(VOVWORLD) - ດ້ວຍການປູກຕົ້ນໝາກຂຽບແນວພັນໄທ (ໝາກຂຽບໄທ), ແຕ່ລະປີມີຊາວກະສິກອນຫຼາຍຄົນຢູ່ເມືອງ ໂອມົນ, ນະຄອນເກິ່ນເທີ ມີລາຍຮັບແຕ່ 7 – 8 ຕື້ດົ່ງ (ປະມານ 300.000USD). ພາຍຫຼັງລົບຄ່າໃຊ້ຈ່າຍປຸ໋ຍ, ຢາ, ຄ່າແຮງງານ… ແຕ່ລະປີປະຊາຊົນຢູ່ແຫ່ງນີ້ ມີກຳໄລຫຼາຍກ່ວາ 4 ຕື້ດົ່ງ (150.000USD). ໝາກຂຽບໄທ ໂດຍຜູ້ບໍລິໂພກນິຍົມຊົມຊອບຍ້ອນວ່າໝາກໃຫຍ່ ແລະ ງາມຕາ.
 ສວນປູກໝາກຂຽບໄທຂອງຊາວເກົ່ນເທີ (ພາບ: VOV) |
ເລື່ອງລາວສ້າງຄວາມຮັ່ງມີຂອງລຸງ ຟານວັນບິດ, ຢູ່ເມືອງ ໂອມົນ, ນະຄອນເກິ່ນເທີ ບໍ່ແມ່ນເລື່ອງແປກສຳລັບຊາວທ້ອງຖິ່ນ. ແຕ່ລະປີ, ເນື້ອທີ່ປູກໝາກຂຽບໄທຂອງ ລຸງບິດ ໄດ້ແຕກດອກອອກຜົນສະໝ່ຳສະເໜີ ແລະ ລາຍຮັບກຳໄລແມ່ນກ່ວາ 4 ຕື້ດົ່ງ, ພ້ອມກັນນັ້ນ ລຸງຍັງສ້າງວຽກເຮັດງານທຳໃຫ້ແກ່ຊາວຜູ້ອອກແຮງງານ 7 – 8 ຄົນ. ແຕ່ລະເດືອນເຂົາເຈົ້າມີລາຍຮັບແຕ່ 12 – 15 ລ້ານດົ່ງ (500 – 600 USD).
ໂດຍໄດ້ປູກຕົ້ນໝາກຂຽບໄທມາເປັນເວລາກ່ວາ 10 ປີ (ແຕ່ປີ 2015) ມາຮອດປັດຈຸບັນ, ລຸງບິດ ໄດ້ເປີດກ້ວາງເນື້ອທີ່ປູກ, ແຕ່ 1,7 ເຮັກຕາຂຶ້ນເປັນເກືອບ 10 ເຮັກຕາ, ໃນນັ້ນ ເນື້ອທີ່ໃຫ້ໝາກແຕ່ລະປີແມ່ນ 7 ເຮັກຕາ. ລຸງບິດ ແບ່ງປັນວ່າ ໝາກຂຽບໄທປູກງ່າຍ, ເປັນແມງໜ້ອຍ ແລະ ບໍ່ເລືອກດິນ, ປີໜຶ່ງໃຫ້ໝາກ 2 ລະດູ, ສະມັດຕະພາບສູງ, ລາຄາຂາຍຕ່ຳສຸດແມ່ນ 30.000 VND (1,2 USD)/ກີໂລກຼາມ, ໄລຍະທີ່ຳດ້ລາຄາດີແມ່ນ 50 – 60.000 VND (2-2,4 USD)/ກີໂລກຼາມ... ປີນີ້ຄາດວ່າ ປະລິມານໝາກຂຽບໄທຂອງ ລຸງບິດ ຈະເກັບກ່ຽວໄດ້ປະມານ 200 ໂຕນ, ໄລຍະເກັບກ່ຽວແມ່ນແຕ່ຫຼັງປີໃໝ່ປະຈຳຊາດ ຫວຽດນາມ ໄປຮອດເດືອນ ເມສາ:
ຂ້າພະເຈົ້າປູກໝາກຂຽບໄທ ໃນເນື້ອທີ່ 90.000 ຕາແມັດ, ປັດຈຸບັນມີຕົ້ນທີ່ໄດ້ປູກໃນເນື້ອທີ່ 70.000 ຕາແມັດ ພວມອອກຜົນ. ຄວາມລໍຄອຍຂອງຂ້າພະເຈົ້າແມ່ນ ເຮັດແນວໃດເຮົາຈະມີຕະຫຼາດເພື່ອໃຫ້ພໍ່ແມ່ປະຊາຊົນມີກຳໄລເປັນປົກກະຕິ. ປີກາຍນີ້, ຂ້າພະເຈົ້າເກັບກ່ຽວໝາກຂຽບໄດ້ປະມານ 250 ໂຕນ, ລາຍຮັບປະມານ 7 – 8 ຕື້ດົ່ງ.
