄດ້ໄຊຊະນະນອັນດີງາມກວ່າ. ຂ້າພະເຈົ້າເອງມີຄວາມປິຕິຊົມຊື່ນ, ມີຄວາມເຊື່ອໝັ້ນຕໍ່ການນຳພາຂອງພັກ.”
 ກອງປະຊຸມຄັ້ງທີ 6 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ 11
ພາບ: internet |
ບົດສະຫລຸບຂອງ ກອງປະຊຸມສູນກາງຄັ້ງທີ 6 ໂດຍທ່ານເລຂາທິການໃຫຍ່ Nguyen Phu Trong ກ່າວໃນວາລະອັດ ກອງປະຊຸມສູນກາງຄັ້ງທີ 6 ໄດ້ຊີ້ແຈງວ່າ: “ຜ່ານການສຳຫລວດກວດຄືນ, ຕຳນິຕິຊົມຕົນເອງ ແລະ ຕິຊົມກັນ ແລະ ຮັບຟັງຄຳເຫັນປະກອບຂອງພະນັກງານ, ສະມາຊິກພັກ, ປະຊາຊົນ, ໝູ່ຄະນະໃນກົມການເມືອງ, ຄະນະເລຂາສູນກາງພັກ ແລະ ກຳມະການກົມການເມືອງແຕ່ລະທ່ານ, ຄະນະເລຂາສູນກາງພັກ ໄດ້ຮັບຮູ້ດ້ານດີຢ່າງເລິກເຊິ່ງກວ່າ, ຄົບຖ້ວນກວ່າ ແລະ ຂໍ້ຂາດຕົກບົກຜ່ອງຂອງຕົນ, ໄຈ້ແຍກ, ເຮັດແຈ້ງສາຍເຫດບັນດາຂໍ້ຂາດຕົກບົກຜ່ອງ, ຂໍ້ຈຳກັດ, ຈາກນັ້ນ ວາງອອກບັນດາມາດຕະການເພື່ອແກ້ໄຂ. ໃນຄວາມຈິງ, ມີຫລາຍທ່ານໄດ້ພິຈາລະນາຕົນຄືນ ແລະ ປັບປຸງຂໍ້ຂາດຕົກບົກຜ່ອງໃນເບື້ອງຕົ້ນ, ປັບປຸງບາງການກະທຳໃນວຽກງານ ແລະ ຊີວິດການເປັນຢູ່. ຫາກສຽງໄດ້ຕີລາຄາສູງ ແລະ ມີຄວາມເຊື່ອໝັ້ນຢ່າງແນວແນ່ວ່າ: ພັກກອມມູນິດ ຫວຽດນາມ ຈະແກ້ໄຂຄວາມອ່ອນດ້ອຍ ແລະ ປັບປຸງເພື່ອສຳເລັດຫນ້າທີ່. ທ່ານ Nguyen Duc Toan ສະມາຊິກພັກມີອາຍຸສູງຢູ່ ຮ່າໂນ້ຍ ໃຫ້ຮູ້ວ່າ:
“ພັກກຳອຳນາດຄືແນວນັ້ນແມ່ນດີຫລາຍ ເພາະວ່າ ພັກເຫັນໄດ້ບັນຫາ, ກ້າເວົ້າ ແລະ ກ້າແກ້ໄຂຂໍ້ຂາດຕົກບົກຜ່ອງ. ເລື່ອງປັບປຸງຂໍ້ຂາດຕົກບົກຜ່ອງຕ້ອງປະຕິບັດເທື່ອລະກ້າວ ຫາກບໍ່ສາມາດປະຕິບັດໃນພາບດຽວ. ບັນດາບັນຫາຍັງຄົງຄ້າງ ເກີດຂຶ້ນແຕ່ດົນນານແລ້ວ ຫາກບໍ່ສາມາດແກ້ໄຂໃນເວລາ 10 ວັນໄດ້.”
ທີ່ ກອງປະຊຸມສູນກາງຄັ້ງທີ 6 ຜ່ານມາ, ພັກກອມມູນິດ ຫວຽດນາມ ໄດ້ຢືນຢັນວ່າ: ຍິ່ງກວ່າເວລາໃດໝົດ ຕ້ອງຮັດແຫນ້ນຖັນແຖວພະນັກງານ, ເພີ່ມທະວີຄວາມສາມັກຄີ, ຮັກສາຄວາມໄວ້ເນື້ອເຊື່ອໃຈ, ນຳພາປະຊາຊົນຜ່ານຜ່າຄວາມຫຍຸ້ງຍາກ ສິ່ງທ້າທາຍ. ຕາມບົດສະຫລຸບຂອງ ກອງປະຊຸມສູນກາງຄັ້ງທີ 6, ພາຍຫລັງບັ້ນສຳຫລວດກວດຄືນ, ກົມການເມືອງ, ຄະນະເລຂາສູນກາງພັກ ໄດ້ປຶກສາຫາລື ແລະ ຊີ້ນຳແກ້ໄຂບາງບັນຫາຮ້ອນເຮັ່ງ, ເສີມຂະຫຍາຍບັນດາປັດໄຈຕັ້ງຫນ້າ, ສ້າງກົດລະບຽບຂໍ້ບັງຄັບ ເພື່ອສະກັດກັ້ນບັນດາການກະທຳຫຍໍ້ທໍ້ໃນພັກ. ສິ່ງດັ່ງກ່າວອີກຄັ້ງຫນຶ່ງເພື່ອປັບປຸງຄວາມໄວ້ເນື້ອເຊື່ອໃຈໃນໝູ່ປະຊາຊົນ, ສ້າງຄວາມເຫັນດີເຫັນພ້ອມໃນສັງຄົມ ພ້ອມກັນມຸ່ງໄປເຖິງຈຸດໝາຍກໍ່ສ້າງ ແລະ ປົກປັກຮັກສາປະເທດຊາດ.
