( vovworld ) – ກອງປະຊຸມສຳມະນາສົ່ງເສີມການລົງທຶນ ດ້ານການຄ້າລະຫວ່າງຮ່າໂນ້ຍ - ມົດສະກູ ໄດ້ດຳເນີນໃນຕອນບ່າຍວັນທີ 11/5 ຢູ່ຮ່າໂນ້ຍ. ປີ 2011 ວົງເງິນການຄ້າລະຫວ່າງຫວຽດນາມ - ລັດເຊຍ ບັນລຸ 2 ຕື້ 120 ລ້ານ USD, ໃນນັ້ນ ສົ່ງອອກບັນລຸ 1 ຕື້ 380 ລ້ານ USD. ນີ້ແມ່ນປີທຳອິດທີ່ຫວຽດນາມ ສົ່ງອອກເກີນດຸນໄປຍັງລັດເຊຍ. ແຕ່ການຮ່ວມມືດ້ານເສດຖະກິດການຄ້າລະຫວ່າງຫວຽດນາມ ສະຫະພັນລັດເຊຍ ຍັງບໍ່ທັນສົມກັບຄວາມສາມາດບົ່ມຊ້ອນ. ບັນດາກະຊວງ, ຂະແໜງການ ພວມມານະພະຍາຍາມໜູນຊ່ວຍຍົກສູງວົງເງິນການຄ້າໃຫ້ຂຶ້ນເຖິງ 3 ຕື້ USD ໃນປີ 2012 ແລະ 10 ຕື້ USD ໃນປີ 2020. ເພີ່ອປະຕິບັດຈຸໝາຍດັ່ງກ່າວ, ທ່ານ Pham Gia Tuc,ຮອງປະທານຫ້ອງການການຄ້າ ແລະ ອຸດສາຫະກຳຫວຽດນາມ, ຖືວ່າ.
“ ລັດຖະບານສອງປະເທດຄວນລົງນາມໃນເອກະສານນິຕິກຳໂດຍໄວ ເພື່ອສ້າງພື້ນຖານດ້ານນິຕິກຳໃຫ້ປະຊາຄົມວິສາຫະກິດສອງປະເທດເຄື່ອນໄຫວ, ພິເສດແມ່ນກ່ຽວຂ້ອງເຖິງການລົງນາມໃນສັນຍາການຄ້າເສລີ ລະຫວ່າງຫວຽດນາມ ແລະ ສະຫະພັນລັດເຊຍ. ທີ 2 ແມ່ນ ເພີ່ມທະວີການເຄື່ອນໄຫວສົ່ງເສີມການຄ້າ, ການລົງທຶນ ແລະ ມີກົນໄກນະໂຍບາຍ, ສ້າງເງື່ອນໄຂໃຫ້ບັນດາຂົງເຂດບຸລິມະສິດ ເພື່ອເພີ່ມທະວີການຮ່ວມມືລະຫວ່າງສອງປະເທດ. ໜູນຊ່ວຍບັນດາລະບຽບການນິຕິກຳໃຫ້ແກ່ບັນດາວິສາຫະກິດຫວຽດນາມ ເມື່ອເຄື່ອນໄຫວຢູ່ລັດເຊຍ ແລະ ຊາວຫວຽດນາມ ພວມດຳເນີນທຸລະກິດຢູ່ລັດເຊຍ ”.
