(vovworld) - ໂດຍຮັບຄຳເຊື້ອເຊີນຂອງທ່ານນາຍົກລັດຖະມົນຕີຍີ່ປຸ່ນ Yoshihiko Noda, ວັນທີ 19/4, ທ່ານນາຍົກລັດຖະມົນຕີ Nguyen Tan Dung ໄດ້ນຳໜ້າຄະນະຜູ້ແທນຫວຽດນາມເດີນທາງອອກຈາກຮ່າໂນ້ຍ ໄປໂຕກຽວ, ປະເທດຍີ່ປຸ່ນ ເຂົ້າຮ່ວມກອງປະຊຸມຂັ້ນສູງແມ່ຂອງ - ຍີ່ປຸ່ນ ຄັ້ງທີ 4 ເຊິ່ງດຳເນີນໃນລະຫວ່າງວັນທີ 20 ແລະ 21/4. ທີ່ກອງປະຊຸມ, ທ່ານນາຍົກລັດຖະມົນຕີ Nguyen Tan Dung ໄດ້ພ້ອມກັບການນຳບັນດາປະເທດແມ່ນ້ຳຂອງ ແລະ ຍີ່ປຸ່ນຈະປຶກສາຫາລືຍຸດທະສາດໂຕກຽວ ເພື່ອແທນໃຫ້ຖະແຫຼງການໂຕກຽວທີ່ກອງປະຊຸມຂັ້ນສູງແມ່ຂອງ - ຍີ່ປຸ່ນ ຄັ້ງທຳອິດ. ເນື້ອໃນຈຸດສຸມຂອງຍຸດທະສາດໂຕກຽວ, ແມ່ນເພີ່ມທະວີລັກສະນະເຊື່ອມຈອດຂອງອະນຸພາກພື້ນ, ຮ່ວມມືພ້ອມກັນພັດທະນາລະຫວ່າງບັນດາປະເທດໃນອະນຸພາກພື້ນແມ່ນ້ຳຂອງກັບຍີ່ປຸ່ນ, ພ້ອມທັງຍົກສູງຊີວິດການເປັນຢູ່ຂອງປະຊາຊົນຂຶ້ນຕື່ມ, ຮັບປະກັນຄວາມໝັ້ນຄົງຂອງມະນຸດກໍ່ຄືສິ່ງແວດລ້ອມ. ແລະ ກໍ່ຢູ່ທີ່ກອງປະຊຸມ, ທ່ານນາຍົກລັດຖະມົນຕີ Nguyen Tan Dung ໄດ້ມີບົດປາໄສສຳຄັນກ່ຽວກັບທິດທາງຮ່ວມມືກໍ່ຄືບັນດາບຸລິມາສິດຂອງຫວຽດນາມ ໃນຂອບເຂດການຮ່ວມມືແມ່ຂອງ - ຍີ່ປຸ່ນ, ໃນນັ້ນມີບັນຫາຄຸ້ມຄອງ ແລະ ນຳໃຊ້ແຫຼ່ງນ້ຳແມ່ຂອງຢ່າງໝັ້ນຄົງ. ທ່ານນາຍົກລັດຖະມົນຕີ Nguyen Tan Dung ກໍ່ຈະມີການພົບປະກັບບັນດາເຈົ້າໜ້າທີ່ຂັ້ນສູງຂອງລັດຖະບານຍີ່ປຸ່ນ, ບັນດາກຸ່ມບໍລິສັດ, ອົງການເສດຖະກິດໃຫຍ່ຂອງຍີ່ປຸ່ນ ເພື່ອແນໃສ່ເພີ່ມທະວີຄວາມເຂົ້າອົກເຂົ້າໃນເຊິ່ງກັນແລະກັນ ແລະ ຍູ້ແຮງການພົວພັນຄູ່ຮ່ວມມືຍຸດທະສາດຫວຽດນາມ - ຍີ່ປຸ່ນ ໃຫ້ນັບມື້ນັບເລິກເຊິ່ງ, ແທດຈິງ ແລະ ມີປະສິດທິຜົນ.
