 (ການນຳ ລາວ ຮັບຊົມຮູບເງົາເອກະສານກ່ຽວກັບປະທານ ໂຮ່ຈີມິນ) |
ເພື່ອນ ສຸລິວົງ, ຢູ່ນະຄອນຫຼວງ ວຽງຈັນ, ໄດ້ໂທລະສັບມາຫາລາຍການພາກພາສາ ລາວ, ແບ່ງປັນຂໍ້ມູນດ້ວຍເນື້ອໃນທີ່ວ່າ: ວັນທີ 20 ພຶດສະພາ ຜ່ານມາ, ຢູ່ສຳນັກງານສູນກາງພັກປະຊາຊົນປະຕິວັດ ລາວ, ທີ່ນະຄອນຫຼວງ ວຽງຈັນ, ພັກ ແລະ ລັດ ລາວ ໄດ້ຈັດພິທີສະເຫຼີມສະຫຼອງ 135 ປີແຫ່ງວັນຄ້າຍວັນເກີດປະທານ ໂຮ່ຈີມິນ ຜູ້ນຳທີ່ຍິ່ງໃຫຍ່ (19 ພຶດສະພາ 1890 – 19 ພຶດສະພາ 2025) ຂຶ້ນຢ່າງສົມກຽດ. ພິທີສະເຫຼີມສະຫຼອງໂດຍທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ ເປັນປະທານ. ເຫດການໄດ້ດຳເນີນກ່ອນເວລາໄຂກອງປະຊຸມເທື່ອທີ 2 ຂອງກອງປະຊຸມຄົບຄະນະຄັ້ງທີ 10 ຄະນະບໍລິຫານງານສູນກາງພັກປະຊາຊົນປະຕິວັດ ລາວ ຊຸດທີ 11. ກ່າວຄຳເຫັນທີ່ເຫດການ, ທ່ານເລຂາທິການໃຫຍ່, ປະທານປະເທດ ລາວ ທອງລຸນ ສີສຸລິດ, ຢືນຢັນວ່າ ແນວຄິດ, ຄຸນສົມບັດ ແລະ ແບບຢ່າງປະຕິວັດຂອງປະທານ ໂຮ່ຈີມິນ ຍາມໃດກໍ່ຢູ່ໃນດວງໃຈຂອງພະນັກງານ, ສະມາຊິກພັກ ແລະ ປະຊາຊົນ ລາວ ທຸກລຸ້ນຄົນ; ແມ່ນແຫຼ່ງລະດົມກຳລັງໃຈຢ່າງໃຫຍ່ຫຼວງເພື່ອໃຫ້ 2 ປະເທດສືບຕໍ່ອະນຸລັກຮັກສາ, ເພີ່ມພູນຄູນສ້າງ ແລະ ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຢ່າງຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ ລາວ - ຫວຽດນາມ ໃນໄລຍະໃໝ່.
ເພື່ອນ ຈັນແສງ ພິມມະສອນ, ເພື່ອນ ຄຳມີ ແລະ ຜູ້ຟັງຫຼາຍທ່ານໄດ້ໃຫ້ຄຳເຫັນໃນ fanpage Lao VOV5. ໃນນັ້ນ, ເພື່ອນ ທິດາ ກິດຈະເລີນ ໄດ້ຂຽນວ່າ: ໃນປະຫວັດສາດການພົວພັນສາກົນນັບແຕ່ກ່ອນມາຮອດປະຈຸບັນ, ສາຍພົວພັນພິເສດ ຫວຽດນາມ - ລາວ ແມ່ນສາຍພົວພັນທີ່ພົ້ນເດັ່ນ, ເປັນແບບຢ່າງ, ຫາຍາກລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດ ໃນການຕໍ່ສູ້ເພື່ອເອກະລາດຊົນຊາດ ແລະ ລັດທິສັງຄົມນິຍົມ. ຍາມໃດປະທານ ໂຮ່ຈີມິນ ກໍ່ເອົາໃຈໃສ່ຢ່າງເລິກເຊິ່ງກ່ຽວກັບບັນຫາໜູນຊ່ວຍກໍ່ສ້າງ ແລະ ພັດທະນາກຳລັງ, ເສີມຂະຫຍາຍຈິດໃຈເອກະລາດເປັນເຈົ້າການປະຕິວັດ ລາວ, ຖືການໜູນຊ່ວຍ ລາວ ທັງແມ່ນໜ້າທີີ່ຄວາມຮັບຜິດຊອບ, ທັງແມ່ນພັນທະ ແລະ ຖືນີ້ແມ່ນເນື້ອໃນສຳຄັນທີ່ສຸດຂອງຄວາມສາມັກຄີ ແລະ ຮ່ວມສຳພັນສູ້ຮົບ ຫວຽດນາມ - ລາວ. ເນື່ອງໃນໂອກາດ 135 ປີແຫ່ງວັນຄ້າຍວັນເກີດປະທານ ໂຮ່ຈີມິນ, ອີກເທື່ອໜຶ່ງ, ພວກຂ້າພະເຈົ້າຢືນຢັນວ່າ ຈະເຮັດຈົນສຸດຄວາມສາມາດຂອງຕົນເພື່ອປົກປັກຮັກສາ ແລະ ເສີມຂະຫຍາຍສາຍພົວພັນມິດຕະພາບ, ນ້ຳໃຈສາມັກຄີພິເສດ ແລະ ການພົວພັນຮ່ວມມືຢ່າງຮອບດ້ານລະຫວ່າງ 2 ປະເທດ.
ເພື່ອນ ນີລະພອນ, ຢູ່ນະຄອນຫຼວງ ວຽງຈັນ ໄດ້ສົ່ງອີເມວມາຫາລາຍການ, ສົ່ງຄຳອວຍພອນວັນເດັກສາກົນ 01 ມິຖຸນາ. ໃນອີເມວ ເພື່ອນແບ່ງປັນວ່າ: “ຂ້າພະເຈົ້າຮູ້ວ່າ, ອີກ 1 ອາທິດທີ່ຈະມາເຖິງນີ້ແມ່ນຮອດວັນເດັກສາກົນ 01 ມິຖຸນາ. ນີ້ກໍ່ແມ່ນໂອກາດເພື່ອເຊີດຊູ ແລະ ປົກປ້ອງສິດຜົນປະໂຫຍດຂອງເດັກ, ຕິດພັນຄອບຄົວ ແລະ ສັງຄົມ ໃນການເບິ່ງແຍງດູແລ ແລະ ພັດທະນາໃຫ້ແກ່ລຸ້ນໜຸ່ມ. ເນື່ອງໃນໂອກາດນີ້, ຂ້າພະເຈົ້າຂໍອວຍພອນໃຫ້ພວກນ້ອງເຍົາວະຊົນ, ອະນຸຊົນ ຫວຽດນາມ ຍາມໃດກໍ່ມີຄວາມເບີກບານມ່ວນຊື່ນ, ປະຕິບັດສຳເລັດການຮຽນດ້ວຍຜົນການຮຽນດີ, ປະກອບສ່ວນສ້າງສາປະເທດ ຫວຽດນາມ ໃຫ້ນັບມື້ນັບໝັ້ນຄົງເຂັ້ມແຂງ”.
 ງານບຸນດ້ານຈິດວິນຍານ ເວຍບ່າແດນ, ຢູ່ເຂດພູ ບ່າແດນ, ຈະຈັດຂຶ້ນແຕ່ວັນທີ 30 ພຶດສະພາ - 01 ມິຖຸນາ(ພາບປະກອບ: sungroup.com.vn)
|
ເພື່ອນ ອິນແກ້ວ ລາດຕະວົງ ໄດ້ສົ່ງອີເມວມາຫາລາຍການ ໃຫ້ຮູ້ວ່າ, ເພື່ອນໄດ້ຮັບຟັງຫຼາຍຄັ້ງກ່ຽວກັບສະຖານທີ່ທ່ອງທ່ຽວຫຼາຍແຫ່ງຂອງ ຫວຽດນາມ. ໃນໄລຍະຜ່ານມາ, ເພື່ອນກໍ່ໄດ້ຮັບຂ່າວວ່າຈະຈັດງານບຸນດ້ານຈິດວິນຍານ ເວຍບ່າແດນ, ຢູ່ເຂດພູ ບ່າແດນ (ແຂວງ ໄຕນິງ). ຜ່ານລາຍການພາກພາສາ ລາວ, ເພື່ອນຢາກຊອກຮູ້ຂໍ້ມູນຈຳນວນໜຶ່ງຂອງການເຄື່ອນໄຫວໃນງານບຸນດັ່ງກ່າວ.
