(vovworld) – ສຳນັກຂ່າວສານສູນກາງ ສປປ ເກົາຫຼີ KCNA ໃຫ້ຂ່າວວ່າ: ຕອນເຊົ້າວັນທີ 13/4 ສປປ ເກົາຫຼີ ໄດ້ຍິງດາວທຽມສັງເກດໜ່ວຍໂລກຂຶ້ນ, ແຕ່ດາວທຽມພັດບໍ່ເຂົ້າວົງໂຄຈອນໄດ້. ພາຍຫຼັງເຫດການຍິງດາວທຽມຂອງ ສປປ ເກົາຫຼີ ປະລາໄຊ, ຜູ້ຕາງໜ້າຂອງປະເທດຈຳນວນໜຶ່ງຄື: ອາເມລິກາ, ອັງກິດ, ເຢຍລະມັນ, ສ ເກົາຫຼີ ແລະ ຍີ່ປຸ່ນ ໄດ້ອອກສຽງວິຈານກ່ຽວກັບເຫດການນີ້.
ຢູ່ວໍຊິງເຕີນ, ທຳນຽບຂາວ ໄດ້ອອກຖະແລງການຢືນຢັນວ່າ: “ເຫດການຍິງລູກສອນໄຟຂອງ ສປປ ເກົາຫຼີ, ເຖິງວ່າຖືກປະລາໄຊກໍຕາມ ແຕ່ພັດແມ່ນການກະທຳທີ່ລະເມີດກົດໝາຍສາກົນ, ໄປຝືນກັບບັນດາຄຳໝັ້ນສັນຍາຫວ່າງແລ້ວນີ້ຂອງພຽງຢາງ ແລະ ນາບຂູ່ເຖິງຄວາມສະຫງົບປອດໄພໃນພາກພື້ນ”.
ໃນຂະນະນັ້ນ, ທ່ານລັດຖະມົນຕີການຕ່າງປະເທດ ສ ເກົາຫຼີ Kim Sung Hwan ໄດ້ຖະແຫຼງວ່າ: ສປປ ເກົາຫຼີຕ້ອງຮັບຜິດຊອບກ່ຽວກັບເຫດການຍິງລູກສອນໄຟນີ້. Seoul ຢືນຢັນວ່າການກະທຳນີ້ຂອງ ສປປ ເກົາຫຼີ ແມ່ນລະເມີດຄຳສັ່ງຂອງສະຫະປະຊາຊາດ.
ສ່ວນຝ່າຍ ຍີ່ປູ່ນ, ລັດຖະມົນຕີກະຊວງປ້ອງກັນປະເທດ ຍີ່ປູ່ນ Naoki Tanaka ຢັ້ງຢືນວ່າ ລູກສອນໄຟຂອງ ສປປ ເກົາຫຼີ ຖືກຕົກ, ພ້ອມທັງໃຫ້ຮູ້ວ່າ ການຍິງລູກສອນໄຟນີ້ບໍ່ສົ່ງຜົນສະທ້ອນເຖິງຜືນແຜ່ນດີນຂອງຍີ່ປູ່ນ.
ລັດຖະມົນຕີການຕ່າງປະເທດອັງກິດ William Hague ກໍໄດ້ອອກຖະແຫຼງການສະແດງຄວາມວິຕົກກັງວົນຢ່າງເລິກເຊິ່ງ ກ່ຽວກັບເຫດການຍິງດາວທຽມຂອງ ສປປ ເກົາຫຼີ ແລະ ຮຽກຮ້ອງໃຫ້ມີປະຕິກິລິຍາຢ່າງແຂງແຮງຈາກປະຊາຄົມໂລກ.
ແລະກໍໃນວັນດຽວກັນ, ສະພາຄວາມໝັ້ນຄົງສະຫະປະຊາຊາດ ໄດ້ຈັດຕັ້ງກອງປະຊຸມດ່ວນ ເພື່ອພິຈາລະນາກ່ຽວກັບເຫດການຍິງດາວທຽມຂອງ ສປປ ເກົາຫຼີ. ຍີ່ປຸ່ນ ແລະ ສ ເກົາຫຼີ ກໍຈະຮຽກໂຮມການປະຊຸມປ້ອງກັນຄວາມສະຫງົບດ່ວນໃນວັນດຽວກັນ ເພື່ອພິຈາລະນາກ່ຽວກັບປະຕິກິລິຍາຕໍ່ເຫດການຍິງດາວທຽງນີ້.
