(vovworld) - ໃນຂອບເຂດການຮ່ວມມືຄະນະກຳມະການວັດທະນະທຳ ຖະແຫຼງຂ່າວ ອາຊຽນ ສັງກັດ ປະຊາຄົມວັດທະນະທຳ ສັງຄົມ ອາຊຽນ (ຫຼື ASCC), ຕອນເຊົ້າວັນທີ 12/6, ຢູ່ນະຄອນ ດ່າໜັງ, ກະຊວງຖະແຫຼງຂ່າວ ແລະ ສື່ສານຫວຽດນາມ ໄດ້ໄຂກອງປະຊຸມ ອະນຸກຳມະການ ຖະແຫຼງຂ່າວ ອາຊຽນ ຄັ້ງທີ 13. ເຂົ້າຮ່ວມກອງປະຊຸມ ມີບັນດາເຈົ້າໜ້າທີ່ຂັ້ນສູງ ຮັບຜິດຊອບ ກ່ຽວກັບວຽກງານຖະແຫຼງຂ່າວຂອງ 10 ປະເທດສາມາຊິກ ອາຊຽນ, ບັນດາວິທະຍຸ, ໂທລະພາບສູນກາງ, ບັນດາອົງການສື່ມວນຊົນ, ບໍລິສັດສື່ສານໃຫຍ່ຂອງບັນດາປະເທດ ອາຊຽນ.
ກ່າວຄຳເຫັນໄຂກອງປະຊຸມ, ທ່ານລັດຖະມົນຕີຊ່ວຍວ່າການກະຊວງຖະແຫຼງຂ່າວ - ສື່ສານຫວຽດນາມ Do Quy Doan ເນັ້ນໜັກວ່າ: ປະຈຸບັນ, ສື່ສານ ສວມບົດບາດສຳຄັນ ແລະ ມີບົດບາດເຊື່ອມຕໍ່ບັນດາປະເທດໃນໂລກ ແລະ ພາກພື້ນ, ໃນນັ້ນມີພາກພື້ນອາຊຽນ. ທ່ານກ່າວວ່າ:
“ກອງປະຊຸມຄັ້ງທີ 13 ຂອງອະນຸກຳມະການ ຖະແຫຼງຂ່າວ ອາຊຽນ ແມ່ນໂອກາດ ເພື່ອໃຫ້ພວກເຮົາຕີລາຄາຄືນບັນດາປະສິດທິຜົນຂອງບັນດາໂຄງການ, ການເຄື່ອນໄຫວຂອງອະນຸກຳມະການຖະແຫຼງຂ່າວ ໃນຊຸມປີຜ່ານມາ ແລະ ແລກປ່ຽນ, ປຶກສາຫາລື, ສະເໜີບັນດາໂຄງການ, ລາຍການຮ່ວມມືໃໝ່ ໃນຊຸມປີຕໍ່ໄປ. ຂ້າພະເຈົ້າຫວັງວ່າ, ທີ່ກອງປະຊຸມຄັ້ງນີ້, ບັນດາການເຄື່ອຍໄຫວຍຸດທະສາດ ກ່ຽວກັບການໂຄສະນາ, ແລກປ່ຽນບົດຮຽນໃນການຄຸ້ມຄອງ, ແລກປ່ຽນຂໍ້ມູນຂ່າວສານ, ພັດທະນາແຫຼ່ງຊັບພະຍາກອນມະນຸດ, ໜູນຊ່ວຍດ້ານເຕັກນິກ, ນຳໃຊ້ເຕັກໂນໂລຢີ ຈະໄດ້ຮັບການປຶກສາຫາລືບົນພື້ນຖານຮ່ວມມືຢ່າງແໜ້ນແຟ້ນ, ມີປະສິດທິຜົນລະຫວ່າງສະມາຊິກອາຊຽນ ແລະ ບັນດາປະເທດຄູ່ເຈລະຈາ.”