ເພື່ອໃຫ້ການປູກໝາກຂຽບໄທບັນລຸສະມັດຕະພາບສູງ, ມີຄຸນນະພາບ ລຸງ ຟານວັນບິດ ຍາມໃດກໍ່ມີຄວາມເອົາໃຈໃສ່ເປັນພິເສດເຖິງວິວັດການບົວລະບັດຕົ້ນໄມ້, ເປັນຕົ້ນແມ່ນຈຸດເວລາໝາກຂຽບໄທອອກດອກ. ນີ້ແມ່ນຈຸດເວລາຕັດສິນຕໍ່ສະມັດຕະພາບຂອງທັງລະດູການ.
ນັບແຕ່ເວລາເລີ່ມມີໝາກຈົນຮອດເວລາເກັບກ່ຽວແມ່ນຕ້ອງເສຍເວລາ 3 ເດືອນ, ແຕ່ວ່າ ພາຍຫຼັງມີໝາກເປັນເວລາ 60 ວັນຕ້ອງຫໍ່ໝາກເພື່ອໃຫ້ໝາກມີຄວາມສະໝ່ຳສະເໝີ, ງາມຕາ ແລະ ຂາຍໄດ້ລາຄາດີ. ພ້ອມກັນນັ້ນ, ການສີດປຸ໋ຍ, ຢາປາບແມງໄມ້ກໍ່ຕ້ອງໄດ້ຮັບການປະຕິບັດຖືກຕ້ອງຕາມຈຸດເວລາຈຶ່ງບັນລຸສະມັດຕະພາບສູງ.
ຕາມທ່ານ ຟານວັນບິດ ແລ້ວ, ໝາກຂຽບແຕ່ລະໜ່ວຍມີນ້ຳໜັກແຕ່ 500 ກຼາມ – 700 ກຼາມ. ປັດຈຸບັນ, ໝາກຂຽບໄທສ່ວນຫຼາຍໄດ້ຊົມໃຊ້ຢູ່ພາຍໃນປະເທດ, ລຸງບິດ ມີຄວາມປາດຖະໜາຢາກໄດ້ຮັບການໜູນຊ່ວຍຈາກອົງການທີ່ມີໜ້າທີ່ຮັບຜິດຊອບເພື່ອສ້າງເຄື່ອງໝາຍການຄ້າ ແລະ ເປີດກວ້າງຕະຫຼາດ, ພິເສດແມ່ນການສົ່ງອອກໄປຍັງ ຈີນ, ຍີ່ປຸ່ນ:
ສະເພາະເມືອງ ໂອມົນ, ຕາແສງ ລອງຮຶງ ໄດ້ປູກຕົ້ນໝາກຂຽບໄທເປັນຈຳນວນຫຼາຍທີ່ສຸດ. ຊາວກະສິກອນເຮັດຕາມຂັ້ນຕອນ, ພໍ່ແມ່ປະຊາຊົນຕ້ອງມີສົ້ນອອກເພື່ອຂາຍໄດ້ລາຄາເປັນປົກກະຕິ. ປັດຈຸບັນ, ຂ້າພະເຈົ້າມີຄວາມຫວັງວ່າຈະສາມາດສ້າງເຄື່ອງໝາຍການຄ້າໄດ້, ມີໃບຢັ້ງຢືນຕົ້ນໝາກຂຽບໄທ ລອງຮຶງ.
