(vovword)- ກອງປະຊຸມລັດຖະມົນຕີກະຊວງສິ່ງແວດລ້ອມ ຫວຽດນາມ - ສເກົາຫລີ ຄັ້ງທີ 9 ຖືກຈັດຂຶ້ນໃນຕອນເຊົ້າວັນທີ 7/5 ຢູ່ ຮ່າໂນ້ຍ. ທີ່ກອງປະຊຸມ, ສອງຝ່າຍໄດ້ຕົກລົງເພີ່ມທະວີການຮ່ວມມືໃນຂົງເຂດການເຕີບໂຕຂຽວ ແລະ ການປ່ຽນແປງຂອງດິນຟ້າອາກາດ, ຮ່ວມມືທາງດ້ານເທັກໂນໂລຊີ ແລະ ອຸດສາຫະກຳສິ່ງແວດລ້ອມ, ເພີ່ມທະວີການແລກປ່ຽນຜູ້ຊ່ຽວຊານ, ພະນັກງານໃນຂົງເຂດສິ່ງແວດລ້ອມ. ກ່າວຄຳເຫັນທ່ີກອງປະຊຸມ, ທ່ານ Nguyen Minh Quang ລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ຫວຽດນາມ ໄດ້ຢືນຢັນວ່າ: ກອງປະຊຸມແມ່ນເວທີປາໄສເພື່ອໃຫ້ບັນດາວິສາຫະກິດ ສເກົາຫລີ ຊຸກຍູ້ການຮ່ວມມືກັບ ຫວຽດນາມ ໃນບັນດາໂຄງການລົງທຶນໂດຍກົງ, ຮັບໃຊ້ຈຸດໝາຍການເຕີບໂຕຂຽວ, ປົກປັກຮັກສາສິ່ງແວດລ້ອມ ແລະ ຮັບມືກັບການປ່ຽນແປງຂອງດິນຟ້າອາກາດ. ແລະ ກໍໃນກອງປະຊຸມ, ບັນດາຜູ້ຊ່ຽວຊານດ້ານສິ່ງແວດລ້ອມຂອງ ສເກົາຫລີ ໄດ້ແລກປ່ຽນບົດຮຽນ, ການຫນູນຊ່ວຍ ຫວຽດນາມ ໃນການປັບປຸງກົດໝາຍວ່າດ້ວຍການປົກປັກຮັກສາສິ່ງແວດລ້ອມ ປີ 2005, ປະຕິບັດໂຄງການຈຸດໝາຍແຫ່ງຊາດກ່ຽວກັບການແກ້ໄຂມົນລະພິດ ແລະ ປົວແປງສິ່ງແວດລ້ອມ ຊຶ່ງຫາກໍ່ໄດ້ຮັບຮອງເອົາຈາກສະພາແຫ່ງຊາດ. ເມື່ອສິ້ນສຸດກອງປະຊຸມ, ລັດຖະມົນຕີທັງສອງທ່ານໄດ້ເປັນສັກຂີພິຍານພິທີລົງນາມໃນບົດບັນທຶກຊ່ວຍຈຳກ່ຽວກັບການປະຕິບັດການຮ່ວມມືລະຫວ່າງສອງກະຊວງກ່ຽວກັບການເພີ່ມທະວີກອບກົດໝາຍ ແລະ ຜັນຂະຫຍາຍການເຄື່ອນໄຫວຟື້ນຟູທີ່ດິນ ແລະ ນ້ຳລີນຖືກມົນລະພິດໄລຍະ 2012 - 2015.
