 ອົງມົງກຸດລາຊະກຸມມານ Philippe ແລະ ລາຊະທິດາ
ພາບ:vietnamplus.vn |
(vovworld) - ວັນທີ 14/3, ໃນຂອບເຂດການຢ້ຽມຢາມຫວຽດນາມ ຄະນະຜູ້ແທນລາຊະອານາຈັກແບນຊິກ ໂດຍອົງມົງກຸດລາຊະກຸມມານ Philippe ນຳຫນ້າ ໄດ້ໄປຢ້ຽມຢາມ ແລະ ເຮັດວຽກຢູ່ນະຄອນ ຫາຍຟ່ອງ. ໃນການຕ້ອນຮັບຄະນະ, ທ່ານປະທານຄະນະກຳມະການປະຊາຊົນນະຄອນ ຫາຍຟ່ອງ ເຢືອງແອງດຽນ ປາດຖະຫນາວ່າ ລາຊະອານາຈັກແບນຊິກ ສືບຕໍ່ຮ່ວມມືໃນລະດັບສູງກວ່າ ກັບຫວຽດນາມ ເວົ້າລວມ ແລະ ນະຄອນຫາຍຟ່ອງເວົ້າສະເພາະ, ປະກອບສ່ວນນຳນະຄອນຫາຍຟ່ອງກາຍເປັນນະຄອນອຸດສາຫະກຳ ທັນສະໄຫມ ແລະສີວິໄລກ່ອນປີ 2020. ອົງມົງກຸດລາຊະກຸມມານ Philippe ກໍໄດ້ໄປຢ້ຽມຢາມເຂດອຸດສາຫະກຳ ດີ່ງຫວູ ຊຶ່ງແມ່ນຫນຶ່ງໃນບັນດາໂຄງການລົງທຶນຂອງແບນຊິກ ທີ່ປະສົບຜົນສຳເລັດຢູ່ຫວຽດນາມ ແລະ ເຂົ້າຮ່ວມພິທີເປີດສະຫລອງໂຮງງານບຳບັດນ້ຳເສຍຢູ່ທີ່ນີ້.
ໃນວັນດຽວກັນ, ຄະນະປະຕິບັດງານໂດຍທ່ານ Benoit Cerexhe ລັດຖະມົນຕີກະຊວງເສດຖະກິດ ແລະ ການຄ້າຕ່າງປະເທດ ເຂດ Brussels ລາຊະອານາຈັກແບນຊິກ ເປັນຫົວຫນ້າຄະນະໄດ້ມີການເຮັດວຽກຢູ່ແຂວງ ຮ່ານາມ. ສອງຝ່າຍໄດ້ລົງນາມໃນບົດບັນທຶກຊ່ວຍຈຳ ໂຄງການ ODA ລົງທຶນກໍ່ສ້າງ ແລະ ບູລະນະບັນດາປ້ອມສູບນ້ຳ ເພື່ອຕ້ານສະພາບນ້ຳອັ່ງຢູ່ນະຄອນ ຟູ໋ລີ ແຂວງ ຮ່ານາມ ດ້ວຍຍອດມູນຄ່າ 10 ລ້ານ ເອີໂຣ.
