(vovworld) – ໃນຂອບເຂດການຢ້ຽມຢາມສັນຖະວະໄມຕີ ສປ ຈີນ, ຕອນບ່າຍວັນທີ 16/4, ຄະນະຜູ້ແທນທະຫານຂັ້ນສູງ ກອງທັບປະຊາຊົນຫວຽດນາມ ໂດຍທ່ານ ພົນໂທ Do Ba Ty, ຫົວໜ້າເສນາທິການໃຫຍ່, ລັດຖະມົນຕີຊ່ວຍວ່າການກະຊວງປ້ອງກັນປະເທດ ນຳໜ້າໄດ້ມີການເຈລະຈາກັບຄະນະຜູ້ແທນທະຫານຂັ້ນສູງກອງທັບປົດປ່ອຍປະຊາຊົນ ຈີນ ໂດຍທ່ານພົນໂທ ເຈີນພິ່ງເຕີ, ຫົວໜ້າເສນາທິການໃຫຍ່ກອງທັບປົດປ່ອຍປະຊາຊົນຈີນ ເປັນຫົວໜ້າຄະນະ. ທີ່ການເຈລະຈາ, ຄະນະຜູ້ແທນການທະຫານຂັ້ນສູງ ຫວຽດນາມ ແລະ ຈີນໄດ້ພ້ອມກັນໄຈ້ແຍກ, ຕີລາຄາສະພາບການສາກົນ ແລະ ພາກພື້ນ, ລາຍງານກ່ຽວກັບສະພາບການທາງດ້ານການເມືອງ, ເສດຖະກິດ, ສັງຄົມຂອງ 2 ປະເທດ. 2 ຝ່າຍໄດ້ເຫັນດີເປັນເອກະສັນກັນຖືວ່າ: ໄລຍະຜ່ານມາ, ການພົວພັນດ້ານປ້ອງກັນຊາດສືບຕໍ່ໄດ້ຮັບການເພີ່ມທະວີ ແລະ ຢັ້ງຢືນບົດບາດແມ່ນ 1 ໃນບັນດາເສົາຄ້ຳຂອງການພົວພັນຄູ່ຮ່ວມມືຍຸດທະສາດລະຫວ່າງ 2 ພັກ, 2 ລັດຫວຽດນາມ ແລະ ຈີນ. ການພົວພັນຮ່ວມມື, ປະສານສົມທົບກັນລະຫວ່າງກອງທັບເຮືອ, ທະຫານປ້ອງກັນຊາຍແດນ ແລະ ບັນດາ ທະຫານເຂດຊາຍແດນສືບຕໍ່ໄດ້ຮັບການຍູ້ແຮງ ແລະ ບັນລຸປະສິດທິຜົນອັນແທດຈິງ.
ກ່ຽວກັບບັນຫາບົນທະເລ, 2 ຝ່າຍເຫັນດີເປັນເອກະສັນກັນຖືວ່າ: ກອງທັບຕ້ອງແມ່ນກຳລັງທີ່ເປັນແບບຢ່າງນຳໜ້າໃນການຜັນຂະຫຍາຍປະຕິບັດບັນດາຂໍ້ຕົກລົງລະຫວ່າງການນຳຂັ້ນສູງ 2 ປະເທດຢ່າງເຂັ້ມງວດ, ໃນນັ້ນມີ “ຂໍ້ຕົກລົງກ່ຽວກັບບັນດາຫຼັກການແກ້ໄຂບັນຫາບົນທະເລ”. 2 ຝ່າຍຄວນເອົາໃຈໃສ່ ແລະ ມີສະຕິລະວັງຕົວບໍ່ປະໃຫ້ບັນດາກຳລັງທີ່ເປັນປໍລະປັກສວຍໃຊ້ເປັນໂອກາດແບ່ງແຍກການພົວພັນສາມັກຄີ ແລະ ຜົນປະໂຫຍດຍຸດທະສາດຍາວນານຂອງ 2 ປະເທດຫວຽດນາມ ແລະ ຈີນ, ກໍຄວາມຂາດສະຖຽນລະພາບຢູ່ແຕ່ລະປະເທດ.
