(vovworld) - ໃນຂະນະທີ່ການເຈລະຈາລະຫວ່າງ ອີຣານ ແລະ ກຸ່ມ P5+1 (ເຊິ່ງລວມມີ 5 ປະເທດປະຈຳສະພາຄວາມໝັ້ນຄົງ ສະຫະປະຊາຊາດ ແມ່ນ: ອາເມລິກາ, ລັດເຊຍ, ຈີນ, ອັງກິດ ແລະ ຝຣັ່ງ ພ້ອມກັບ ເຢຍລະມັນ) ກ່ຽວກັບບັນຫານິວເຄຼຍຂອງ ອີຣານ ກ່າວເຂົ້າສູ່ມື້ເຮັດວຽກທີ່ 2 (19/6), ທ່ານລັດຖະມົນຕີຊ່ວຍວ່າການກະຊວງການຕ່າງປະເທດລັດເຊຍ Sergei Ryabkov ໃຫ້ຮູ້ວ່າ: ຫຼັກໝັ້ນຂອງຝ່າຍຕ່າງໆຍັງແຕກຕ່າງກັນຫຼາຍ ແລະ ບໍ່ອາດເປັນເອກະພາບກັນໄດ້. ຕາມທ່ານ Ryabkov ແລ້ວ, ຄະນະເຈລະຈາ ອີຣານ ໂດຍທ່ານ Saeed Jalili ນຳໜ້າ ແລະ ບັນດາຜູ້ຕາງໜ້າກຸ່ມ P5+1 ລ້ວນແຕ່ມີຄວາມຫວັງດ້ານການເມືອງ ດັ່ງນັ້ນການເຈລະຈາ ໄດ້ດຳເນີນໄປຢ່າງເຂັ້ມງວດ ແລະ ມີເຈດຕະນາດີ. ແຕ່ເຖິງຢ່າງໃດກໍຕາມ, ຍ້ອນຫຼັກໝັ້ນຍັງແຕກຕ່າງກັນ ດັ່ງນັ້ນ ເວລາພຽງ 2 ວັນ ອາດຈະບໍ່ພໍເພື່ອໃຫ້ຝ່າຍຕ່າງໆບັນລຸໄດ້ບັນດາຄວາມຄືບໜ້າ ຫຼື ຂໍ້ຕົກລົງຄືຄວາມມຸ້ງຫວັງ.
ທ່ານ Michael Mann, ເລຂາດ້ານສື່ຂ່າວຂອງທ່ານນາງ Catherine Ashton, ເຊິ່ງແມ່ນຜູ້ຕາງໜ້າຂັ້ນສູງ ຮັບຜິດຊອບຄວາມໝັ້ນຄົງ ແລະ ນະໂຍບາຍພົວພັນຕ່າງປະເທດ ຂອງສະຫະພາບເອີລົບ ຖືວ່າ: ການເຈລະຈາຢູ່ລັດເຊຍ ຖືກດຳເນີນໄປຢ່າງເຄັ່ງຕຶງ ແຕ່ກົງໄປກົງມາ.
ໃນຂະນະນັ້ນ, ທ່ານ Ali Bagheri ຮອງປະທານສະພາຄວາມໝັ້ນຄົງແຫ່ງຊາດ ອີຣານ ຖະແຫຼງວ່າ: ອີຣານຈະສືບຕໍ່ຮຽກຮ້ອງສິດນຳໃຊ້ພະລັງງານປະລະມານູ ເພື່ອຈຸດໝາຍສັນຕິພາບ ແລະ ຖືວ່າທຸກໆມາດຕະການລົງໂທດ ຫຼື ຂວ້ຳບາດລ້ວນແຕ່ບໍ່ປະກອບສ່ວນບັນລຸໄດ້ຄວາມຄືບໜ້າໃນການເຈລະຈາ ກໍຄືຈຸດໝາຍໂດຍຝ່າຍຕ່າງໆວາງອອກ.
