ທ່ານນາຍົກລັດຖະມົນຕີຫວຽດນາມ Nguyen Tan Dung ແລະ ລັດຖະມົນຕີກະຊວງສິ່ງແວດລ້ອມສ.ເກົາຫຼີ ທ່ານນາງ Yoo Young Sook
(ພາບ : Internet )
|
Vovworld- ຕອນບ່າຍວັນທີ 7/5, ຢູ່ຮ່າໂນ້ຍ, ທີ່ການຕ້ອນຮັບລັດຖະມົນຕີກະຊວງສິ່ງແວດລ້ອມສ.ເກົາຫຼີ ທ່ານນາງ Yoo Young Sook ຊຶ່ງພວມຢ້ຽມຢາມຫວຽດນາມ, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ຕີລາຄາສູງສາຍພົວພັນ ແລະ ໝາກຜົນແຫ່ງການຮ່ວມມືລະຫວ່າງກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ ແລະ ກະຊວງສິ່ງແວດລ້ອມ ສ.ເກົາຫຼີ , ອັນໄດ້ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການພົວພັນຮ່ວມມືລະຫວ່າງ 2 ປະເທດໃນຂົງເຂດຕ່າງໆ. ທ່ານນາຍົກລັດຖະມົນຕີຫວຽດນາມ Nguyen Tan Dung ຢືນຢັນວ່າ ລັດຖະບານຫວຽດນາມຍາມໃດກໍສະໜັບສະໜູນ ແລະ ຮັບປະກັນບັນດາການເຄື່ອນໄຫວຮ່ວມມືລະຫວ່າງ ກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ ແລະ ກະຊວງສິ່ງແວດລ້ອມ ສ.ເກົາຫຼີ ໃຫ້ນັບມື້ນັບພັດທະນາຢ່າງເລິກເຊິ່ງກ້ວາງຂວາງ ແລະ ມີປະສິດທິຜົນ. ຫວຽດນາມຍາມໃດກໍເອົາໃຈໃສ່ເຖິງການເຄື່ອນໄຫວປົກປັກຮັກສາສິ່ງແວດລ້ອມຊີວະພາບ, ຮັບມືກັບການປ່ຽນແປງຂອງດິນຟ້າອາກາດ ແລະ ນ້ຳທະເລຂຶ້ນສູງ. ທ່ານນາຍົກລັດຖະມົນຕີຫວຽດນາມ Nguyen Tan Dung ຫວັງວ່າ ສ.ເກົາຫຼີຈົ່ງເພີ່ມທະວີການຮ່ວມມືໜູນຊ່ວຍຫວຽດນາມໃນຂົງເຂດ ປົກປັກຮັກສາສິ່ງແວດລ້ອມຊີວະພາບ, ກໍ່ສ້າງແຫຼ່ງຊັບພະຍາກອນມະນຸດໃນຂົງເຂດ ປົກປັກຮັກສາສິ່ງແວດລ້ອມ ກໍຄືໜູນຊ່ວຍແຫຼ່ງກຳລັງຮັບມື ກັບການປ່ຽນແປງຂອງດິນຟ້າອາກາດ ແລະ ນ້ຳທະເລຂຶ້ນສູງ.