ເພື່ອນ ອິນແກ້ວ ລາດຕະວົງ ທີ່ຮັກແພງ, ຖ້າຫາກວ່າ ແຂກທ່ອງທ່ຽວມາຢ້ຽມຢາມແຂວງ ໄຕນິງ ໃນໂອກາດຈັດງານບຸນດ້ານຈິດວິນຍານ ເວຍບ່າແດນ, ຢູ່ເຂດພູ ບ່າແດນ, ແຕ່ວັນທີ 30 ພຶດສະພາ - 01 ມິຖຸນາ ຈະມາເຖິງນີ້, ເພື່ອນສາມາດເຂົ້າຮ່ວມການຖະຫວາຍສັກກະລະບູຊາ, ຄົ້ນຫາຕະຫຼາດຂາຍໃບໄມ້, ໄຕ້ກະໂທງຖະຫວາຍ ພ້ອມກັບການເຄື່ອນໄຫວຫຼາຍຢ່າງອື່ນອີກ. ງານບຸນ ເວຍບ່າແດນ ໄດ້ຈັດຂຶ້ນຢ່າງສົມກຽດຢູ່ລະບົບວັດເຂດພູ ບ່າແດນ, ເພື່ອແນໃສ່ສະແດງຄວາມເຄົາລົບ ລິງເຊີນແທັງເມົາ (ພະແມ່ ລິງເຊີນ) - ເປັນເທວະດາປົກປ້ອງເຂດດິນແດນໃນເຂດ ໃນການດຳເນີນຊີວິດເຫຼື້ອມໄສເຊື່ອຖືຂອງປະຊາຊົນພາກໃຕ້ ຫວຽດນາມ. ປີນີ້, ງານບຸນ ເວຍບ່າແດນ ໄດ້ຈັດຂຶ້ນຢູ່ ລິງເຊີນຕຽນແທັກຕື້ ແລະ ວັງ ບ່າ - ຕັ້ງຢູ່ກາງພູ ບ່າແດນ (ໄຕນິງ). ແຂກທ່ອງທ່ຽວສາມາດຮັບຊົມບັນດາພິທີກຳທີ່ເປັນມູນເຊື້ອ, ຄື: ພິທີຫົດສົງ ບ່າ, ພິທີສວດມົນ, ພິທີຖະຫວາຍເຄື່ອງບູຊາ 10 ຢ່າງ (ດອກໄມ້, ໂຄມໄຟ, ຊາ…). ໂດຍໄດ້ດຳເນີນພາຍຫຼັງວັນບຸນວິສາຂະບູຊາ Vesak 2025, ງານບຸນ ເວຍບ່າ ກໍ່ແມ່ນໂອກາດເພື່ອໃຫ້ແຂກທ່ອງທ່ຽວມາສັກກະລະບູຊາຢ້ຽມຊົມບັນດາກິດຈະກຳວັດທະນະທຳດ້ານຈິດວິນຍານທີ່ພະມະຫາອາຈານ Phra Brahmapundit - ປະທານກຳມະການສາກົນ Vesak ສະຫະປະຊາຊາດ ເອີ້ນວ່າ “ບ່ອນພົບປະຂອງແດນສະຫວັນ ແລະ ໂລກມະນຸດ”. ໃນນັ້ນ, ມີສວນຕົ້ນໂພໂດຍພະເຖລານຸເຖລະນັບພັນອົງໃນທົ່ວໂລກປູກໃນໂອກາດວັນບຸນວິສາຂະບູຊາ Vesak. ນອກນັ້ນ, ແຂກທ່ອງທ່ຽວກໍ່ສາມາດໄປຄົ້ນຫາງານວາງສະແດງພາບແຕ້ມ/ພາບຖ່າຍດ້ວຍຫົວຂໍ້ກ່ຽວກັບພຸດທະສາສະໜາ; ເຂດວາງສະແດງໂຄມໄຟແຕ້ມດ້ວຍມື…
