ສະຖານທູດຫວຽດນາມ ປະຈຳອາເມລິກາ ຈັດການພົບປະກັບສະມາຄົມນັກທຸລະກິດຫວຽດນາມ ຢູ່ອາເມລິກາ
ທ່ານ Nguyen Quoc Cuong ເອກອັກຄະລັດຖະທູດຫວຽດນາມ ປະຈຳອາເມລິກາ
(ພາບ: baotintuc.vn)
( vovworld ) – ຕອນເຊົ້າວັນທີ 3/4, ສະຖານທູດຫວຽດນາມ ປະຈຳອາເມລິກາ ໄດ້ ຈັດການພົບປະກັບສະມາຄົມນັກທຸລະກິດຫວຽດນາມ ຢູ່ອາເມລິກາ ເພື່ອແນໃສ່ແນະນຳບັນດາຂໍ້ມູນຂ່າວຫລ້າສຸດກ່ຽວກັບນະໂຍບາຍ ແລະ ສະພາບແວດລ້ອມແຫ່ງການລົງທຶນຢູ່ຫວຽດນາມ ພ້ອມທັງຕອບບັນດາຂໍ້ຂ້ອງໃຈຂອງບັນດານັກທຸລະກິດເປັນຊາວ ຫວຽດນາມ ອາໄສຢູ່ອາເມລິກາ. ທ່ານ Nguyen Quoc Cuong ເອກອັກຄະລັດຖະທູດຫວຽດນາມ ປະຈຳອາເມລິກາ ໄດ້ຕີລາຄາສູງບັນດາໝາກຜົນ ຊື່ງ ສະມາຄົມບັນລຸໄດ້ໃນໄລຍະຜ່ານມາ ແລະ ສະເໜີໃຫ້ສະມາຄົມຕ້ອງຍູ້ແຮງບົດບາດເປັນຂົວຕໍ່ໃຫ້ບັນດານັກທຸລະກິດອາເມລິກາ ມາລົງທຶນຢູ່ຫວຽດນາມ ແລະ ບັນດານັກທຸລະກິດຫວຽດນາມ ໄປຊອກຫາກາລະໂອກາດການດຳເນີນທຸລະກິດຢູ່ອາເມລິກາ. ເມື່ອຕີລາຄາກ່ຽວກັບຄວາມໝາຍຂອງການພົບປະຄັ້ງນີ້, ທ່ານນາງ Nguyen Thanh Tuyen ຜູ້ຕາງໜ້າບໍລິສັດອະສັງຫາລິມະຊັບ P&Tຢູ່ອາເມລິກາ ໃຫ້ຮູ້ວ່າ: “ຂ້າພະເຈົ້າມີຄວາມພາກພູມໃຈທີ່ສຸດ ເມື່ອສະຖານທູດໄດ້ຈັດການພົບປະແລກປ່ຽນນີ້ ເພື່ອໃຫ້ນັກທຸລະກິດສອງປະເທດສາມາດພົບປະກັນ ແລະ ຊອກຫາກາລະໂອກາດຮ່ວມມື. ຂ້າພະເຈົ້າປາດຖະໜາວ່າ, ການພົບປະຄືແນວນີ້ຈະຖືກຈັດຂຶ້ນເປັນປະຈຳ ແລະ ມີການເຜີຍແຜ່ຢ່າງກ້ວາງຂວາງກ່ວາອີກ ເພື່ອສ້າງກາລະໂອກາດດຳເນີນທຸລະກິດຕື່ມອີກໃຫ້ແກ່ບັນດາວິສາຫະກິດພາຍໃນ ແລະ ຕ່າງປະເທດ, ໂດຍສະເພາະແມ່ນຊາວຫວຽດນາມ ອາໄສຢູ່ຕ່າງປະເທດ ຈະມີຂໍ້ມູນຂ່າວຕື່ມອີກ ກ່ຽວກັບນະໂຍບາຍດ້ານເສດຖະກິດຂອງລັດ ແລະ ການຮ່ວມມື“
ສະມາຊິກຫຼາຍທ່ານຂອງສະມາຄົມນັກທຸລະກິດຫວຽດນາມ ຢູ່ອາເມລິກາ ຖືວ່າ: ປະຈຸບັນ, ສະພາບແວດລ້ອມແຫ່ອງການລົງທຶນຂອງຫວຽດນາມ ແມ່ນດີພໍສົມຄວນ. ທ່ານ Andre ນັກທຸລະກິດຊາວອາເມລິກາ ຜູ້ໄດ້ດຳເນີນທຸລະກິດຢູ່ຫວຽດນາມ ເປັນເວລາຫຼາຍປີ ແລະ ປະຈຸບັນ ແມ່ນຫົວຫນ້າຜູ້ຕາງໜ້າຂອງບໍລິສັດເຄື່ອງອຸປະກອນຕອງນ້ຳ Arteron ຖືວ່າ:
“ຫວຽດນາມ ໄດ້ສົ່ງເສີມ ແລະ ເພີ່ມທະວີການປັບປຸງນະໂຍບາຍຂອງພັກ ແລະ ລັດ ເພື່ອສ້າງສະພາບແວດລ້ອມແຫ່ງການແກ່ງແຍ້ງຢ່າງສະເໝີພາບ ໝາຍຄວາມວ່າ ຫລຸດຜ່ອນໄພສໍ້ລາດບັງຫຼວງ, ສິ່ງດັ່ງກ່າວໄດ້ຊ່ວຍໃຫ້ຫວຽດນາມ ເພີ່ມທະວີຄວາມສາມາດແກ່ງແຍ້ງກັບປະເທດອື່ນໆໃນພາກພື້ນປາຊີຟິກ ແລະ ອາຊີຕາເວັນອອກສຽງໃຕ້“
