 ນັກຮ້ອງ Rosario Ninih Chamini Bianis ມາຈາກປະເທດ ມຽນມາ ຜູ້ໄດ້ຮັບລາງວັນທີ 1 |
ຕອນຄ່ຳວັນທີ 28 ກໍລະກົດ, ຮອບຊິງຊະນະເລີດງານປະກວດສຽງເພງ ອາຊຽນ +3 ຄັ້ງທີ 2 ປີ 2019 ໄດ້ດຳເນີນຢູ່ ແຂວງກ໋ວາງນິງ ໂດຍມີການເຂົ້າຮ່ວມຂອງທ່ານຮອງນາຍົກລັດຖະມົນຕີ ຜູ້ປະຈຳການ ລັດຖະບານ ເຈືອງຮ່ວາບິງ, ທ່ານ ຜູ້ອຳນວຍການໃຫຍ່ຂອງວິທະຍຸກະຈາຍສຽງ ຫວຽດນາມ ຫງວຽນເທ໊ກິ, ບັນດາເຈົ້າໜ້າທີ່, ແຂກຖືກເຊີນພ້ອມດ້ວຍຊາວແຂວງກ໋ວາງນິງ ເປັນຈຳນວນຫຼວງຫຼາຍ. ກ່າວຄຳເຫັນທີ່ພິທີ, ທ່ານ ຫງວຽນເທ໊ກິ ໃຫ້ຮູ້ວ່າ:
ງານປະກວດສຽງເພງ ອາຊຽນ +3 ໂດຍ VOV ຈັດຕັ້ງ 2 ປີ ເທື່ອໜຶ່ງ ແມ່ນການແຂ່ງຂັນ ແລະ ໂອກາດທີ່ດີ ເພື່ອໃຫ້ບັນດານັກສິລະປິນ, ນັກຮ້ອງໄດ້ພົບປະກັນສະແດງຄວາມສາມາດ ແລະ ນ້ຳໃຈຂອງຕົນຕໍ່ຄູ່ຮ່ວມງານ ແລະ ມະຫາຊົນທີ່ນິຍົມຊົມຊອບດົນຕີ. ເຫດການດົນຕີອັນຍິ່ງໃຫຍ່ນີ້ກໍ່ແມ່ນໜຶ່ງໃນບັນດາການເຄື່ອນໄຫວຂອງຫວຽດນາມ ເພື່ອສະເຫຼີມສະຫຼອງ 51 ປີ ແຫ່ງວັນສ້າງຕັ້ງ ອາຊຽນ ( 8 ສິງຫາ 1967 – 8 ສິງຫາ 2019)
ເຂົ້າຮ່ວມງານປະກວດ, ທ່ານຮອງນາຍົກລັດຖະມົນຕີ ຜູ້ປະຈຳການ ລັດຖະບານ ເຈືອງຮ່ວາບິງ ໃຫ້ຮູ້ວ່າ:
“ຂ້້າພະເຈົ້າໄດ້ຕີລາຄາສູງ ເລື່ອງ VOV ຈັດຕັ້ງງານປະກວດດົນຕີລະດັບພາກພື້ນຄືແນວນີ້. ລັດຖະບານສະໜັບສະໜູນບັນດາການເຄື່ອນໄຫວ ເພື່ອແນໃສ່ເພີ່ມທະວີການພົວພັນສາມັກຄີ, ມິດຕະພາບລະຫວ່າງ ຫວຽດນາມ ກັບບັນດາປະເທດ. ຂ້າພະເຈົ້າ ເຊື່ອໝັ້ນວ່າ ງານປະກວດຈະຄ່ອຍໆກາຍເປັນງານແຂ່ງຂັນທີ່ລຶ້ງເຄີຍຂອງບັນດານັກສິລະປິນ, ນັກຮ້ອງໃນເກນອາຍຸ 18 – 35 ປີ ຂອງບັນດາປະເທດ ອາຊຽນ”
ຜ່ານການສະແດງຂອງຜູ້ເຂົ້າຮ່ວມງານປະກວດ 10 ຄົນທີ່ເຂົ້າຮ່ວມຮອບຊິງຊະນະເລີດ, ຄະນະກຳມະການໄດ້ຕັດສິນໃຫ້ຜູ້ເຂົ້າແຂ່ງຂັນ Rosario Ninih Chamini Bianis ມາຈາກປະເທດ ມຽນມາ, ໄດ້ຮັບລາງວັນທີ 1. ນອກຈາກນັ້ນ, ນັກຮ້ອງສອງຄົນ ແມ່ນ ເຈິ່ນຮົ່ງຍຸງ (ຫວຽດນາມ) ແລະ Aicelle Anne Coronel Santos (ຟີລິບປິນ)ໄດ້ຮັບລາງວັນທີ 2, ນັກຮ້ອງ 2 ຄົນແມ່ນ Olivia Christina (ອິນໂດເນເຊຍ) ແລະ Eint Chit (ມຽນມາ) ໄດ້ຮັບລາງວັນທີ 3.
