ການຢ້ຽມຢາມຫວຽດນາມຢ່າງເປັນທາງການຂອງທ່ານປະທານາທິບໍດີ ອິນໂດເນເຊຍ ສືບຕໍ່ຊຸກຍູ້ການພົວພັນຄູ່່ຮ່ວມມືຍຸດທະສາດຮອບດ້ານ

ນີ້ແມ່ນການຢ້ຽມຢາມທາງລັດຖະກິດຢູ່ຫວຽດນາມ ຄັ້ງທໍາອິດຂອງ ທ່ານປະທານາທິບໍດີ         JoKo Widodo  ນັບແຕ່ເມື່ອດໍາລົງຕໍາແໜ່ງໃນປີ 2014. ເນື່ອງໃນໂອກາດນີ້, ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈໍາ ຫວຽດນາມ ໄດ້ຕອບສໍາພາດຕໍ່ນັກຂ່າວວິທະຍຸກະຈາຍສຽງຫວຽດນາມ. ທ່ານ Ibnu Hadi ເອກອັກຄະລັດຖະທູດ ອິນໂດເນເຊຍ ປະຈໍາຫວຽດນາມ ຢັ້ງຢືນວ່າ:

        “ການພົວພັນລະຫວ່າງສອງປະເທດ ໄດ້ຮັບການພັດທະນາ ແລະ ປັບປຸງ ຢ່າງບໍ່ຢຸດຢັ້ງ. ໃນການຢ້ຽມຢາມຄັ້ງນີ້, ສອງຝ່າຍຈະສືບຕໍ່ລົງນາມໃນແຜນການເຄື່ອນໄຫວໄລຍະ 5 ປີ ຕໍ່ໄປ. ຫວັງວ່າ ດ້ວຍການລົງນາມໃນບົດບັນທຶກຊ່ວຍຈໍາບາງສະບັບນັ້ນ, ພວກເຮົາຈະສືບຕໍ່ເປີດທິດພັດທະນາການພົວພັນສອງປະເທດໃນໄລຍະຈະມາເຖິງ ໃນທຸກຂົງເຂດຄື ເສດຖະກິດ,ການເມືອງ, ວັດທະນະທໍາ ແລະ ສັງຄົມ. ສໍາລັບດ້ານເສດຖະກິດ, ຂ້າພະເຈົ້າເຊື່ອໝັ້ນວ່າ ດ້ວຍບັນດາຜົນງານທີ່ພວກເຮົາບັນລຸໄດ້ໃນຕະຫຼອດໄລຍະ 3 ປີຜ່ານມາ ກໍຄືການເຕີບໂຕເສດຖະກິດຂອງສອງປະເທດ, ຄາດໝາຍວົງເງິນການຄ້າໃນປີ 2020 ແມ່່ນຈະບັນລຸໄດ້ເຖິງ 10 ຕື້ USD. ໂດຍສະເພາະແມ່ນເມື່ອພວກເຮົາພວມສຸມໃສ່ບັນດາຜະລິດຕະພັນບຸລິມະສິດ, ຕົວຢ່າງຄື ຂະແໜງລົດໂອໂຕ ໄດ້ຮັບການຟື້ນຟູ ສົ່ງອອກໄປຍັງຫວຽດນາມ ຫຼື ເຂົ້າສານຂອງຫວຽດນາມ ສົ່ງອອກໄປຍັງ ອິນໂດເນເຊຍ...”.

        ໃນການຢ້ຽມຢາມຫວຽດນາມ ຄັ້ງນີ້, ນອກຈາກການເຂົ້າຮ່ວມ ເວທີປາໄສ ເສດຖະກິດໂລກ ອາຊຽນ 2018 ແລ້ວ, ຄາດວ່າ ທ່ານປະທານາທິບໍດີ JoKo Widodo   ກໍຈະມີການພົບປະເຈລະຈາກັບທ່ານປະທານປະເທດ ເຈີ່ນດ້າຍກວາງ, ພົບປະກັບທ່ານນາຍົກລັດຖະມົນຕີ ຫງວຽນຊວນຟຸກ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ແລະ ທ່ານເລຂາທິການໃຫຍ່ ຫງວຽນຝຸຈ້ອງອີກດ້ວຍ.