( vovworld ) - ຕອນເຊົ້າວັນທີ 20/6, ຢູ່ນະຄອນໂຮ່ຈິມິນ, ສະຫະພັນບັນດາອົງການມິດຕະພາບ ແລະ ສະມາຄົມມິດຕະພາບຫວຽດນາມ - ກຳປູເຈຍ ໄດ້ຈັດການໂອ້ລົມສົນທະນາ “ມູນເຊື້ອແຫ່ງຄວາມສາມັກຄີຕໍ່ສູ້, ຮ່ວມມືຊ່ວຍເຫຼືອເຊິ່ງກັນ ແລະ ກັນລະຫວ່າງປະຊາຊົນສອງປະເທດຫວຽດນາມ - ກຳປູເຈຍ, ລະຫວ່າງປະຊາຊົນນະຄອນໂຮ່ຈິມິນ ແລະ ນະຄອນຫຼວງພະນົມເປັນ”. ນີ້ແມ່ນການເຄື່ອນໄຫວສະເຫຼືອມະຫຼອງ 45 ແຫ່ງວັນສ້າງຕັ້ງສາຍພົວພັນດ້ານການທູດ ແລະ ປີແຫ່ງຄວາມມິດຕະພາບຫວຽດນາມ - ກຳປູເຈຍ 2012. ທີ່ການໂອ້ລົມສົນທະນາ, ບັນດານັກປະຕິວັດຜູ້ອະວຸໂສ ພ້ອມກັບບັນດາຜູ້ຊ່ຽວຊານ, ທະຫານອາສາສະໝັກຫວຽດນາມ ທີ່ເຄີຍຊ່ວຍເຫຼືອການປະຕິວັດກຳປູເຈຍ ໄດ້ພ້ອມກັນຫວນຄືນຊຸມເດືອນປີແຫ່ງການຕໍ່ສູ້, ປະຕິບັດງານຢູ່ປະເທດກຳປູເຈຍ; ຄວາມສາມັກຄີອັນສະໜິດແໜ້ນໃນພາລະກິດຕໍ່ສູ້ປົດປ່ອຍຊາດໃນເມື່ອກອນ, ກໍຄືໃນພາລະກິດສ້າງສາ ແລະ ພັດທະນາປະເທດຊາດໃນປະຈຸບັນຂອງແຕ່ລະປະເທດ. ທ່ານ Dinh Phong, ອະດີດປະທານສະມາຄົມນັກຂ່າວນະຄອນໂຮ່ຈິມິນ, ສະມາຊິກຄະນະຜູ້ຊ່າວຊານທີ່ຊ່ວຍເຫຼືອປະເທດກຳປູເຈຍ ໄລຍະ 1979, ໃຫ້ຮູ້ວ່າ.
“ຂ້າພະເຈົ້າແມ່ນໜຶ່ງໃນບັນດານັກຂ່າວທີ່ຕິດພັນກັບກຳປູເຈຍ ໃນຕະຫຼອດໄລຍະ 50 ປີ. ໃນຊຸມມື້ທຳອິດເມື່ອສູນກາງກອງບັນຊາການຕັ້ງຢູ່ເຂດຊາຍແດນກຳປູເຈຍ ພວກຂ້າພະເຈົ້າໄດ້ມີສາຍພົວພັນອັນສະໜິດແໜ້ນກັບປະຊາຊົນກຳປູເຈຍ ຢູ່ເຂດຊາຍແດນ. ໃນຊຸມປີ 1970, ຂ້າພະເຈົ້າໄດ້ເຂົ້າຮ່ວມກຳລັງລູກຮື້ຂຶ້ນຂອງປະເທດກຳປູເຈຍ ເພື່ອປົດປ່ອຍບັນດາເຂດກວ້າງໃຫຍ່ຂອງກຳປູເຈຍ. ເພາະສະນັ້ນ, ຂ້າພະເຈົ້າຄິດວ່າ ຫວຽດນາມ ແລະ ກຳປູເຈຍ ມີຄວາມຮັກແພງຖານອ້າຍນ້ອງ, ມີການອຸທິດເລືອດເນື້ອນຳກັນ ແລະ ນັ້ນແມ່ນບັນດາອາລົມຈິດອັນລ້ຳຄ່າ.”
