(vovworld) - ກອງປະຊຸມຜູ້ແທນຊາວກະສິກອນຜະລິດ ດຳເນີນທຸລະກິດເກັ່ງທົ່ວປະເທດຄັ້ງທີ 4 ໄຂຂຶ້ນໃນຕອນເຊົ້າວັນທີ 18/5, ຢູ່ຮ່າໂນ້ຍ, ດ້ວຍການເຂົ້າຮ່ວມຂອງທ່ານປະທານສະພາແຫ່ງຊາດຫວຽດນາມ Nguyen Sinh Hung ແລະ ຊາວກະສິກອນທີ່ດີເດັ່ນກ່ວາ 300 ຄົນທີ່ຕາງໜ້າໃຫ້ແກ່ຊາວກະສິກອນຜະລິດດຳເນີນທຸລະກິດເກັ່ງຂອງຫວຽດນາມ ກ່ວາ 4 ລ້ານຄົນ. ໃນ 5 ປີຜ່ານມາ, ຈຳນວນຄອບຄົວຊາວກະສິກອນທີ່ມີລາຍຮັບ 200 ລ້ານດົ່ງຕໍ່ປີ ເພີ່ມຂຶ້ນທົບ 3 ເທົ່າ, ຈຳນວນຄອບຄົວທີ່ມີລາຍຮັບກ່ວາ 1 ຕື້ດົ່ງຕໍ່ປີ ເພີ່ມຂຶ້ນທົບ 5 ເທົ່າເມື່ອທຽງໃສ່ໄລຍະກ່ອນ. ກ່າວຄຳເຫັນທີ່ກອງປະຊຸມ, ທ່ານປະທານສະພາແຫ່ງຊາດ Nguyen Sinh Hung ເນັ້ນໜັກວ່າ:
“ບັນດາຜູ້ແທນແມ່ນຕົວແທນໃຫ້ແກ່ຊາວກະສິກອນດຳເນີນທຸລະກິດເກັ່ງນັບລ້ານຄົນ, ທີ່ໄດ້ຜ່ານຜ່າຄວາມອຶດຫິວທຸກຍາກ ພວມສ້າງຊີວິດການເປັນຢູ່ທີ່ອິມໜຳສຳລານ, ມີຄວາມຜາສຸກ ແລະ ກໍ່ແມ່ນຕົວແທນໃຫ້ແກ່ເຈດຈຳນົງ, ມານະຈິດຂອງຊາວກະສິກອນຫວຽດນາມ. ກຳລັງປະຕິວັດໃນປະຫວັດສາດກໍມາຈາກຊາວກະສິກອນ. ໃນສະໄໝໃດ ພັກເຮົາກໍກຳນົດວ່າ ຊາວກະສິກອນແມ່ນກຳລັງພື້ນຖານເຮັດການປະຕິວັດ ເຖິງວ່າໃນໄລຍະປົດປ່ອຍຊາດ, ຫຼືໄລຍະຫັນເປັນປະເທດອຸດສາຫະກຳ ແລະ ທັນສະໄໝ, ກໍ່ສ້າງລັດທິສັງຄົມນິຍົມ”
ຕາມທ່ານປະທານສະພາແຫ່ງຊາດ Nguyen Sinh Hung ແລ້ວ, ສະມາຄົມຊາວກະສິກອນຫວຽດນາມ ຄວນສືບຕໍ່ສຸມໃສ່ຊີ້ນຳບັນດາຂະບວນການຂອງຊາວກະສິກອນ ເພື່ອໃຫ້ຂະບວນການນັບມື້ນັບເສີມຂະຫຍາຍປະສິດທິຜົນຢ່າງເລິກເຊິ່ງກ້ວາງຂວາງ, ມີກຳລັງແຜ່ຂະຫຍາຍໃຫຍ່ຫຼວງ ແລະ ບັນລຸປະສິດທິຜົນສູງ, ປະກອບສ່ວນຢ່າງແທດຈິງເຂົ້າໃນການຍົກສູງຊີວິດການເປັນຢູ່ຂອງປະຊາຊົນ.
