 ພິທີມອບລາງວັນ ການເສັງຊອກຮູ້ກ່ຽວກັບການຢ້ຽມຢາມ ອິນໂດເນເຊຍ ຄັ້ງປະຫວັດສາດຂອງທ່ານປະທານໂຮ່ຈີມິນ ແລະ ການຢ້ຽມຢາມຫວຽດນາມຂອງທ່ານປະທານາທິບໍດີ Sukarno |
ກ່າວຄໍາເຫັນທີ່ພິທີ, ທ່ານ ຫງວຽນເຖ໊ກີ໋, ຜູ້ອໍານວຍການໃຫຍ່ ວິທະຍຸກະຈາຍສຽງຫວຽດນາມ ຊີ້ແຈ້ງວ່າ: ການຢ້ຽມຢາມ ອິນໂດເນເຊຍ ຄັ້ງປະຫວັດສາດຂອງທ່ານປະທານໂຮ່ຈີມິນ ແລະ ການຢ້ຽມຢາມຫວຽດນາມຂອງທ່ານປະທານາທິບໍດີ Sukarno ເມື່ອປີ 1959 ໄດ້ສ້າງພື້ນຖານໃຫ້ແກ່ການພົວພັນລະຫວ່າງສອງປະເທດ ແລະ ການນໍາ ແລະ ປະຊາຊົນສອງປະເທດໄດ້ສືບຕໍ່ ເພີ່ມພູນຄູນສ້າງຈົນເຖິງປັດຈຸບັນ. ການຈັດການເສັງດັ່ງກ່າວ ແມ່ນເພື່ອມຸ່ງໄປເຖິງການສະເຫຼີມສະຫຼອງ 65 ປີ ແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ ອິນໂດເນເຊຍ ໃນປີ 2020. ທ່ານກ່າວວ່າ:
“ພາຍຫຼັງປຸກລະດົມການເສັງດັ່ງກ່າວມາເປັນເວລາ 2 ເດືອນ, ວິທະຍຸກະຈາຍສຽງຫວຽດນາມ ໄດ້ຮັບການສະໜັບສະໜູນຂອງຜູ້ເຂົ້າຮ່ວມການເສັງໃນທົ່ວປະເທດເປັນຈໍານວນຫຼວງຫຼາຍ. ມີບົດເສັງຫຼາຍບົດ ໄດ້ເຮັດມາຢ່າງພິຖິພິຖັນ. ຜ່ານບົດເສັງຕ່າງໆ ກໍສະແດງໃຫ້ເຫັນຄວາມຮັກແພງຂອງຜູ້ຂຽນ ທີ່ມີີຕໍ່ປະເທດ ອິນໂດເນເຊຍ, ເຊີດຊູໄມຕີຈິດມິດຕະພາບລະຫວ່າງສອງປະເທດ, ພິເສດແມ່ນ ເຊີດຊູນໍ້າໃຈເພື່ອນມິດສະຫາຍແບບພິເສດລະຫວ່າງ ປະທານໂຮ່ຈີມິນ ແລະ ປະທານາທິບໍດີ ອິນໂດເນເຊຍ Sukarno”.
ຄະນະຈັດຕັ້ງ ໄດ້ມອບລາງວັນພິເສດ 1 ລາງວັນ; ລາງວັນທີໜຶ່ງ 1 ລາງວັນ; ລາງວັນທີສອງ 1 ລາງວັນ ແລະ ລາງວັນທີສາມ 3 ລາງວັນ ໃຫ້ແກ່ຜູ້ທີ່ມີບົດຂຽນດີເດັ່ນ.
