( vovworld ) – ຕອນເຊົ້າວັນທີ 28/5, ຢູ່ນະຄອນດ່ານັງ, ກະຊວງການຕ່າງປະເທດ ຫວຽດນາມ ໄດ້ຈັດການພົບປະສົນທະນາເຊື່ອມໂຍງເຂົ້າກັບເສດຖະກິດໂລກເຂດພາກກາງ-ໄຕງວຽນ ເພື່ອແນໃສ່ຕີລາຄາສັງລວມຕໍ່ກັບວິວັດທະນາການເຊື່ອມໂຍງເຂົ້າກັບເສດຖະກິດໂລກຂອງ ຫວຽດນາມ ໄລຍະ 2001-2010. ໃນ 25 ປີແຫ່ງການປ່ຽນແປງໃໝ່, ຫວຽດນາມ ໄດ້ມີບາດກ້າວພັດທະນາຢ່າງແຮງໃນວິວັດທະນາການເຊື່ອມໂຍງເຂົ້າກັບເສດຖະກິດໂລກ, ເປີດກ້ວາງການຮ່ວມມືໃນບັນດາຂົງເຂດ ແລະ ກາຍເປັນສະມາຊິກຂອງອົງການການຄ້າໂລກ. ມາຮອດປະຈຸບັນ, ຫວຽດນາມ ໄດ້ສ້າງຕັ້ງສາຍພົວພັນທາງການທູດກັບ 180 ປະເທດໃນຈຳນວນ 193 ປະເທດເປັນສະມາຊິກຂອງ ສະຫະປະຊາຊາດ; ຮັບປະກັນບົດບາດກຳມະການບໍ່ເປັນທາງການສະພາຄວາມໝັ້ນຄົງ ສະຫະປະຊາຊາດ ໄລຍະ 2008-2009 ສຳເລັດ ແລະ ເປັນປະທານອາຊຽນ 2010. ທີ່ການພົບປະສົນທະນາ, ບັນດາຜູ້ແທນໄດ້ຍົກອອກບັນດາຜົນງານ ແລະ ຂໍ້ຈຳກັດໃນວິວັດທະນາການເຊື່ອມໂຍງເຂົ້າກັບເສດຖະກິດໂລກຂອງ ຫວຽດນາມ ໃນໄລຍະທີ່ຜ່ານມາ. ທ່ານ Dang Dinh Quy ຜູ້ອຳນວຍການສະຖາບັນການພົວພັນກັບຕ່າງປະເທດ ໃຫ້ຮູ້ວ່າ:
“ນີ້ແມ່ນບັນດາຄຳເຫັນ ແລະ ຂໍ້ມູນຂ່າວສານທີ່ດີທີ່ສຸດ ເພື່ອໃຫ້ຄະນະຮຽບຮຽງຕີລາຄາໂດຍສັງລວມວິວັດທະນາການເຊື່ອມໂຍງເຂົ້າກັບເສດຖະກິດໂລກຂອງ ຫວຽດນາມ ໃນໄລຍະຜ່ານມາ. ພ້ອມກັນນັ້ນ, ທ້ອງຖິ່ນຕ້ອງພິຈາລະນາບັນດາຄວາມຕ້ອງການ, ມາດຕະການ, ການກຳນົດທິດຊີ້ນຳໃນໄລຍະທີ່ຈະມາເຖິງ ຕ້ອງເຮັດແນວໃດ ເພື່ອເຊື່ອມໂຍງເຂົ້າກັບເສດຖະກິດໂລກຢ່າງມີປະສິດທິຜົນ ເພື່ອບັນລຸຈຸດໝາຍພັດທະນາ, ຮັບໃຊ້ພາລະກິດປົກປັກຮັກສາລັດທິສັງຄົມນິຍົມໄວ້ ຢ່າງໝັ້ນຄົງ“
