( vovworld ) - ວັນທີ 12/6, ຄະນະປະຕິບັດງານຂອງຄະນະກຳມະການສູນກາງແນວໂຮມປະເທດຊາດຫວຽດນາມ ໂດຍທ່ານປະທານ Huynh Dam ນຳໜ້າ ໄດ້ລົງຢ້ຽມຢາມ ແລະ ເຮັດວຽກກັບຄະນະຊີ້ນຳເຂດຕາເວັນຕົກພາກໃຕ້ ແລະ ນະຄອນເກີນເທີ. ກ່າວຄຳເຫັນນະທີ່ນີ້, ທ່ານ Huynh Dam ໄດ້ເນັ້ນໜັກເຖິງບົດບາດ, ທີ່ຕັ້ງຂອງຄະນະຊີ້ນຳເຂດຕາເວັນຕົກພາກໃຕ້ ຕໍ່ການພັດທະນາຂອງບັນດາແຂວງ, ນະຄອນໃນເຂດທົ່ງພຽງແມ່ນ້ຳຂອງ. ທ່ານ Huynh Dam ກໍສະເໜີໃຫ້ຄະນະຊີ້ນຳເຂດຕາເວັນຕົກພາກໃຕ້ ພ້ອມກັບແນວໂຮມປະເທດຊາດບັນດາແຂວງ ເອົາໃຈໃສ່ເຖິງການກໍ່ສ້າງ, ປັບປຸງ ແລະ ເສີມຂະຫຍາຍກຳລັງແຮງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ຫັນບັນດາຮູບແບບເຕົ້າໂຮມປະຊາຊົນເປັນຫຼາຍຮູບຫຼາຍແບບ ພ້ອມກັນນັ້ນສ້າງຄວາມສາມັກຄີມິດຕະພາບກັບປະເທດບ້ານໃກ້ເຮືອນຄຽງກຳປູເຈຍ. ຄະນະຊີ້ນຳເຂດຕາເວັນຕົກພາກໃຕ້ ຄວນເສີມຂະຫຍາຍທ່າແຮງຂອງປະຊາຊົນທຸກຊັ້ນວັນນະ, ປຸກລະດົມຂະບວນການແຂງຂັນຮັກຊາດໃນໝູ່ປະຊາຊົນ, ຕອບສະໜອງບັ້ນຂົນຂວາຍ “ ທົ່ວປວງຊົນສາມັກຄີກັນກໍ່ສ້າງຊີວິດວັດທະນະທຳຢູ່ເຂດຊຸມຊົນ ” ແລະ “ ວັນເພື່ອຄົນທຸກຍາກ ”. ໃນການເຮັດວຽກກັບຜູ້ປະຈຳການຄະນະເລຂາພັກນະຄອນ, ຄະນະກຳມະການປະຊາຊົນນະຄອນເກີນເທີ, ທ່ານປະທານ Huynh Dam ຖືວ່າ ດ້ວຍທີ່ຕັ້ງຍຸດທະສາດທີ່ສຳຄັນຂອງເຂດຕາເວັນຕົກພາກໃຕ້, ເກີນເທີ ຕ້ອງເສີມຂະຫຍາຍກຳລັງແຮງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເອົາໃຈໃສ່ເບິ່ງແຍງເຖິງສິດ ແລະ ຜົນປະໂຫຍດໃຫ້ແກ່ພໍ່ແມ່ປະຊາຊົນບັນດາເຜົ່າ, ສາສະໜາ, ພິເສດແມ່ນປະຊາຊົນທີ່ທຸກຍາກ, ສືບຕໍ່ສົມທົບກັນຍູ້ແຮງຂະບວນການແຂງຂັນຮັກຊາດຢ່າງມີປະສິດທິຜົນ, ປະກອບສ່ວນພັດທະນາເສດຖະກິດ, ສັງຄົມຂອງນະຄອນ.