ກໍ່ຄືກັນກັບລຸງ ຟານວັນບິດ, ລຸງ ຫງວຽນແທັງຫ໋າຍ ຢູ່ຕາແສງ ເທີຍຮຶງ ພວມປູກຝັງໝາກຂຽບໄທ ໃນເນື້ອທີ່ 4 ເຮັກຕາ. ໃນໄລຍະຈະມາເຖິງ, ລຸງຈະທະວີຄູນຮູບແບບນີ້ຂຶ້ນເຖິງ 5 – 7 ເຮັກຕາ. ຕາມລຸງຫ໋າຍ ແລ້ວ, ເຖິງວ່າຄ່າໃຊ້ຈ່າຍ ແລະ ການບົວລະບັດໝາກຂຽບໄທມີຄວາມລຳບາກຫຍຸ້ງຍາກຫຼາຍ ແຕ່ມັນມີປະສິດທິຜົນທາງດ້ານເສດຖະກິດດີກ່ວາຫຼາຍເມື່ອທຽບໃສ່ກັບຮູບແບບປູກຕົ້ນໄມ້ແນວພັນຕ່າງໆ. ລຸງ ຫງວຽນແທັງຫ໋າຍ ໃຫ້ຮູ້ວ່າ:
ໝາກຂຽບໄທນຳມາເຊິ່ງຄຸນຄ່າທາງດ້ານເສດຖະກິດສູງ. ປູກໝາກຂຽບ 1 ເຮັກຕາ ສາມາດເກັບກ່ຽວໝາກໄດ້ສິບປາຍໂຕນ. ລາຄາແມ່ນ 30.000 ດົ່ງ/ກີໂລກຼາມ ເຫັນວ່າມີກຳໄລຫຼາຍແລ້ວ, ເມື່ອທຽບໃສ່ກັບການເຮັດນາແມ່ນທົບ 10 ເທົ່າ. ປັດຈຸບັນ ສວນນີ້ຍັງນ້ອຍ ແຕ່ປີຕໍ່ໄປອາດຈະປູກຕື່ມອີກ 5 – 7 ເຮັກຕາ… ຄວາມຫວັງໃນປັດຈຸບັນມີສົ້ນອອກເປັນປົກກະຕິ, ສາມາດສ້າງເຄື່ອງໝາຍການຄ້າ ແລະ ສົ່ງອອກໄປຍັງຕ່າງປະເທດ… ຈະຊ່ວຍໃຫ້ຂ້າພະເຈົ້າ ແລະ ພໍ່ແມ່ປະຊາຊົນໃນການພັດທະນາຕົ້ນໝາກຂຽບໄດ້ຫຼາຍກ່ວາອີກ.
ຮູບແບບປູກໝາກຂຽບໄທ ໄດ້ນຳມາເຊິ່ງປະສິດທິຜົນທາງດ້ານເສດຖະກິດສູງສຳລັບຊາວກະສິກອນຢູ່ ເກິ່ນເທີ. ໃນໄລຍະຜ່ານມາ, ທາງນະຄອນເກິ່ນເທີ ໄດ້ໜູນຊ່ວຍປະຊາຊົນສາມາດເປີດກວ້າງເນື້ອທີ່ປູກ, ສ້າງເຄື່ອງໝາຍການຄ້າ ແລະ ສຳຜັດກັບບັນດາຊ່ອງທາງແຈກຢາຍທີ່ທັນສະໄໝ, ກໍ່ຄືຊອກຫາໂອກາດສົ່ງອອກຜະລິດຕະພັນໄປຍັງຕະຫຼາດ ຈີນ, ຍີ່ປຸ່ນ. ຍ້ອນເຫດນັ້ນ, ຜູ້ປູກໝາກຂຽບຢູ່ ເກິ່ນເທີ ກໍ່ມີຄວາມອຸ່ນອ່ຽງໃຈໃນການຜະລິດ, ພັດທະນາຕົ້ນໝາກຂຽບໄທ.
